ലണ്ടന്: മേയ് മാസത്തില് നടത്താനിരുന്ന 30 കൗണ്സില് തിരഞ്ഞെടുപ്പുകള് 2027 വരെ നീട്ടിവയ്ക്കാനുള്ള തീരുമാനം സര്ക്കാര് പിന്വലിച്ചു. നിയമോപദേശം ലഭിച്ചതിനു ശേഷമാണ് പുതുക്കിയ തീയതി പ്രഖ്യാപിച്ചത്.
പ്രാദേശിക ഭരണസംവിധാനങ്ങളുടെ പുനഃസംഘടനയുടെ ഭാഗമായി രണ്ട് തലത്തിലുള്ള ജില്ല, കൗണ്ടി സംവിധാനം ഒഴിവാക്കി ഏകീകൃത യൂണിറ്ററി അതോറിറ്റികള് രൂപീകരിക്കാനാണ് സര്ക്കാര് ലക്ഷ്യമിടുന്നത്. ചില കൗണ്സിലുകള് തിരഞ്ഞെടുപ്പ് നടത്താനുള്ള സമ്മര്ദ്ദവും ചെലവും ചൂണ്ടിക്കാട്ടി വോട്ടെടുപ്പ് മാറ്റിവയ്ക്കണമെന്ന് ആവശ്യപ്പെട്ടിരുന്നു. ഇതിന്റെ അടിസ്ഥാനത്തിലാണ് ലോക്കല് ഗവണ്മെന്റ് സെക്രട്ടറി സ്റ്റീവ് റീഡ് 30 കൗണ്സില് തിരഞ്ഞെടുപ്പുകള് നീട്ടിവയ്ക്കാന് അനുമതി നല്കിയിരുന്നത്.
എന്നാല് തീരുമാനം ജനാധിപത്യവിരുദ്ധമാണെന്ന് ആരോപിച്ച് റീഫോം യുകെ ഹൈക്കോടതിയെ സമീപിച്ചു. കേസ് കോടതി പരിഗണിക്കും മുമ്പേ സര്ക്കാര് തീരുമാനം പിന്വലിക്കുകയായിരുന്നു. ഇതോടെ എല്ലാ തിരഞ്ഞെടുപ്പുകളും 2026 മേയില് തന്നെ നടത്തുമെന്ന് സര്ക്കാര് വ്യക്തമാക്കി. കൗണ്സിലുകള്ക്ക് തിരഞ്ഞെടുപ്പ് മുന്നൊരുക്കങ്ങള്ക്കായി അധിക ധനസഹായം അനുവദിക്കുമെന്നും അറിയിച്ചു.
ലിബറല് ഡെമോക്രാറ്റ്, കണ്സര്വേറ്റീവ്, ഗ്രീന് പാര്ട്ടി നേതാക്കള് സര്ക്കാര് നിലപാടിനെ വിമര്ശിച്ചെങ്കിലും തീരുമാനം പിന്വലിച്ചത് സ്വാഗതം ചെയ്തു. തിരഞ്ഞെടുപ്പ് നടത്തിപ്പുമായി ബന്ധപ്പെട്ട ഉദ്യോഗസ്ഥര്ക്ക് ഇതിനോടകം തന്നെ തയ്യാറെടുപ്പ് സമയം നഷ്ടമായതായും വെല്ലുവിളികള് തുടരുന്നതായും തിരഞ്ഞെടുപ്പ് രംഗത്തെ സംഘടനകള് ചൂണ്ടിക്കാട്ടുന്നു.
തിരഞ്ഞെടുപ്പ് നടക്കാനിരിക്കുന്ന കൗണ്സിലുകള്
- അഡൂര് ജില്ലാ കൗണ്സില്
- ബേസില്ഡന് ബറോ കൗണ്സില്
- ബ്ലാക്ക്ബേണ് വിത്ത് ഡാര്വന് കൗണ്സില്
- ബേണ്ലി ബറോ കൗണ്സില്
- കാനോക് ചേസ് ജില്ലാ കൗണ്സില്
- ചെല്ട്ടനം ബറോ കൗണ്സില്
- ചോര്ലി ബറോ കൗണ്സില്
- സിറ്റി ഓഫ് ലിങ്കണ് കൗണ്സില്
- ക്രോളി ബറോ കൗണ്സില്
- ഈസ്റ്റ് സസെക്സ് കൗണ്ടി കൗണ്സില്
- എക്സറ്റര് സിറ്റി കൗണ്സില്
- ഹാര്ലോ ജില്ലാ കൗണ്സില്
- ഹാസ്റ്റിങ്സ് ബറോ കൗണ്സില്
- ഹിന്ഡ്ബേണ് ബറോ കൗണ്സില്
- ഇപ്സ്വിച്ച് ബറോ കൗണ്സില്
- നോര്ഫോക് കൗണ്ടി കൗണ്സില്
- നോര്വിച്ച് സിറ്റി കൗണ്സില്
- പെന്ഡില് ബറോ കൗണ്സില്
- പീറ്റര്ബറോ സിറ്റി കൗണ്സില്
- പ്രസ്റ്റണ് സിറ്റി കൗണ്സില്
- റെഡിച്ച് ബറോ കൗണ്സില്
- റഗ്ബി ബറോ കൗണ്സില്
- സ്റ്റീവനേജ് ബറോ കൗണ്സില്
- സഫോക് കൗണ്ടി കൗണ്സില്
- ടാംവര്ത്ത് ബറോ കൗണ്സില്
- തറോക്ക് കൗണ്സില്
- വെല്വിന് ഹാറ്റ്ഫീല്ഡ് ബറോ കൗണ്സില്
- വെസ്റ്റ് ലാങ്കഷയര് ബറോ കൗണ്സില്
- വെസ്റ്റ് സസെക്സ് കൗണ്ടി കൗണ്സില്
- വര്തിങ് ബറോ കൗണ്സില്
