തിളങ്ങുന്ന മാളുകളും ആഡംബര ജീവിതവുമൊക്കെയായി പലര്ക്കും ദുബായ് ജീവിതം ഒരു സ്വപ്നതുല്യമായ കാര്യമാണ്. എന്നാല്, വിദേശത്തെ ഈ വിജയങ്ങള്ക്ക് പിന്നില് ആരും കാണാത്ത വ്യക്തിപരമായ ത്യാഗങ്ങളുണ്ടെന്ന് ഓര്മ്മിപ്പിക്കുകയാണ് ദുബായില് താമസിക്കുന്ന ഒരു 23-കാരി. ദുബായില് കോര്പ്പറേറ്റ് ജോലി ചെയ്യുന്ന, അനുഷ്ക ശര്മ്മ എന്ന ഇന്ത്യന് യുവതിയാണ് ഇന്സ്റ്റാഗ്രാമിലൂടെ പ്രവാസജീവിതത്തിന്റെ ചില വേദനകള് തുറന്നുപറഞ്ഞ് രംഗത്തെത്തിയത്. സ്വന്തം നാടും വീടും വിട്ട് ദൂരെയൊരു നഗരത്തില് ജീവിതം കെട്ടിപ്പടുക്കുമ്പോള് നേരിടേണ്ടി വരുന്ന ഏകാന്തതയെയും വൈകാരിക സമ്മര്ദ്ദങ്ങളെയും കുറിച്ചാണ് അനുഷ്ക വീഡിയോയില് സംസാരിക്കുന്നത്. ആളുകള് ദുബായിലെ ടാക്സ് ഫ്രീ ശമ്പളം മാത്രമേ കാണാറുള്ളൂ, എന്നാല് ഇവിടെ ജീവിക്കാനായി നല്കേണ്ടി വരുന്ന യഥാര്ത്ഥ വില എന്താണെന്ന് ആര്ക്കും അറിയില്ല. വീട്ടില് നിന്ന് മാറി നില്ക്കുക, അസുഖം വരുമ്പോള് ആരുമില്ലാതെ ഒറ്റയ്ക്ക് കാര്യങ്ങള് കൈകാര്യം ചെയ്യുക, എല്ലാ വിശേഷദിവസങ്ങളും വെറും വീഡിയോ കോളുകളില് മാത്രം ഒതുക്കുക... ഇതൊന്നും അത്ര എളുപ്പമുള്ള കാര്യമല്ല. എങ്കിലും, കുടുംബത്തിന്റെ സുരക്ഷിതമായ ഭാവിക്കായി ഇന്നത്തെ സുഖസൗകര്യങ്ങള് ത്യാഗം ചെയ്യുന്നത് എപ്പോഴും മൂല്യമുള്ള കാര്യമാണ്' - അനുഷ്ക വീഡിയോയില് പറയുന്നു.
സോഷ്യല് മീഡിയ സാധാരണയായി ജീവിതത്തിന്റെ ഭംഗിയുള്ള വശങ്ങളും, വീക്കെന്ഡിലെ മനോഹരമായ കാഴ്ചകളും, കരിയറിലെ വളര്ച്ചയും മാത്രമേ കാണിക്കാറുള്ളൂ എന്ന് അനുഷ്ക തന്റെ പോസ്റ്റിന്റെ ക്യാപ്ഷനില് പറയുന്നു. എന്നാല്, ഒരു വലിയ നഗരത്തില് അതിജീവിക്കാന് തങ്ങള് നല്കുന്ന വില എന്താണെന്ന് നാടുവിട്ട് ജീവിക്കുന്ന പ്രവാസികള്ക്ക് മാത്രമേ ശരിക്കും മനസ്സിലാകൂ എന്നും അവര് കൂട്ടിച്ചേര്ത്തു. ഓഫീസിലെ കഠിനമായ ഒരു ദിവസത്തിന് ശേഷം ക്ഷീണിതയായി മടങ്ങിയെത്തി എല്ലാ കാര്യങ്ങളും ഒറ്റയ്ക്ക് ചെയ്യേണ്ടി വരുന്നത്, കുടുംബത്തിലെ പ്രധാനപ്പെട്ട നിമിഷങ്ങളില് ഒപ്പമുണ്ടാകാന് കഴിയാതെ വരുന്നത്, പെട്ടെന്നുണ്ടാകുന്ന ഹോംസിക്ക്നസ് എന്നിവയെല്ലാം ചിലപ്പോഴൊക്കെ മനസ്സിന് വലിയ ഭാരമായി തോന്നാമെന്നും അനുഷ്ക തുറന്നുപറയുന്നു. എങ്കിലും, വളരെ പോസിറ്റീവായ ഒരു സന്ദേശത്തോടെയാണ് അനുഷ്ക തന്റെ വീഡിയോ അവസാനിപ്പിക്കുന്നത്. വെല്ലുവിളികള് ഉണ്ടാകുമ്പോള് തങ്ങള് എന്തിനാണ് ഈ യാത്ര തുടങ്ങിയതെന്ന് എല്ലാവരും ഓര്ക്കണമെന്നും അവര് പറയുന്നു.
