|
ശബരിമല സ്വര്ണ്ണകൊള്ളയില് മുന് ദേവസ്വം ബോര്ഡ് പ്രസിഡന്റ് പി എസ് പ്രശാന്ത് നാലാം പ്രതി. പ്രശാന്തിനെതിരെ ഗൂഢാലോചനയ്ക്ക് തെളിവുണ്ടെന്ന് ഹൈക്കോടതി. ഇടക്കാല ഉത്തരവ് പുറത്ത്. 2025ല് ദ്വാരാപാലക ശില്പങ്ങള് ചെന്നൈയിലേക്ക് കൊണ്ടുപോയത് സംബന്ധിച്ച കേസിലാണ് പിഎസ് പ്രശാന്തിനെ പ്രതി ചേര്ത്തിരിക്കുന്നത്. ഏഴ് പ്രതികളാണ് കേസിലുള്ളത്. മുരാരി ബാബുവാണ് ഒന്നാം പ്രതി. രണ്ടാം പ്രതി ഉണ്ണികൃഷ്ണന് പോറ്റി, മൂന്നാം പ്രതി പങ്കജ് ഭണ്ഡാരി, അഞ്ചാം പ്രതി അജി കുമാര്, ആറാം പ്രതി കണ്ഠരര് രാജീവര് എന്നിവരാണ് മറ്റ് പ്രതികള്.
അന്വേഷണത്തില് ശേഖരിച്ച തെളിവുകള് പ്രകാരം ഈ ഏഴ് പേരുടെയും പങ്ക് വ്യക്തമായി തെളിഞ്ഞതായി എസ്ഐടി റിപ്പോര്ട്ട് പറയുന്നു. ഇവര് മുന്കൂട്ടി ആസൂത്രണം ചെയ്ത ക്രിമിനല് ഗൂഢാലോചനയുടെ ഭാഗമായി കൂട്ടായി പ്രവര്ത്തിച്ചെന്നാണ് എസ്ഐടിയുടെ കണ്ടെത്തല്. ഇവരുടെ പ്രവൃത്തികള് വിശ്വാസവഞ്ചന, രേഖാ വ്യാജം, ക്രിമിനല് ഗൂഢാലോചന തുടങ്ങിയ കുറ്റങ്ങള് ഉള്ക്കൊള്ളുന്നതാണെന്ന് റിപ്പോര്ട്ടില് പറയുന്നു. അതിനാല്, ഇവര്ക്കെതിരെ BNSS വ്യവസ്ഥകള് പ്രകാരം കര്ശന നിയമനടപടികള് ഉടന് ആരംഭിക്കണം എന്ന് എസ്ഐടി ശുപാര്ശ ചെയ്തതായി കോടതി രേഖപ്പെടുത്തി. അന്വേഷണം എത്രയും വേഗം പൂര്ത്തിയാക്കി അന്തിമ റിപ്പോര്ട്ട് സമര്പ്പിക്കണമെന്നും കോടതി നിര്ദേശിച്ചു. |
