അഡ്‌ലെയ്ഡ്: ഓസ്ട്രേലിയയിലെ അഡ്‌ലെയ്ഡ് മൃഗശാലയില്‍ 34 വര്‍ഷത്തെ ഇടവേളയ്ക്കുശേഷം സതേണ്‍ കാസോവാരി മുട്ടയിട്ടു. തിളങ്ങുന്ന പച്ചനിറത്തിലുള്ള മുട്ട കണ്ടെത്തിയത് മൃഗശാലയിലെ ബേര്‍ഡ്‌സ് ആന്‍ഡ് ഫ്രീ ഫ്‌ലൈറ്റ് ടീം സൂപ്പര്‍വൈസറായ എറിനാണ്. പത്തുവയസ്സുള്ള മാര്‍ട്ടിനയെയും പതിമൂന്നുവയസ്സുള്ള ജെഫ്രിയെയും ഈ വര്‍ഷം ഓഗസ്റ്റിലാണ് അധികൃതര്‍ ഒന്നിപ്പിച്ചത്. ഇവയില്‍നിന്ന് മുട്ട ലഭിച്ചതിന്റെ സന്തോഷത്തിലാണ് മൃഗശാല ജീവനക്കാര്‍. അഡ്‌ലെയ്ഡില്‍ ആദ്യമായി കാസോവാരി കുഞ്ഞ് ജനിച്ചത് 1968ലായിരുന്നു. പിന്നീട് 1992ല്‍ ആറു കുഞ്ഞുങ്ങള്‍ പിറന്നു. അതിനുശേഷമുള്ള നീണ്ട ഇടവേളയാണ് പുതിയ മുട്ടയുടെ കണ്ടെത്തലിനെ ശ്രദ്ധേയമാക്കുന്നത്.
കാസോവാരി മുട്ടകളുടെ പച്ചനിറത്തിന് കാരണം ബിലിവര്‍ഡിന്‍ എന്ന സ്വാഭാവിക വര്‍ണവസ്തുവാണ്. മഴക്കാടുകളിലെ ഇലകള്‍ക്കിടയില്‍ മുട്ടകള്‍ തിരിച്ചറിയപ്പെടാതെ കിടക്കാനും ഇരപിടിയന്മാരില്‍നിന്ന് സംരക്ഷണം ലഭിക്കാനും ഈ നിറം സഹായിക്കുന്നു. ഏകദേശം 580 ഗ്രാംവരെ ഭാരമുള്ളവയാണ് കാസോവാരി മുട്ടകള്‍. പെണ്‍പക്ഷി മുട്ടയിട്ടശേഷം അടയിരിക്കുന്നതും വിരിഞ്ഞിറങ്ങുന്ന കുഞ്ഞുങ്ങളെ പരിപാലിക്കുന്നതും ആണ്‍പക്ഷിയാണ്. പുതിയ മുട്ട ലഭിച്ചതാണ് മൃഗശാല പങ്കുവെച്ച സന്തോഷവാര്‍ത്ത. മുട്ട വിരിഞ്ഞ് കുഞ്ഞ് പുറത്തുവന്നതായി റിപ്പോര്‍ട്ടില്‍ സ്ഥിരീകരണമില്ല.
