മഹാരാജ്ഗഞ്ച്: ഉത്തര്പ്രദേശിലെ മഹാരാജ്ഗഞ്ച് കുടുംബ കോടതിയില് വിവാഹമോചന കേസിന്റെ നടപടികള്ക്കു പിന്നാലെ യുവതിക്കും കുടുംബാംഗങ്ങള്ക്കും നേരെ ആക്രമണമുണ്ടായതായി പരാതി. സെപ്റ്റംബര് 24-ന് നടന്ന സംഭവത്തില് യുവതിയുടെ ഭര്ത്താവടക്കം രണ്ടുപേരെ പൊലീസ് അറസ്റ്റ് ചെയ്തു. കോടതി കെട്ടിടത്തിനുള്ളിലെ സംഘര്ഷത്തിന്റെ ദൃശ്യങ്ങള് സമൂഹമാധ്യമങ്ങളില് വ്യാപകമായി പ്രചരിച്ചു.
ഉച്ചയ്ക്ക് രണ്ടുമണിയോടെയാണ് വിവാഹമോചന കേസിന്റെ വാദം നടന്നത്. പ്രിയ ത്രിപാഠിയുടെ പിതാവ് ലക്ഷ്മികാന്ത് കേസില് മൊഴി നല്കാനെത്തിയിരുന്നു. നടപടികള് പൂര്ത്തിയാക്കി പ്രിയയും സഹോദരി പ്രിയങ്കയും പിതാവും താഴത്തെ നിലയിലെ ഹാളിലെത്തിയപ്പോള് ഭര്ത്താവ് മനീഷ് കുമാര് മിശ്രയും കൂടെയുണ്ടായിരുന്ന മറ്റൊരാളും ആക്രമിച്ചെന്നാണ് പരാതി.
പ്രിയയുടെ മുടിയില് പിടിച്ചുവലിക്കുന്നതും നിലത്തേക്ക് തള്ളിയിടുന്നതും കഴുത്ത് ഞെരിക്കാന് ശ്രമിക്കുന്നതും പ്രചരിക്കുന്ന ദൃശ്യങ്ങളിലുണ്ടെന്നാണ് റിപ്പോര്ട്ടുകള്. തടയാനെത്തിയ പിതാവിനെയും സഹോദരിയെയും ആക്രമിച്ചതായും പരാതിയില് പറയുന്നു.
അഭിഭാഷകരും കോടതിയിലെത്തിയ മറ്റുള്ളവരും നോക്കിനില്ക്കെയായിരുന്നു സംഘര്ഷം. ചിലര് ഇടപെട്ട് തടയാന് ശ്രമിച്ചെങ്കിലും തര്ക്കം രൂക്ഷമായി. തുടര്ന്ന് പൊലീസ് ഉദ്യോഗസ്ഥരെത്തി സ്ഥിതി നിയന്ത്രിക്കുകയായിരുന്നു.
സംഭവത്തിനു പിന്നാലെ പ്രിയ കോട്ട്വാലി പൊലീസ് സ്റ്റേഷനില് പരാതി നല്കി. കുടുംബത്തര്ക്കവുമായി ബന്ധപ്പെട്ട് തനിക്കു വധഭീഷണി നേരിട്ടതായും അവര് ആരോപിച്ചു. പരാതിയുടെ അടിസ്ഥാനത്തില് രണ്ടുപേര്ക്കെതിരെ കേസ് രജിസ്റ്റര് ചെയ്ത് ഇരുവരെയും അറസ്റ്റ് ചെയ്തതായി കോട്ട്വാലി മഹാരാജ്ഗഞ്ച് സ്റ്റേഷന് ഹൗസ് ഓഫീസര് ധര്മേന്ദ്ര സിങ് അറിയിച്ചു. അന്വേഷണം തുടരുകയാണെന്നും പൊലീസ് വ്യക്തമാക്കി.
