വിവാഹശേഷം ആഘോഷങ്ങള്‍ ഭര്‍ത്താവിന്റെ കുടുംബത്തിനൊപ്പം മാത്രമാകണമെന്ന പ്രതീക്ഷയെ ചോദ്യം ചെയ്ത് യുവതി പങ്കുവച്ച സമൂഹമാധ്യമ പോസ്റ്റ് ശ്രദ്ധനേടുന്നു. പെണ്‍മക്കള്‍ മാത്രമുള്ള കുടുംബങ്ങളില്‍ അവരുടെ വിവാഹശേഷം മാതാപിതാക്കള്‍ ഉത്സവദിനങ്ങള്‍ തനിച്ച് ചെലവഴിക്കേണ്ടിവരുന്നതിലെ അനീതിയാണ് യുവതി ചൂണ്ടിക്കാട്ടുന്നത്. വിവാഹിതരായ ആണ്‍മക്കള്‍ക്ക് സ്വന്തം മാതാപിതാക്കള്‍ക്കൊപ്പം ആഘോഷങ്ങളില്‍ പങ്കെടുക്കാന്‍ സാധിക്കുമ്പോള്‍ പെണ്‍മക്കള്‍ക്ക് അതേ അവസരം ലഭിക്കുന്നുണ്ടോയെന്നാണ് യുവതിയുടെ ചോദ്യം. ദീപാവലിയും ഹോളിയും ഉള്‍പ്പെടെയുള്ള വിശേഷദിവസങ്ങളില്‍ സ്വന്തം വീട്ടിലേക്ക് പോകാന്‍ ആഗ്രഹിക്കുന്ന സ്ത്രീകള്‍ പലപ്പോഴും വിട്ടുവീഴ്ച ചെയ്യേണ്ടിവരുന്നതായും അവര്‍ പറയുന്നു.
ആഘോഷങ്ങള്‍ എപ്പോഴും ഭാര്യയുടെ വീട്ടിലോ ഭര്‍ത്താവിന്റെ വീട്ടിലോ നടത്തണമെന്നല്ല തന്റെ നിലപാടെന്നും യുവതി വ്യക്തമാക്കുന്നു. എവിടെ ആഘോഷിക്കണമെന്ന് തീരുമാനിക്കുന്നതില്‍ ഇരുവര്‍ക്കും തുല്യപങ്കാളിത്തവും അവകാശവും വേണമെന്നതാണ് ആവശ്യം. ഭര്‍തൃകുടുംബത്തിന് സ്വാഭാവികമായി മുന്‍ഗണന നല്‍കണമെന്ന അലിഖിത പ്രതീക്ഷയാണ് ചോദ്യം ചെയ്യപ്പെടുന്നത്. പ്രത്യേകിച്ച് സഹോദരന്മാരില്ലാത്ത വിവാഹിതരായ സ്ത്രീകള്‍ സ്വന്തം അനുഭവങ്ങള്‍ പങ്കുവയ്ക്കണമെന്നും യുവതി അഭ്യര്‍ഥിച്ചു. പിന്നാലെ നിരവധി പേര്‍ പ്രതികരണങ്ങളുമായി എത്തി.
ഭര്‍ത്താവിന്റെയും കുടുംബത്തിന്റെയും പിന്തുണയോടെ സ്വന്തം മാതാപിതാക്കള്‍ക്കൊപ്പവും ആഘോഷങ്ങളില്‍ പങ്കെടുക്കാറുണ്ടെന്ന് ചിലര്‍ അറിയിച്ചു. ഏകമകളായതിനാല്‍ വിശേഷദിവസങ്ങള്‍ മാതാപിതാക്കള്‍ക്കൊപ്പം ചെലവഴിക്കുന്നതില്‍ വിട്ടുവീഴ്ച ചെയ്യാറില്ലെന്ന അനുഭവവും ഒരാള്‍ പങ്കുവച്ചു. വിവാഹശേഷവും ഇരുകുടുംബങ്ങളുമായുള്ള ബന്ധത്തിന് തുല്യപരിഗണന ലഭിക്കണമെന്ന ചര്‍ച്ചയ്ക്കാണ് പോസ്റ്റ് വഴിതുറന്നത്.
