റഗ്ബി ടൗണ്‍ സെന്ററില്‍ അരങ്ങേറിയ ദീപാവലി ആഘോഷങ്ങള്‍ക്ക് മലയാളികളുടെ നൃത്ത-സംഗീത പ്രകടനങ്ങള്‍ നിറപ്പകിട്ടേകി. ഇന്ത്യന്‍ സംസ്‌കാരത്തിന്റെ വൈവിധ്യവും കലാപാരമ്പര്യവും വിളിച്ചോതിയ ആഘോഷവേദിയില്‍ അസോസിയേഷന്‍ ഓഫ് റഗ്ബി മലയാളീസ് (Aossciation of Rugby Malayalees - ARM) അംഗങ്ങളുടെ കലാപങ്കാളിത്തം ഏറെ ശ്രദ്ധേയമായി.

സംഗീതവും നൃത്തവും ദീപാലങ്കാരങ്ങളും വിവിധ സാംസ്‌കാരിക പരിപാടികളും ഒത്തുചേര്‍ന്ന ആഘോഷത്തില്‍ 25-ഓളം കലാപരിപാടികളാണ് അരങ്ങേറിയത്. ഇന്ത്യയുടെ വിവിധ സംസ്ഥാനങ്ങളുടെയും സംസ്‌കാരങ്ങളുടെയും തനിമ വിളിച്ചോതുന്ന ഒഡീസി, ആന്ധ്രാ ശൈലിയിലുള്ള നൃത്തങ്ങള്‍, ഹിന്ദി ഗാനങ്ങള്‍ക്കൊപ്പമുള്ള നൃത്താവിഷ്‌കാരങ്ങള്‍ തുടങ്ങി നിരവധി കലാരൂപങ്ങള്‍ വേദിയിലെത്തി. മനോഹരമായ ചുവടുകളും വര്‍ണാഭമായ വേഷവിധാനങ്ങളും ചേര്‍ന്ന ക്ലാസിക്കല്‍ നൃത്താവിഷ്‌കാരങ്ങള്‍ ഇന്ത്യന്‍ കലാപാരമ്പര്യത്തിന്റെ സൗന്ദര്യം വിളിച്ചോതുന്നതായിരുന്നു.

വിവിധ സ്റ്റാളുകള്‍, സംഗീതപരിപാടികള്‍, ഘോഷയാത്ര, ദീപാലങ്കാരങ്ങള്‍ എന്നിവയും ആഘോഷത്തിന് മാറ്റുകൂട്ടി. റഗ്ബി മേയര്‍ നൂരിയ സയാനിയുടെ സാന്നിധ്യവും പരിപാടിക്ക് പ്രത്യേക പ്രാധാന്യം നല്‍കി.


ആഘോഷവേദിയില്‍ ARM അംഗങ്ങളായ മലയാളി കലാകാരികളുടെ മൂന്ന് വ്യത്യസ്ത നൃത്താവിഷ്‌കാരങ്ങള്‍ കാണികളുടെ പ്രത്യേക ശ്രദ്ധ നേടി. ഓരോ പ്രകടനവും വ്യത്യസ്ത സംഗീതശൈലികളും നൃത്തഭാവങ്ങളും കോര്‍ത്തിണക്കിയതായിരുന്നു.

ആദ്യമായി അരങ്ങിലെത്തിയത് സെമി ക്ലാസിക്കല്‍ ശൈലിയിലുള്ള മനോഹരമായ ലേഡീസ് ഡാന്‍സായിരുന്നു. മനോഹരമായ വേഷവിധാനങ്ങളും പ്രകടനത്തിന് കൂടുതല്‍ ചാരുത പകര്‍ന്നു. ലിറ്റീഷ്യ സബിത്ത്, ഗോപിക അഭിജിത്ത്, രശ്മി സജിത്ത്, ടീന സിജോ, മാളവിക രഘുനാഥ്, രേഷ്മ മിഥുന്‍, രേഷ്മ നായര്‍, ആര്‍തി വൈഭവ് എന്നിവര്‍ ചേര്‍ന്നാണ് ഈ നൃത്തം അവതരിപ്പിച്ചത്.

രണ്ടാമത്തെ നൃത്താവിഷ്‌കാരം മലയാളികളുടെ മനസ്സില്‍ ഇന്നും മായാതെ നില്‍ക്കുന്ന 90-കളിലെ മെലഡി ഗാനങ്ങളും അക്കാലത്തെ ഹിറ്റ് ഗാനങ്ങളും കോര്‍ത്തിണക്കിയ മനോഹരമായ മാഷപ്പായിരുന്നു. വര്‍ഷ മഹേഷ്, ടീജ തോമസ്, ശില്‍പ ബിനീഷ്, മേഘ ജയരാജ്, അഞ്ജന നിതിന്‍, ലിയ ടോം, ധന്യ സത്യന്‍ എന്നിവര്‍ ചേര്‍ന്നാണ് ഈ നൃത്തം അവതരിപ്പിച്ചത്.

മൂന്നാമത്തെ നൃത്താവിഷ്‌കാരം വിവിധ ഹിറ്റ് ഗാനങ്ങള്‍ കോര്‍ത്തിണക്കിയ ഊര്‍ജസ്വലമായ പ്രകടനമായിരുന്നു. ടീന സിജോയും മാളവിക രഘുനാഥും ചേര്‍ന്ന് അവതരിപ്പിച്ച ഈ നൃത്തം വേദിയെ ആവേശഭരിതമാക്കി.

ARM-ന്റെ യുവതലമുറയെ പ്രതിനിധീകരിച്ച് കൗമാരക്കാരായ ലിസെലെറ്റ് ലിജു ആന്റണിയും അഡ്വിക മഹേഷും ചേര്‍ന്ന് അവതരിപ്പിച്ച നൃത്തവും ശ്രദ്ധേയമായി. ആത്മവിശ്വാസവും ചടുലമായ ചുവടുകളും നിറഞ്ഞ ഈ പ്രകടനം കാണികളുടെ പ്രശംസ നേടി.

ഇതിനൊപ്പം നന്ദിനിയുടെ ഗാനാവിഷ്‌കാരവും ആഘോഷത്തിന് സംഗീതമാധുര്യം പകര്‍ന്നു. ഫെമില്‍ഡെ ഫിലിപ്പ് അവതരിപ്പിച്ച കുച്ചിപ്പുടി നൃത്തവും മലയാളികളുടെ കലാപരിപാടികള്‍ക്ക് കൂടുതല്‍ മിഴിവേകി.

ഇന്ത്യയുടെ വിവിധ സംസ്‌കാരങ്ങള്‍ ഒന്നിച്ചുചേര്‍ന്ന വേദിയില്‍ മലയാളത്തിന്റെ തനിമയും കലാപാരമ്പര്യവും അഭിമാനത്തോടെ അവതരിപ്പിക്കാന്‍ ARM അംഗങ്ങള്‍ക്ക് സാധിച്ചു. സെമി ക്ലാസിക്കല്‍ നൃത്തം മുതല്‍ പഴയകാല ഗാനങ്ങളുടെ മാഷപ്പും ആവേശകരമായ നൃത്താവിഷ്‌കാരങ്ങളും കൗമാരക്കാരുടെ പ്രകടനങ്ങളും വരെ വ്യത്യസ്ത കലാരൂപങ്ങള്‍ ഒരുമിച്ചെത്തിയപ്പോള്‍ അത് മലയാളി കൂട്ടായ്മയുടെ സാംസ്‌കാരിക ഐക്യത്തിന്റെ മനോഹരമായ കാഴ്ചയായി മാറി.

വിദേശമണ്ണിലും സ്വന്തം ഭാഷയോടും സംസ്‌കാരത്തോടും കലാപാരമ്പര്യത്തോടുമുള്ള സ്നേഹം പുതുതലമുറയിലേക്ക് പകര്‍ന്നുനല്‍കുന്ന ഇത്തരം കൂട്ടായ്മകള്‍ ഏറെ വിലപ്പെട്ടതാണ്. റഗ്ബിയിലെ ദീപാവലി ആഘോഷവേദിയില്‍ ARM അംഗങ്ങള്‍ നടത്തിയ ഈ കലാപങ്കാളിത്തം മലയാളികള്‍ക്ക് അഭിമാനിക്കാവുന്ന മറ്റൊരു മനോഹര നിമിഷമായി.

ചിത്രങ്ങള്‍: എംജെ ആര്‍ട്ടോഗ്രഫി