ദീപാവലി ആഘോഷവുമായി ബന്ധപ്പെട്ട് കേവലം രണ്ട് ദിവസത്തിനുള്ളില്‍ തമിഴ്‌നാട്ടില്‍ 17 കൊലപാതകങ്ങള്‍ റിപ്പോര്‍ട്ട് ചെയ്യപ്പെട്ടു. ഇത് സംസ്ഥാനത്ത് വന്‍ രാഷ്ട്രീയ കൊടുങ്കാറ്റിന് വഴിവെക്കുകയും മുഖ്യമന്ത്രി സി ജോസഫ് വിജയ്ക്കെതിരെ പ്രതിപക്ഷം ആക്രമണം കടുപ്പിക്കുകയും ചെയ്തിട്ടുണ്ട്.
കേന്ദ്ര ആഭ്യന്തര മന്ത്രാലയം ഗവര്‍ണര്‍ രാജേന്ദ്ര അര്‍ലേക്കറോട് വിശദമായ റിപ്പോര്‍ട്ട് ആവശ്യപ്പെട്ടു. പൊതുസുരക്ഷ കൈകാര്യം ചെയ്യുന്നതില്‍ സംസ്ഥാന സര്‍ക്കാരിന്റെ വീഴ്ചയെ പ്രതിപക്ഷം ചോദ്യം ചെയ്യുമ്പോള്‍, ക്രമസമാധാനം വീണ്ടെടുക്കാന്‍ ഭരണകക്ഷിയായ തമിഴക വെട്രി കഴകം കടുത്ത സമ്മര്‍ദത്തിലാണ്. കേന്ദ്ര ആഭ്യന്തര മന്ത്രാലയത്തിന്റെ ഇടപെടല്‍ തമിഴ്നാട്ടിലെ ക്രമസമാധാന പ്രശ്‌നത്തിന് അന്താരാഷ്ട്ര തലത്തിലുള്ള ശ്രദ്ധ നല്‍കുകയും രാഷ്ട്രീയ പോരാട്ടത്തിന് പുതിയൊരു മാനം നല്‍കുകയും ചെയ്തിട്ടുണ്ട്.
തമിഴ്നാട്ടിലുടനീളം കൊലപാതകങ്ങള്‍ വര്‍ധിച്ചുവരികയാണെന്നും ദീപാവലി ദിവസം മാത്രം പത്തിലധികം കൊലപാതകങ്ങള്‍ നടന്നതായും ഡിഎംകെയും എഐഎഡിഎംകെയും ഉള്‍പ്പെടെയുള്ള പ്രതിപക്ഷ പാര്‍ട്ടികള്‍ ആരോപിച്ചു. എന്നാല്‍, ദീപാവലി ദിവസം എട്ട് കൊലപാതകങ്ങളാണ് റിപ്പോര്‍ട്ട് ചെയ്തതെന്ന് വ്യക്തമാക്കി സംസ്ഥാന സര്‍ക്കാരും പോലീസും ഈ കണക്കുകള്‍ തള്ളിപ്പറഞ്ഞു.