|
വഞ്ചിയൂര് കോടതിയിലെ ജൂനിയര് അഭിഭാഷകയെ മര്ദിച്ച കേസില് പ്രതി അഡ്വ. ബെയ്ലിന് ദാസ് പിടിയില്. തിരുവനന്തപുരം സ്റ്റേഷന് കടവില് നിന്നാണ് പിടികൂടിയത്. തുമ്പ പോലീസ് ആണ് പ്രതിയെ പിടികൂടിയത്. പ്രതിയെ വഞ്ചിയൂര് പൊലീസിന് കൈമാറും. ഒളിവില് കഴിഞ്ഞിരുന്ന സ്ഥലം മാറുന്നതിനിടെയാണ് ഇയാള് പിടിയിലാകുന്നത്. പ്രതി ഇന്ന് മുന്കൂര് ജാമ്യത്തിന് അപേക്ഷ നല്കിയിരുന്നു. പ്രതിക്കെതിരെ ജാമ്യമില്ലാ വകുപ്പുകള് ചുമത്തിയിരുന്നു.
ജൂനിയര് അഭിഭാഷക ശ്യാമിലി ക്രൂര മര്ദനത്തിനാണ് ഇരയായത്. സംഭവത്തിന് പിന്നാലെ ബെയ്ലിന് ദാസ് ഒളിവില് പോയിരുന്നു. ശ്യാമിലിയെ മുഖത്തടിച്ച് നിലത്തുവീഴ്ത്തി, എഴുന്നേല്ക്കാന് ശ്രമിച്ചപ്പോള് വീണ്ടും മുഖത്തടിച്ചതായും എഫ്ഐആര്. ഓഫീസിലെ ആഭ്യന്തര പ്രശ്നവുമായി ബന്ധപ്പെട്ട് സീനിയര് അഭിഭാഷകനെ കാണാന് കാബിനില് എത്തിയപ്പോഴാണ് മുഖത്തടിച്ചത്. അടിയില് നിലത്ത് വീണെങ്കിലും ഏഴുന്നേല്പ്പിച്ച് വീണ്ടും പൊതിരെ തല്ലിയതോടെ താന് തലകറങ്ങി വീഴുകയായിരുന്നെന്ന് ശ്യാമിലി പറഞ്ഞു. |
