യുകെയിലെ 42 കാരനായ ടോമി ലിഞ്ച് ഉറക്കമുണര്ന്നപ്പോള് തന്റെ ചര്മ്മം അസാധാരണമായി നീലയായതായി കണ്ടപ്പോള് ഞെട്ടി. ക്ഷീണവും നിറംമാറ്റവും കാരണം ഗുരുതരമായ ആരോഗ്യപ്രശ്നമാണെന്ന് കരുതി അദ്ദേഹം ആശുപത്രിയിലേക്ക് ഓടി. ആദ്യ പരിശോധനയില് മെഡിക്കല് സ്റ്റാഫുകള്ക്കും കാര്യം മനസിലായില്ല. ഓക്സിജന് നല്കി പരിശോധനകള് ആരംഭിച്ചപ്പോള്, ആല്ക്കഹോള് സ്വാബ് ഉപയോഗിച്ച് കൈ തുടച്ചപ്പോള് കോട്ടണ് പാഡ് നീലയായി മാറി. ഇതോടെ നിറംമാറ്റത്തിന്റെ യഥാര്ത്ഥ കാരണം കണ്ടെത്തി.
ലിഞ്ചിന്റെ ശരീരത്തിലെ നിറം മാറിയത് മെഡിക്കല് പ്രശ്നമല്ലായിരുന്നു. അടുത്തിടെ ഉപയോഗിക്കാന് തുടങ്ങിയ നേവി ബ്ലൂ ബെഡ്ഷീറ്റിലെ നിറം ശരീരത്തില് പതിഞ്ഞതാണ് കാരണമെന്ന് ഡോക്ടര്മാര് വ്യക്തമാക്കി. കഴുകാതെ രണ്ട് രാത്രികള് ബെഡ്ഷീറ്റ് ഉപയോഗിച്ചതിനാല് നിറം ശരീരത്തില് പറ്റിപ്പിടിക്കുകയായിരുന്നു.
കാരണം കണ്ടെത്തിയതോടെ ആശങ്ക തമാശയായി മാറി. ''എന്റെ രൂപം അവതാര് സിനിമയിലെ കഥാപാത്രത്തെപ്പോലെയായിരുന്നു'' എന്ന് ലിഞ്ച് തമാശയായി പറഞ്ഞു. പുതിയ തുണിത്തരങ്ങള് ഉപയോഗിക്കുന്നതിന് മുമ്പ് കഴുകണമെന്ന് അറിയില്ലായിരുന്നുവെന്നും, നിറം മുഴുവനായും പോകാന് ഏകദേശം ഒരാഴ്ച എടുത്തുവെന്നും അദ്ദേഹം കൂട്ടിച്ചേര്ത്തു.
ഡോക്ടര്മാര് ''നീല നിറത്തില് ആരോഗ്യവാനായ ഒരാളെ ആദ്യമായി കാണുന്നു'' എന്ന് പറഞ്ഞതായും ലിഞ്ച് പറഞ്ഞു
