ലണ്ടന്‍: ഭക്ഷണവിതരണത്തിനായി എത്തിയ യുവതിയെ ബലാത്സംഗം ചെയ്ത കേസില്‍ ഇന്ത്യന്‍ പൗരന് തടവ് ശിക്ഷ. ഗുജറാത്ത് സ്വദേശിയായ 47 കാരന്‍ ജിതേന്ദ്രകുമാര്‍ പ്രജാപതിയെയാണ് ലിങ്കണ്‍ഷെയര്‍ കോടതി മൂന്ന് വര്‍ഷവും എട്ട് മാസവും തടവിന് ശിക്ഷിച്ചത്. ശിക്ഷ പൂര്‍ത്തിയാക്കിയ ശേഷം ഇയാളെ ഇന്ത്യയിലേക്ക് നാടുകടത്താനും കോടതി ഉത്തരവിട്ടു.



സംഭവവിവരം

ജനുവരി 14-നാണ് സംഭവം. ലിങ്കണ്‍ഷെയറിലെ ബോസ്റ്റണ്‍ നഗരത്തില്‍ ഉബര്‍ ഈറ്റ്‌സ് ഡ്രൈവറായി ജോലി ചെയ്തിരുന്ന പ്രജാപതി, ഭക്ഷണം എത്തിച്ചുകൊടുത്ത യുവതിയുടെ വിശ്വാസം ദുരുപയോഗം ചെയ്തു. വിസ സംബന്ധമായ സഹായം വേണമെന്ന വ്യാജേന യുവതിയുടെ ഫോണ്‍ നമ്പറും ഇന്‍സ്റ്റാഗ്രാം വിവരങ്ങളും കൈക്കലാക്കിയ ഇയാള്‍, പിന്നീട് വീട്ടിലെത്തി യുവതിയെ ബലാത്സംഗം ചെയ്യുകയായിരുന്നു.



ലൈംഗിക അതിക്രമത്തിന് പുറമെ യുവതിയെ ശ്വാസം മുട്ടിക്കാന്‍ ശ്രമിച്ചതായും പരാതിയില്‍ പറയുന്നു. കുറ്റകൃത്യത്തിന് ശേഷം 'Hey I am sorry' എന്ന സന്ദേശം വാട്ട്സ്ആപ്പില്‍ അയച്ച ഇയാള്‍ തെളിവ് നശിപ്പിക്കാന്‍ യൂസര്‍ നെയിം മാറ്റുകയും 'ഡിസപ്പിയറിംഗ് ചാറ്റ്' സംവിധാനം ഓണ്‍ ചെയ്യുകയും ചെയ്തു.



പോലീസ് നടപടി

യുവതി പോലീസിനെ വിവരം അറിയിച്ചതോടെ മണിക്കൂറുകള്‍ക്കുള്ളില്‍ തന്നെ പ്രതിയെ പിടികൂടാനായി. ഭക്ഷണം എത്തിക്കാന്‍ ഉപയോഗിച്ച വാഹനം കേന്ദ്രീകരിച്ചുള്ള അന്വേഷണത്തിലാണ് ഇയാളെ കസ്റ്റഡിയിലെടുത്തത്.



ശിക്ഷ

ബലാത്സംഗത്തിന് മൂന്ന് വര്‍ഷവും എട്ട് മാസവും



മറ്റ് ലൈംഗിക അതിക്രമങ്ങള്‍ക്ക് 18 മാസവും

മൊത്തം അഞ്ച് വര്‍ഷവും രണ്ട് മാസവും തടവുശിക്ഷയാണ് വിധിച്ചത്.



യുവതി കാണിച്ച അസാമാന്യ ധൈര്യമാണ് പ്രതിയെ വേഗത്തില്‍ നിയമത്തിന് മുന്നില്‍ കൊണ്ടുവരാന്‍ സഹായിച്ചതെന്ന് ലിങ്കണ്‍ഷെയര്‍ പോലീസ് പ്രസ്താവനയില്‍ വ്യക്തമാക്കി.