ലണ്ടന്‍: യുകെയിലെ ഹൈസ്ട്രീറ്റുകള്‍ കേന്ദ്രീകരിച്ച് സംഘടിത മാഫിയ സംഘങ്ങളുടെ പ്രവര്‍ത്തനം വര്‍ധിച്ചുവരുന്നതായി റിപ്പോര്‍ട്ട്. ഹൈസ്ട്രീറ്റുകളില്‍ വ്യാപകമായി ഉയര്‍ന്നുവരുന്ന മിനിമാര്‍ട്ടുകളെയും വേപ്പ് ഷോപ്പുകളെയും ആസ്പദമാക്കിയാണ് സംഘങ്ങളുടെ പ്രവര്‍ത്തനം നടക്കുന്നത്. നിയമവിരുദ്ധമായി സിഗരറ്റുകളും വേപ്പുകളും വില്‍ക്കുന്ന മിനിമാര്‍ട്ടുകള്‍ക്കെതിരെ ട്രേഡിംഗ് സ്റ്റാന്‍ഡേര്‍ഡ് ഉദ്യോഗസ്ഥര്‍ ശക്തമായ പരിശോധന ആരംഭിച്ചതോടെയാണ് മാഫിയ സംഘങ്ങള്‍ ഉദ്യോഗസ്ഥര്‍ക്കെതിരെ തിരിഞ്ഞത്. ഈ സാഹചര്യത്തില്‍ ക്രൈം ഇന്‍വെസ്റ്റിഗേറ്ററായ മാന്‍ഡിക്ക് നേരെയുണ്ടായ ഭീഷണി വലിയ ചര്‍ച്ചയായിരിക്കുകയാണ്. മാന്‍ഡിയെ കൊല്ലുമെന്നും വീട് കത്തിക്കുമെന്നും ഭീഷണിപ്പെടുത്തിയ അര്‍ദ്ധരാത്രിയിലെ ഫോണ്‍ കോള്‍, ഒടുവില്‍ അവളെയും ഭര്‍ത്താവിനെയും താമസം മാറ്റാന്‍ നിര്‍ബന്ധിതരാക്കി. യുകെയിലുടനീളം മിനി-മാര്‍ട്ടുകളില്‍ നിയമവിരുദ്ധമായി സിഗരറ്റുകളും നൈട്രസ് ഓക്‌സൈഡ് കാനിസ്റ്ററുകളും വില്‍ക്കുന്ന ഒരു കുര്‍ദിഷ് ക്രൈം സംഘമാണ് ഈ ഭീഷണികള്‍ക്ക് പിന്നിലെന്നാണ് റിപ്പോര്‍ട്ട്.

സംഘാംഗങ്ങള്‍ കൂട്ടമായി മാന്‍ഡിയുടെ വീട്ടുമുന്നില്‍ എത്തുകയും, രണ്ടുതവണ വാഹനത്തെ ഇടിച്ചുതകര്‍ക്കാന്‍ ശ്രമിക്കുകയും ചെയ്തതായി പരാതിയുണ്ട്. പോലീസില്‍ പരാതി നല്‍കിയിട്ടുണ്ടെങ്കിലും മതിയായ തെളിവുകളുടെ അഭാവത്തില്‍ ഇതുവരെ ആരെയും പിടികൂടാനായിട്ടില്ല. അന്യായ വ്യാപാരം, നിയമവിരുദ്ധ ബിസിനസുകള്‍, ഉപഭോക്തൃ സംരക്ഷണ നിയമങ്ങള്‍ എന്നിവ പരിശോധിക്കുന്നതിനിടെ, ക്രിമിനല്‍ സംഘങ്ങളില്‍ നിന്ന് നേരിടേണ്ടിവരുന്ന ഭീഷണികളും അക്രമങ്ങളും സംബന്ധിച്ച് മാധ്യമങ്ങളോട് തുറന്നുപറഞ്ഞ 24 ട്രേഡിംഗ് സ്റ്റാന്‍ഡേര്‍ഡ് ഉദ്യോഗസ്ഥരില്‍ ഒരാളാണ് മാന്‍ഡി. Chartered Trading Standards Institute (CTSI)യുടെ റിപ്പോര്‍ട്ട് പ്രകാരം കഴിഞ്ഞ ഒരു ദശകത്തിനിടെ ഹൈസ്ട്രീറ്റുകളിലെ സംഘടിത കുറ്റകൃത്യങ്ങള്‍ ഗണ്യമായി വര്‍ധിച്ചിട്ടുണ്ട്. 2,000-ത്തിലധികം അംഗങ്ങളില്‍ നടത്തിയ സര്‍വേയില്‍, ഫ്രണ്ട്ലൈന്‍ ടീമുകളില്‍ 96 ശതമാനം ഉദ്യോഗസ്ഥര്‍ക്കും ഇത്തരം പ്രശ്‌നങ്ങള്‍ നേരിടേണ്ടിവരുന്നതായി കണ്ടെത്തി.

ഇംഗ്ലണ്ട്, വെയില്‍സ്, സ്‌കോട്ട്‌ലാന്‍ഡ്, പ്രത്യേകിച്ച് വടക്കന്‍ അയര്‍ലന്‍ഡ് എന്നിവിടങ്ങളിലെ തദ്ദേശ സ്വയംഭരണ സ്ഥാപനങ്ങളില്‍ ജോലി ചെയ്യുന്ന 70 ശതമാനത്തിലധികം ഉദ്യോഗസ്ഥര്‍ ഭീഷണിയുടെയോ അക്രമത്തിന്റെയോ അനുഭവം പങ്കുവച്ചിട്ടുണ്ട്. ചില പ്രദേശങ്ങളില്‍, മിനി-മാര്‍ട്ടുകളും വേപ്പ് ഷോപ്പുകളും പകുതിവരെ സംഘടിത കുറ്റകൃത്യങ്ങളുമായി ബന്ധപ്പെട്ടവയാണെന്നും, അമേരിക്കന്‍ കാന്‍ഡി ഷോപ്പുകളില്‍ മൂന്നിലൊന്ന് വരെ ഇത്തരം ബന്ധമുണ്ടെന്നും സര്‍വേ വ്യക്തമാക്കുന്നു.

വലിയ നഗരങ്ങള്‍ക്കൊപ്പം Great Yarmouth, Barry പോലുള്ള ചെറിയ പട്ടണങ്ങളിലേക്കും ഗ്രാമപ്രദേശങ്ങളിലേക്കും കുറ്റകൃത്യങ്ങളുടെ വ്യാപനം സംഭവിച്ചിട്ടുണ്ടെന്ന് ഡാറ്റ വ്യക്തമാക്കുന്നു. കുറ്റകൃത്യങ്ങള്‍ നിയന്ത്രിക്കുന്നതിനും നിയമവിരുദ്ധ വ്യാപാര സ്ഥാപനങ്ങള്‍ക്കെതിരെ ശക്തമായ നടപടി സ്വീകരിക്കുന്നതിനും പോലീസുമായി സഹകരിച്ച് കൂടുതല്‍ നടപടികള്‍ സ്വീകരിക്കാനുള്ള തയ്യാറെടുപ്പിലാണ് കൗണ്‍സില്‍ അധികൃതര്‍.