ലണ്ടന്‍: തൊഴില്‍, വിദ്യാഭ്യാസം, പരിശീലനം എന്നീ മേഖലകളില്‍ നിന്ന് യുവാക്കള്‍ വിട്ടുനില്‍ക്കുന്ന പ്രവണത യുകെയില്‍ ഗുരുതര പ്രതിസന്ധിയായി മാറിയിരിക്കുകയാണ്. മുന്‍ ലേബര്‍ മന്ത്രിയായ അലന്‍ മില്‍ബണ്‍ നേതൃത്വം നല്‍കിയ സര്‍ക്കാര്‍ പിന്തുണയുള്ള റിപ്പോര്‍ട്ടിലാണ് യുവജന തൊഴിലില്ലായ്മ രാജ്യത്തിന് വര്‍ഷംതോറും 125 ബില്യണ്‍ പൗണ്ടിലേറെ സാമ്പത്തിക നഷ്ടം ഉണ്ടാക്കുന്നതായി മുന്നറിയിപ്പ് നല്‍കിയത്. ഔദ്യോഗിക കണക്കുകള്‍ പ്രകാരം, യുകെയില്‍ 16 മുതല്‍ 24 വയസ്സ് വരെയുള്ള 10 ലക്ഷത്തിലധികം യുവാക്കള്‍ ഇപ്പോള്‍ തൊഴില്‍, വിദ്യാഭ്യാസം, പരിശീലനം എന്നിവയിലൊന്നിലും ഇല്ലാത്ത NEET വിഭാഗത്തില്‍പ്പെടുന്നു. 2026-ലെ ആദ്യ പാദത്തില്‍ ഈ എണ്ണം ഏകദേശം 10.12 ലക്ഷം ആയതായി റിപ്പോര്‍ട്ടുകള്‍ വ്യക്തമാക്കുന്നു. ഇത് 2013-ന് ശേഷമുള്ള ഏറ്റവും ഉയര്‍ന്ന നിരക്കാണ്. അടിയന്തര ഇടപെടലുകള്‍ ഇല്ലെങ്കില്‍ അടുത്ത അഞ്ച് വര്‍ഷത്തിനുള്ളില്‍ ഈ എണ്ണം 12.5 ലക്ഷമായി ഉയരാന്‍ സാധ്യതയുണ്ടെന്നാണ് മില്‍ബണ്‍ റിപ്പോര്‍ട്ട് മുന്നറിയിപ്പ് നല്‍കുന്നത്. ഇതോടെ യുകെ ഒരു ''നഷ്ടപ്പെട്ട തലമുറ''യെ സൃഷ്ടിക്കുന്ന സാഹചര്യമുണ്ടാകാമെന്നും റിപ്പോര്‍ട്ട് ചൂണ്ടിക്കാട്ടുന്നു.

പ്രധാനമന്ത്രി കീര്‍ സ്റ്റാര്‍മര്‍ സര്‍ക്കാരിന്റെ Youth Guarantee പദ്ധതിയിലൂടെ 18 മുതല്‍ 24 വയസ്സ് വരെയുള്ള യുവാക്കള്‍ക്ക് ജോലി, പരിശീലനം, തൊഴില്‍പരിചയം എന്നിവ ഉറപ്പാക്കാനാണ് ലക്ഷ്യം. തൊഴിലവസരങ്ങളിലേക്കും പരിശീലനത്തിലേക്കും യുവാക്കളെ തിരിച്ചുകൊണ്ടുവരുന്നതിനായി കൂടുതല്‍ നടപടികള്‍ ഉണ്ടാകുമെന്ന് ലേബര്‍ സര്‍ക്കാര്‍ വ്യക്തമാക്കിയിട്ടുണ്ട്. മില്‍ബണ്‍ റിപ്പോര്‍ട്ട് ക്ഷേമ സംവിധാനത്തെയും കടുത്തമായി വിമര്‍ശിക്കുന്നു. യുവാക്കള്‍ക്ക് സാമ്പത്തിക സഹായം നല്‍കുന്നതില്‍ മാത്രം സംവിധാനം ഒതുങ്ങരുതെന്നും, ജീവിതത്തിലേക്കും തൊഴില്‍ രംഗത്തിലേക്കും നയിക്കുന്ന വ്യക്തമായ പദ്ധതി നല്‍കണമെന്നും റിപ്പോര്‍ട്ട് പറയുന്നു. നിലവില്‍ ആനുകൂല്യങ്ങള്‍ ലഭിക്കുന്നവരില്‍ ചെറിയ വിഭാഗത്തിനാണ് ജോലിയിലേക്ക് തിരികെ വരാന്‍ മതിയായ സഹായം ലഭിക്കുന്നതെന്നും റിപ്പോര്‍ട്ട് ചൂണ്ടിക്കാട്ടുന്നു. യുവജന തൊഴിലില്ലായ്മ ഉയരാന്‍ നിരവധി കാരണങ്ങളാണ് ചൂണ്ടിക്കാട്ടപ്പെടുന്നത്. എന്‍ട്രി ലെവല്‍ തൊഴിലവസരങ്ങളുടെ കുറവ്, അപ്രന്റിസ്ഷിപ്പ് അവസരങ്ങളുടെ ഇടിവ്, മാനസികാരോഗ്യ പ്രശ്‌നങ്ങള്‍, വിദ്യാഭ്യാസത്തില്‍ നിന്നുള്ള വിട്ടുനില്‍പ്പ്, തൊഴിലുടമകള്‍ പുതിയ നിയമനങ്ങളില്‍ നിന്ന് പിന്‍വാങ്ങുന്നത് എന്നിവ പ്രധാന ഘടകങ്ങളാണ്. കഴിഞ്ഞ ദശാബ്ദത്തില്‍ അപ്രന്റിസ്ഷിപ്പ് ആരംഭിക്കുന്നവരുടെ എണ്ണം 35 ശതമാനം കുറഞ്ഞതായി റിപ്പോര്‍ട്ടില്‍ പറയുന്നു.

അതേസമയം, ലേബര്‍ സര്‍ക്കാരിന്റെ ചില ബജറ്റ് തീരുമാനങ്ങള്‍, നികുതി വര്‍ധനവ്, തൊഴിലുടമകളുടെ ചെലവ് കൂടിയത്, കുറഞ്ഞ വേതന വര്‍ധനവ് തുടങ്ങിയവ പുതിയ നിയമനങ്ങളെ ബാധിച്ചതായി വിമര്‍ശനവും ഉയരുന്നുണ്ട്. കുറഞ്ഞ മാര്‍ജിനില്‍ പ്രവര്‍ത്തിക്കുന്ന സ്ഥാപനങ്ങള്‍ പരിചയസമ്പത്ത് കുറഞ്ഞ യുവാക്കളെ നിയമിക്കാന്‍ മടിക്കുന്നതും പ്രതിസന്ധി രൂക്ഷമാക്കുന്നു. യുവാക്കള്‍ക്ക് ''ചെക്ക്'' മാത്രം നല്‍കുന്ന ക്ഷേമസംവിധാനം മതിയാകില്ലെന്നും, തൊഴില്‍ ജീവിതത്തിലേക്കുള്ള വ്യക്തമായ മാര്‍ഗരേഖയും പിന്തുണയും നല്‍കേണ്ടതുണ്ടെന്നും മില്‍ബണ്‍ റിപ്പോര്‍ട്ട് വ്യക്തമാക്കുന്നു. തൊഴില്‍, വിദ്യാഭ്യാസം, പരിശീലനം എന്നിവയില്‍ നിന്ന് യുവാക്കള്‍ വിട്ടുനില്‍ക്കുന്നത് വ്യക്തിപരമായ പ്രശ്‌നമല്ല, രാജ്യത്തിന്റെ സാമ്പത്തിക ഭാവിയെ തന്നെ ബാധിക്കുന്ന ദേശീയ പ്രതിസന്ധിയാണെന്നാണ് റിപ്പോര്‍ട്ടിന്റെ മുന്നറിയിപ്പ്.