ലണ്ടന്: ബ്രിട്ടനിലെ ഹാര്ട്ട്ലിപൂള് ബറോ കൗണ്സിലിന്റെ ഹെല്ത്ത് ആന്ഡ് വെല്ബീയിങ് ബോര്ഡ് ചെയര്മാനായി മലയാളി കൗണ്സിലര് ആരോണ് റോയിയെ നിയമിച്ചു. കൗണ്സിലിന്റെ വാര്ഷിക യോഗത്തില് പുതിയ കമ്മിറ്റികളിലേക്കും ബോര്ഡുകളിലേക്കുമുള്ള നിയമനങ്ങള് പ്രഖ്യാപിച്ചതിന്റെ ഭാഗമായാണ് ഇന്ഡിപെന്ഡന്റ് കൗണ്സിലറായ ആരോണ് റോയിക്ക് ഈ സുപ്രധാന പദവി ലഭിച്ചത്. ആരോഗ്യ, സാമൂഹിക ക്ഷേമ, പൊതുജനാരോഗ്യ മേഖലകളുമായി ബന്ധപ്പെട്ട പ്രാദേശിക നയപരമായ ഇടപെടലുകള്ക്ക് ദിശാബോധം നല്കുന്ന പ്രധാന ബോര്ഡാണ് ഹെല്ത്ത് ആന്ഡ് വെല്ബീയിങ് ബോര്ഡ്. എന്എച്ച്എസില് നഴ്സായും കെയര് ക്വാളിറ്റി കമ്മിഷന് റജിസ്റ്റേര്ഡ് മാനേജറായും പ്രവര്ത്തിച്ചിട്ടുള്ള ആരോണ് റോയിയുടെ ആരോഗ്യരംഗത്തെ പരിചയം ഈ പദവിക്ക് കൂടുതല് പ്രസക്തി നല്കുന്നു.
2024-ല് ഹാര്ട്ട് വാര്ഡില് നിന്ന് കൗണ്സിലറായി തിരഞ്ഞെടുക്കപ്പെട്ട ആരോണ് റോയ് നിലവില് ഇന്ഡിപെന്ഡന്റ് കൗണ്സിലറായാണ് പ്രവര്ത്തിക്കുന്നത്. പുതിയ നിയമനങ്ങളില് ഹെല്ത്ത് ആന്ഡ് വെല്ബീയിങ് ബോര്ഡിന്റെ ചെയര്മാന് പദവിക്ക് പുറമെ ഹൗസിങ്, ഗ്രോത്ത് ആന്ഡ് കമ്യൂണിറ്റീസ് കമ്മിറ്റിയുടെ വൈസ് ചെയര്മാന് സ്ഥാനവും അദ്ദേഹത്തിന് ലഭിച്ചതായി പ്രാദേശിക റിപ്പോര്ട്ടുകള് വ്യക്തമാക്കുന്നു. പ്രാദേശിക ഭരണരംഗത്ത് ആരോഗ്യം, ഭവനം, സാമൂഹിക വികസനം, കമ്യൂണിറ്റി ക്ഷേമം എന്നിവയുമായി ബന്ധപ്പെട്ട ഉത്തരവാദിത്തങ്ങള് ഒരുമിച്ച് ലഭിക്കുന്നതോടെ ഹാര്ട്ട്ലിപൂളിലെ ജനങ്ങളുടെ ജീവിതനിലവാരം മെച്ചപ്പെടുത്തുന്ന പ്രവര്ത്തനങ്ങളില് ആരോണ് റോയിക്ക് നിര്ണായക പങ്ക് വഹിക്കാനാകും. പാര്ട്ടി രാഷ്ട്രീയത്തിലെ മാറ്റങ്ങള്ക്കിടയിലും സ്വതന്ത്ര കൗണ്സിലറെന്ന നിലയില് ലഭിച്ച ഈ നിയമനങ്ങള് അദ്ദേഹത്തിന്റെ വ്യക്തിപരമായ ജനസ്വീകാര്യതയും ഭരണപരമായ പ്രാധാന്യവും അടിവരയിടുന്നു. ടീസൈഡ് ഇന്റര്നാഷനല് എയര്പോര്ട്ട് ഉള്പ്പെടെയുള്ള വിവിധ പൊതുമേഖലാ സ്ഥാപനങ്ങളിലും പ്രാദേശിക ഭരണ-സാമൂഹിക വേദികളിലും ആരോണ് റോയ് സജീവ സാന്നിധ്യമാണ്. എന്എച്ച്എസ് പശ്ചാത്തലത്തില് നിന്ന് പ്രാദേശിക ഭരണനേതൃത്വത്തിലേക്ക് ഉയര്ന്നുവരുന്ന അദ്ദേഹത്തിന്റെ നേട്ടം യുകെയിലെ മലയാളി സമൂഹത്തിനും അഭിമാനകരമായ അംഗീകാരമായി മാറുന്നു.
