പുതുവര്ഷത്തിന്റെ തുടക്കം മുതല് യുകെയില് കടുത്ത ആര്ട്ടിക് ഫ്രീസ് തുടരുകയാണ്. ഒരാഴ്ചയോളം നീളുന്ന ഈ തണുപ്പ് കാലാവസ്ഥയില് പകല് സമയത്തുപോലും താപനില പൂജ്യം സെല്ഷ്യസിന് മുകളില് നില്ക്കാന് ബുദ്ധിമുട്ടുമെന്ന് മെറ്റ് ഓഫീസ് മുന്നറിയിപ്പ് നല്കി.
ഇംഗ്ലണ്ട്, വെയില്സ്, സ്കോട്ട്ലണ്ട്, നോര്ത്തേണ് അയര്ലന്ഡ് എന്നിവിടങ്ങളില് വെള്ളിയാഴ്ചയും ശനിയാഴ്ചയും മഞ്ഞുവീഴ്ച ഉണ്ടാകുമെന്നാണ് പ്രവചനം. 2026-ന്റെ തുടക്കം തന്നെ കടുത്ത തണുപ്പോടെ ആരംഭിച്ച സാഹചര്യത്തില് ഇത് തുടരുകയാണ്.
ബുധനാഴ്ച രാത്രി അബെര്ഡീന്ഷയറില് താപനില -10 സെല്ഷ്യസ് വരെ താഴ്ന്നു. വടക്കന് മേഖലകളില് നിന്നുള്ള തണുത്തുറഞ്ഞ കാറ്റ് കൂടി ചേരുമ്പോള് തണുപ്പ് കൂടുതല് കടുപ്പമാകുകയാണ്. രാജ്യത്തിന്റെ ഭൂരിഭാഗം പ്രദേശങ്ങള്ക്കായി മെറ്റ് ഓഫീസ് മഞ്ഞിനും ഐസിനുമുള്ള മുന്നറിയിപ്പുകള് പുറപ്പെടുവിച്ചിട്ടുണ്ട്.
ശനിയാഴ്ച ഇംഗ്ലണ്ടിനൊപ്പം സ്കോട്ട്ലണ്ട്, നോര്ത്തേണ് അയര്ലന്ഡ് എന്നിവിടങ്ങളിലും മഞ്ഞ് മുന്നറിയിപ്പ് നല്കിയിട്ടുണ്ട്. ഈസ്റ്റ് മിഡ്ലാന്ഡ്സ്, യോര്ക്ക്ഷയര്, ഹംബര്, നോര്ത്ത് ഈസ്റ്റ് മേഖലകള് ഇതില് ഉള്പ്പെടും.
ഇന്വേര്നെസ്, മോറേ, അബെര്ഡീന്ഷയര് എന്നിവിടങ്ങളില് ശക്തമായ മഞ്ഞുവീഴ്ചയ്ക്കുള്ള ആംബര് മുന്നറിയിപ്പ് നിലവിലുണ്ട്. ഉയര്ന്ന പ്രദേശങ്ങളില് 40 സെന്റിമീറ്റര് വരെ മഞ്ഞ് പെയ്യാന് സാധ്യതയുള്ളതിനാല് വാഹനങ്ങള് മഞ്ഞില് കുടുങ്ങാന് സാധ്യത മുന്നറിയിപ്പില് വ്യക്തമാക്കുന്നു.
തണുപ്പ് കാലാവസ്ഥാ ഹെല്ത്ത് അലേര്ട്ട് ഇംഗ്ലണ്ടില് ആംബര് നിലയിലേക്ക് ഉയര്ത്തിയിരിക്കുകയാണ് യുകെ ഹെല്ത്ത് സെക്യൂരിറ്റി ഏജന്സി. ജനങ്ങള് ഏറ്റവും പുതിയ കാലാവസ്ഥാ പ്രവചനങ്ങളും മുന്നറിയിപ്പുകളും ശ്രദ്ധിച്ച് മുന്കൂറായി ഒരുങ്ങണമെന്ന് മെറ്റ് ഓഫീസ് ആവശ്യപ്പെട്ടിട്ടുണ്ട്.
