|
ലഡാക്ക് അതിര്ത്തിയിലെ ചൈനീസ് പ്രകോപനത്തിന് ശേഷം ഇന്ത്യ ചൈനീസ് ഉത്പന്നങ്ങളുടെ ഇറക്കുമതിയില് കര്ശന നിലപാട് സ്വീകരിച്ചു. ചൈനയില് നിന്നുള്ള ഇറക്കുമതികള്ക്ക് രാജ്യത്ത് അനുമതികള് വൈകുന്നു. രാജ്യത്തെ ഗുണനിലവാരം ഉറപ്പാക്കുന്ന ബിഐഎസ് പോലുള്ള ഏജന്സികളുടെ അനുമതിയാണ് ഷവോമി പോലുള്ള കമ്പനികള്ക്ക് വൈകുന്നത് എന്നാണ് വിവിധ കേന്ദ്രങ്ങളെ ഉദ്ധരിച്ച് റോയിട്ടേര്സ് റിപ്പോര്ട്ട് ചെയ്യുന്നത്.
ബ്യൂറോ ഓഫ് ഇന്ത്യന് സ്റ്റാന്റേര്ഡിന്റെ വിവിധ അനുമതികള് വൈകുന്നത് മൂലം ഇന്ത്യയില് പ്രവര്ത്തിക്കുന്ന ഷവോമി, ഓപ്പോ തുടങ്ങിയ കമ്പനികള്ക്ക് മൊബൈല് അനുബന്ധ ഉപകരണങ്ങള്, ടെലിവിഷന് എന്നിവ ആഴ്ചകളോളം വൈകിയെന്നാണ് റിപ്പോര്ട്ട്. എന്നാല് ഈ വിഷയത്തില് ബിഐഎസ് ഡയറക്ടര് പ്രമോദ് കുമാര് തിവാരിയോ, ചൈനീസ് വാണിജ്യ വിദേശകാര്യ മന്ത്രാലയങ്ങളോ പ്രതികരിക്കാന് തയ്യാറായില്ല എന്നാണ് റിപ്പോര്ട്ട്.
ഈ നിയന്ത്രണം ബാധിച്ചേന്ന് റോയിട്ടേര്സ് റിപ്പോര്ട്ടില് പറയുന്ന ഷവോമിയും, ഓപ്പോയും പ്രതികരണം നടത്തിയിട്ടില്ല. അതേ സമയം ചൈനീസ് ഉല്പ്പന്നങ്ങള്ക്ക് മേല് കൂടുതല് നിയന്ത്രണവുമായി കേന്ദ്രസര്ക്കാര്. കളിപ്പാട്ടങ്ങള്ക്കും ഗൃഹോപകരണങ്ങള്ക്കും ഇറക്കുമതിക്ക് ലൈസന്സ് നിര്ബന്ധമാക്കാന് കേന്ദ്ര സര്ക്കാര് നീക്കം തുടങ്ങിയിട്ടുണ്ട്. |
