|
തൃപ്പൂണിത്തുറ നിയമസഭാ മണ്ഡലത്തിലെ തെരഞ്ഞെടുപ്പ് റദ്ദാക്കണമെന്ന ഹര്ജി ഹൈക്കോടതി തള്ളി. കെ ബാബുവിന്റെ വിജയം റദ്ദാക്കണമെന്ന എതിര് സ്ഥാനാര്ത്ഥി എം സ്വരാജിന്റെ ഹര്ജിയാണ് ഹൈക്കോടതി തള്ളിയത്. മതചിഹ്നങ്ങള് ഉപയോഗിച്ച് ബാബു വോട്ടുപിടിച്ചെന്നായിരുന്നു സ്വരാജിന്റെ പരാതി. ജസ്റ്റിസ് പി ജി അജിത് കുമാറിന്റെ ബെഞ്ചാണ് വിധി പറഞ്ഞത്.
കഴിഞ്ഞ വര്ഷം മാര്ച്ചിലാണ് തൃപ്പൂണിത്തുറയില് കെ ബാബുവിന്റെ നിയമസഭ തെരഞ്ഞെടുപ്പ് വിജയത്തിനെതിരെ എതിര് സ്ഥാനാര്ത്ഥി എം സ്വരാജ് ഹൈക്കോടതിയില് ഹര്ജി നല്കിയത്.
ശബരിമല വിഷയത്തില് അയ്യപ്പന്റെ ചിത്രം വോട്ടേഴ്സ് സ്ലിപ്പില് ഉപയോഗിച്ചെന്ന് സ്വരാജ് ഹര്ജിയില് ചൂണ്ടിക്കാട്ടിയിരുന്നു. സംസ്ഥാനത്ത് എറ്റവും വാശിയേറിയ പോരാട്ടമായിരുന്നു കഴിഞ്ഞ നിയമസഭ തെരഞ്ഞെടുപ്പില് തൃപ്പൂണിത്തുറയില് നടന്നത്. എല്ഡിഎഫ് സ്ഥാനാര്ത്ഥിയായ എം സ്വരാജിനെതിരെ യുഡിഎഫ് സ്ഥാനാര്ത്ഥി കെ ബാബു 992 വോട്ടുകള്ക്കാണ് വിജയിച്ചത്. |
