|
നടിയെ ആക്രമിച്ച കേസില് ഒന്നാം പ്രതിയായ പള്സര് സുനിക്ക് വിചാരണ കോടതി ഉപാധികളോടെ ജാമ്യം അനുവദിച്ചു. സുപ്രീം കോടതി നിര്ദേശപ്രകാരം എറണാകുളം പ്രിന്സിപ്പല് സെഷന്സ് കോടതിയാണ് ജാമ്യം അനുവദിച്ചത്.
രണ്ടു പേരുടെ ആള്ജാമ്യം വേണം, ഒരു ലക്ഷംരൂപയുടെ ബോണ്ട് കെട്ടിവയ്ക്കണം എന്നിവയാണു ജാമ്യ വ്യവസ്ഥകള്. എല്ലാ തിങ്കളാഴ്ചയും പൊലീസ് സ്റ്റേഷനില് ഹാജരാകണം, കോടതിപരിധി വിട്ടുപോകരുത്, ഒരു ഫോണ് മാത്രമേ ഉപയോഗിക്കാന് പാടുള്ളൂ, ഒരു സിം മാത്രമേ ഉപയോഗിക്കാവൂ, മാധ്യമങ്ങളോട് സംസാരിക്കാന് പാടില്ല എന്നിങ്ങനെയാണ് മറ്റു വ്യവസ്ഥകള്.
പള്സര് സുനിയുടെ ജീവന് ഭീഷണിയുണ്ടെന്ന് അഭിഭാഷകന് കോടതിയില് ചൂണ്ടിക്കാട്ടി. തുടര്ന്ന് സുരക്ഷ നല്കാന് റൂറല് പൊലീസിനോട് കോടതി നിര്ദേശിച്ചു. ഇന്ന് വൈകിട്ടോടെ പള്സര് ജയില് മോചിതനാകുമെന്നാമ് വിവരം.
ജാമ്യവ്യവസ്ഥയില് എന്തൊക്കെ ഉള്പ്പെടുത്താമെന്ന് വിചാരണക്കോടതിക്ക് തീരുമാനിക്കാമെന്ന് സുപ്രീം കോടതി നേരത്തേ വ്യക്തമാക്കിയിരുന്നു. ഒരാഴ്ചയ്ക്കുള്ളില് ഇക്കാര്യം തീരുമാനിക്കണം എന്നായിരുന്നു സുപ്രീം കോടതിയുടെ നിര്ദേശം. തുടര്ന്ന് പള്സര് സുനിയുടെ അഭിഭാഷകന് സുപ്രീം കോടതി ഉത്തരവ് ഇന്നലെ വിചാരണ കോടതിയില് സമര്പ്പിച്ചു. |
