|
കൊല്ലം തേവലക്കരയില് വിദ്യാര്ത്ഥി സ്കൂളില് ഷോക്കേറ്റ് മരിച്ചു. തേവലക്കര ബോയ്സ് ഹൈസ്കൂളിലെ എട്ടാം ക്ലാസ് വിദ്യാര്ത്ഥി മിഥുന് (13) ആണ് മരിച്ചത്. സ്കൂളിലെ കെട്ടിടത്തിന് മുകളില് വീണ ചെരിപ്പെടുക്കാന് ശ്രമിക്കുമ്പോള് മിഥുന് ഷോക്കേല്ക്കുകയായിരുന്നുവെന്നാണ് വിവരം. വിളന്തറ സ്വദേശിയാണ് മിഥുന്.
രാവിലെ എട്ടരയോടെയാണ് സംഭവം. ക്ലാസ് ആരംഭിക്കുന്നത് 9 മണിക്കുശേഷമാണ്. അതിനു മുന്പായി കുട്ടികള് മൈതാനത്ത് കളിക്കുകയായിരുന്നു. ഇതിനിടെ ചെരുപ്പ് സൈക്കിള് ഷെഡിനു മുകളിലേക്ക് വീണു. ഇതെടുക്കാന് കയറിയപ്പോള് ഷോക്കേറ്റെന്നാണ് കൂടെയുള്ള കുട്ടികള് പറഞ്ഞത്.ഉടന് തന്നെ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. ഷെഡ്ഡിന് സമീപത്തുകൂടെ പോകുന്ന ലൈന് മാറ്റാന് നേരത്തെ തന്നെ കെഎസ്ഇബിക്ക് അപേക്ഷ കൊടുത്തിരുന്നെന്ന് സ്കൂള് മാനേജ്മെന്റ് അറിയിച്ചു. |
