ലണ്ടന്‍:: നോര്‍ത്തേണ്‍ അയര്‍ലന്‍ഡിലെ ബെല്‍ഫാസ്റ്റില്‍ താമസിക്കുന്ന മലയാളി നഴ്സ് അഞ്ജു രാജു, ബ്രിട്ടീഷ് അയല്‍ക്കാരിയായ ഗില്ലിയന്‍ ഗ്രഹാമിനെ അതീവ ദുഃഖകരമായ സാഹചര്യത്തില്‍ സഹായിച്ചതിന് ബിബിസിയുടെ 'മേക്ക് എ ഡിഫറന്‍സ്' അവാര്‍ഡിന് 'ഗുഡ് നൈബര്‍' വിഭാഗത്തില്‍ നാമനിര്‍ദ്ദേശം ലഭിച്ചു. ഇതാദ്യമായാണ് ഒരു മലയാളി ഈ വിഭാഗത്തില്‍ നാമനിര്‍ദ്ദേശം നേടുന്നത്.



അയല്‍ക്കാരിയുടെ ജീവിതം മാറ്റിയ പരിചരണം

അഞ്ജുവും ഗില്ലിയനും മൂന്ന് വര്‍ഷമായി ഒരേ ഭവന സമുച്ചയത്തില്‍ താമസിച്ചിരുന്നെങ്കിലും പരസ്പരം പരിചയമില്ലായിരുന്നു. എന്നാല്‍ കഴിഞ്ഞവര്‍ഷം ഗില്ലിയന്‍ ഗുരുതരമായ അസുഖം ബാധിച്ച് കിടപ്പിലായപ്പോള്‍ സഹായിക്കാന്‍ ആരുമില്ലാത്ത അവസ്ഥയിലായിരുന്നു. വയോധികയായ അമ്മയെ കെയര്‍ഹോമില്‍ പരിചരിക്കാനെത്തിയ ഗില്ലിയന്‍ പിന്നീട് താനുമൊരു രോഗിയാവുകയായിരുന്നു.

അഞ്ജു രാജു, അയല്‍ക്കാരിയുടെ അവസ്ഥ നിരീക്ഷിച്ച്, സ്വമേധയാ സഹായത്തിന് മുന്നോട്ട് വന്നു. ഭക്ഷണം, ഷോപ്പിങ്, ആശുപത്രി സന്ദര്‍ശനം, വീല്‍ചെയര്‍ സഹായം തുടങ്ങി ഗില്ലിയന്റെ എല്ലാ ആവശ്യങ്ങളും അഞ്ജു ഏറ്റെടുത്തു. ''അഞ്ജു എനിക്ക് ഒരു മാലാഖയെപ്പോലെയായിരുന്നു,'' എന്നാണ് ഗില്ലിയന്‍ അവാര്‍ഡിനായി നോമിനേറ്റ് ചെയ്യുമ്പോള്‍ പ്രതികരിച്ചത്.



സ്‌നേഹത്തിന്റെ പാചകവും സൗഹൃദത്തിന്റെ കറികളും

അഞ്ജു ഗില്ലിയന്‍ ഗ്രഹാമിനായി കേരളത്തിലെ നാടന്‍ വിഭവങ്ങള്‍ പാചകം ചെയ്ത് നല്‍കിയതും അവരുടെ സൗഹൃദം ആഴപ്പെടുത്തുന്നതില്‍ സഹായകമായി. ''ഇത് വെറും അയല്‍ക്കാരുടെ കഥയല്ല, പരസ്പരം സഹായിക്കുന്ന മനുഷ്യരുടെ കഥയാണ്,'' എന്നാണ് അഞ്ജുവിന്റെ പ്രതികരണം.



അഞ്ജുവിന്റെ ജീവിതവും സേവനവും

2022-ല്‍ യുകെയിലെത്തിയ അഞ്ജു രാജു, ബെല്‍ഫാസ്റ്റിലെ അള്‍സ്റ്റര്‍ ഹോസ്പിറ്റലില്‍ സൗത്ത് ഈസ്റ്റേണ്‍ എന്‍എച്ച്എസ് ട്രസ്റ്റിന്റെ കീഴിലാണ് ജോലി ചെയ്യുന്നത്. കണ്ണൂര്‍ പയ്യന്നൂര്‍ സ്വദേശിനിയായ അഞ്ജുവിന്റെ ഭര്‍ത്താവ് പത്തനംതിട്ട തിരുവല്ല സ്വദേശിയായ തോമസ് റെജി, മകന്‍ ഇഷാന്‍ തോമസ് റെജി പ്രൈമറി 4 വിദ്യാര്‍ഥിയാണ്.



അവാര്‍ഡ് പ്രഖ്യാപനം സെപ്റ്റംബര്‍ 26-ന്

BBC Make a Difference Awards 2025-ന്റെ വിജയികളെ സെപ്റ്റംബര്‍ 26-ന് പ്രഖ്യാപിക്കും. അഞ്ജുവിന്റെ നാമനിര്‍ദ്ദേശം, യഥാര്‍ത്ഥ പരിചരണത്തിന്റെ ശക്തിയും അയല്‍ക്കാരന്‍ എന്ന നിലയിലെ ഉത്തരവാദിത്വവും പ്രതിഫലിപ്പിക്കുന്നതായാണ് വിലയിരുത്തപ്പെടുന്നത്.