ലണ്ടന്‍/ന്യൂഡല്‍ഹി: സ്റ്റീല്‍ ഇറക്കുമതിയുമായി ബന്ധപ്പെട്ട് ബ്രിട്ടന്‍ കൊണ്ടുവരാനിരിക്കുന്ന പുതിയ നിയന്ത്രണങ്ങളില്‍ അയവില്ലെങ്കില്‍, സ്‌കോച്ച് വിസ്‌കി ഉള്‍പ്പെടെയുള്ള ബ്രിട്ടീഷ് ഉല്‍പ്പന്നങ്ങള്‍ക്ക് നല്‍കിയ തീരുവ ഇളവുകള്‍ ഇന്ത്യ പുനഃപരിശോധിച്ചേക്കുമെന്ന് റിപ്പോര്‍ട്ട്. ഇന്ത്യ-യുകെ സ്വതന്ത്ര വ്യാപാര കരാര്‍ നടപ്പിലാക്കാനുള്ള നീക്കങ്ങള്‍ പുരോഗമിക്കുന്നതിനിടെയാണ് പുതിയ തര്‍ക്കം ഉയര്‍ന്നിരിക്കുന്നത്. ഇന്ത്യ-യുകെ വ്യാപാര കരാര്‍ പ്രകാരം സ്‌കോച്ച് വിസ്‌കിയുടെ ഇറക്കുമതി തീരുവ 150 ശതമാനത്തില്‍ നിന്ന് ആദ്യം 75 ശതമാനമായും, പിന്നീട് പത്ത് വര്‍ഷത്തിനുള്ളില്‍ 40 ശതമാനമായും കുറയ്ക്കാനായിരുന്നു ഇന്ത്യ സമ്മതിച്ചിരുന്നത്. എന്നാല്‍ ബ്രിട്ടന്‍ സ്റ്റീല്‍ ഇറക്കുമതിക്ക് കര്‍ശന നിയന്ത്രണങ്ങള്‍ ഏര്‍പ്പെടുത്തിയാല്‍ ഈ ഇളവുകള്‍ പുനഃപരിശോധിക്കാമെന്നാണ് ഇന്ത്യന്‍ ഉദ്യോഗസ്ഥര്‍ സൂചിപ്പിക്കുന്നത്.

ബ്രിട്ടന്‍ ആഭ്യന്തര സ്റ്റീല്‍ വ്യവസായത്തെ സംരക്ഷിക്കുന്നതിനായി തീരുവയില്ലാത്ത സ്റ്റീല്‍ ഇറക്കുമതി ക്വോട്ട കുറയ്ക്കാനും, ക്വോട്ടയ്ക്ക് പുറത്തുള്ള ഇറക്കുമതിക്ക് ഉയര്‍ന്ന തീരുവ ഏര്‍പ്പെടുത്താനും നീങ്ങുകയാണ്. 2026 ജൂലൈ 1 മുതല്‍ പുതിയ നിയന്ത്രണങ്ങള്‍ വരുമെന്ന റിപ്പോര്‍ട്ടുകളും പുറത്തുവന്നിട്ടുണ്ട്. ചില റിപ്പോര്‍ട്ടുകള്‍ പ്രകാരം തീരുവയില്ലാത്ത ക്വോട്ടയില്‍ വന്‍ കുറവും ക്വോട്ടയ്ക്ക് പുറത്തുള്ള ഇറക്കുമതിക്ക് ഉയര്‍ന്ന നിരക്കും പരിഗണനയിലാണ്. ഇന്ത്യയുടെ നിലപാട് വ്യക്തമാണ്: സ്റ്റീല്‍ വിഷയത്തില്‍ പരിഹാരമില്ലെങ്കില്‍, വ്യാപാര കരാറില്‍ ബ്രിട്ടന് നല്‍കിയ ചില ആനുകൂല്യങ്ങള്‍ വീണ്ടും പരിശോധിക്കേണ്ടി വരും. ഇന്ത്യന്‍ സ്റ്റീല്‍ കയറ്റുമതിക്കാര്‍ക്ക് ബ്രിട്ടീഷ് വിപണിയിലേക്കുള്ള പ്രവേശനം പരിമിതപ്പെടുമെന്നതാണ് ന്യൂഡല്‍ഹിയുടെ പ്രധാന ആശങ്ക.

ഇതിനിടെ ബ്രിട്ടീഷ് വ്യാപാര സെക്രട്ടറി പീറ്റര്‍ കൈല്‍ ഇന്ത്യയിലെത്തി വാണിജ്യ മന്ത്രി പിയൂഷ് ഗോയലുമായി ചര്‍ച്ച നടത്തി. ഇന്ത്യ-യുകെ വ്യാപാര കരാര്‍ ഇരു രാജ്യങ്ങള്‍ക്കും വലിയ അവസരങ്ങള്‍ തുറന്നിടുമെന്ന് അദ്ദേഹം പറഞ്ഞു. അതേസമയം, സ്റ്റീല്‍ വിഷയം സ്വതന്ത്ര വ്യാപാര കരാറിന്റെ ഭാഗമല്ലെന്നാണ് ബ്രിട്ടീഷ് ഉദ്യോഗസ്ഥരുടെ നിലപാട്. കരാര്‍ വീണ്ടും തുറന്ന് ചര്‍ച്ച ചെയ്യാനുള്ള പദ്ധതി ഇല്ലെന്നും ബ്രിട്ടന്‍ വ്യക്തമാക്കിയിട്ടുണ്ട്. ഇന്ത്യ ഈ വിഷയത്തില്‍ ഇതിനകം ലോക വ്യാപാര സംഘടനയില്‍ ആശങ്ക രേഖപ്പെടുത്തിയിട്ടുണ്ട്. ഇന്ത്യയ്‌ക്കൊപ്പം ബ്രസീല്‍, തുര്‍ക്കി, ജപ്പാന്‍, ദക്ഷിണ കൊറിയ, സ്വിറ്റ്‌സര്‍ലന്‍ഡ്, ഓസ്‌ട്രേലിയ തുടങ്ങിയ രാജ്യങ്ങളും ബ്രിട്ടന്റെ സ്റ്റീല്‍ നിയന്ത്രണങ്ങളെക്കുറിച്ച് ആശങ്ക പ്രകടിപ്പിച്ചതായി റിപ്പോര്‍ട്ടുകളുണ്ട്. ഇന്ത്യയും ബ്രിട്ടനും തമ്മിലുള്ള വ്യാപാരം 2040 ഓടെ ഏകദേശം 25.5 ബില്യണ്‍ പൗണ്ട് വര്‍ധിപ്പിക്കുമെന്നാണ് കരാറിലൂടെ പ്രതീക്ഷിക്കുന്നത്. എന്നാല്‍ സ്റ്റീല്‍ വിഷയത്തില്‍ പരിഹാരം കാണാനാകാതെ പോയാല്‍, ഏറെ പ്രതീക്ഷയോടെ മുന്നോട്ട് കൊണ്ടുപോകുന്ന ഇന്ത്യ-യുകെ വ്യാപാര കരാറിന്റെ നടപ്പാക്കല്‍ കൂടുതല്‍ സങ്കീര്‍ണമാകാനാണ് സാധ്യത.