ലണ്ടന്‍: യുകെയിലെ ദേശീയ ആരോഗ്യ സേവനമായ എന്‍എച്ച്എസില്‍ യഹൂദരായ രോഗികളും ജീവനക്കാരും വ്യാപകമായ വിവേചനവും ഒറ്റപ്പെടുത്തലും നേരിടുന്നുവെന്ന് സര്‍ക്കാര്‍ നിയോഗിച്ച അന്വേഷണ റിപ്പോര്‍ട്ട്. സര്‍ക്കാരിന്റെ യഹൂദ വിരുദ്ധതാ ഉപദേഷ്ടാവായ ലോര്‍ഡ് ജോണ്‍ മാന്‍ തയ്യാറാക്കിയ റിപ്പോര്‍ട്ടിലാണ് എന്‍എച്ച്എസില്‍ അടിയന്തര പരിഷ്‌കാരങ്ങള്‍ വേണമെന്ന് ശുപാര്‍ശ ചെയ്തിരിക്കുന്നത്. റിപ്പോര്‍ട്ട് പ്രകാരം, ചില യഹൂദരായ രോഗികള്‍ ചികിത്സയ്‌ക്കെത്തുമ്പോള്‍ തങ്ങളുടെ മത-സാംസ്‌കാരിക തിരിച്ചറിയല്‍ മറച്ചുവയ്‌ക്കേണ്ടിവരുന്ന സാഹചര്യമുണ്ട്. ചിലര്‍ വിവേചനം ഭയന്ന് ചികിത്സ വൈകിപ്പിക്കുകയോ ആശുപത്രിയില്‍ പോകുന്നത് തന്നെ ഒഴിവാക്കുകയോ ചെയ്യുന്നുവെന്നും റിപ്പോര്‍ട്ട് ചൂണ്ടിക്കാട്ടുന്നു. യഹൂദരായ ജീവനക്കാര്‍ സഹപ്രവര്‍ത്തകരില്‍ നിന്ന് ഒറ്റപ്പെടുത്തലും അധിക്ഷേപവും നേരിടുന്നുവെന്നും ചിലര്‍ ജോലി ഉപേക്ഷിക്കുന്നതുവരെ ആലോചിക്കുന്നുണ്ടെന്നും റിപ്പോര്‍ട്ടില്‍ പറയുന്നു.

റിപ്പോര്‍ട്ടിന് പിന്നാലെ എന്‍എച്ച്എസ് നടപടികള്‍ ആരംഭിച്ചിട്ടുണ്ട്. ഡ്യൂട്ടിക്കിടെ ജീവനക്കാര്‍ യൂണിഫോമില്‍ രാഷ്ട്രീയ ചിഹ്നങ്ങള്‍, ബാഡ്ജുകള്‍, മുദ്രാവാക്യങ്ങള്‍ എന്നിവ പ്രദര്‍ശിപ്പിക്കുന്നതില്‍ നിയന്ത്രണം ഏര്‍പ്പെടുത്തണമെന്നാണ് പ്രധാന ശുപാര്‍ശ. പ്രോ-പാലസ്തീന്‍ ആയാലും പ്രോ-ഇസ്രായേല്‍ ആയാലും, ചികിത്സാ സാഹചര്യത്തില്‍ രാഷ്ട്രീയ സന്ദേശങ്ങള്‍ രോഗികളുടെ വിശ്വാസത്തെ ബാധിക്കാമെന്നാണ് ലോര്‍ഡ് മാന്‍ വ്യക്തമാക്കിയത്. എന്‍എച്ച്എസ് യൂണിഫോം ധരിച്ച് രാഷ്ട്രീയ പ്രതിഷേധങ്ങളില്‍ പങ്കെടുക്കുന്നതും ഒഴിവാക്കണമെന്ന് റിപ്പോര്‍ട്ട് നിര്‍ദേശിക്കുന്നു.

ഇംഗ്ലണ്ടിലെ 205 എന്‍എച്ച്എസ് ട്രസ്റ്റുകളിലെ ചെയര്‍മാന്‍മാര്‍ക്കും ചീഫ് എക്‌സിക്യൂട്ടീവുകള്‍ക്കും ആറുമാസത്തിനുള്ളില്‍ യഹൂദ വിരുദ്ധത ഉള്‍പ്പെടുന്ന ആന്റി-റേസിസം പരിശീലനം നിര്‍ബന്ധമാക്കും. നിലവിലുള്ള സമത്വം, വൈവിധ്യം, മനുഷ്യാവകാശ പരിശീലനങ്ങളിലും യഹൂദ വിരുദ്ധതയും മുസ്ലിം വിരുദ്ധതയും സംബന്ധിച്ച ഗുണനിലവാരമുള്ള ഉള്ളടക്കം ഉള്‍പ്പെടുത്തുമെന്നാണ് സര്‍ക്കാര്‍ നിലപാട്. റിപ്പോര്‍ട്ടില്‍ രണ്ട് ഡോക്ടര്‍മാരുടെ കേസുകളും പ്രത്യേകം പരാമര്‍ശിക്കപ്പെട്ടിട്ടുണ്ട്. മനോജ് സെന്‍, മുഹമ്മദ് ആസിഫ് മുനാഫ് എന്നിവര്‍ യഹൂദ വിരുദ്ധ പെരുമാറ്റത്തെ തുടര്‍ന്ന് മെഡിക്കല്‍ രജിസ്റ്ററില്‍ നിന്ന് നീക്കം ചെയ്യപ്പെടുകയും യുകെയില്‍ ചികിത്സ നടത്തുന്നതില്‍ നിന്ന് വിലക്കപ്പെടുകയും ചെയ്തതായി റിപ്പോര്‍ട്ടുകള്‍ പറയുന്നു. കൂടാതെ, റഹ്‌മെ അല്‍അദ്വാന്‍ എന്ന ഡോക്ടര്‍ ഹമാസിനെ പിന്തുണയ്ക്കാന്‍ ആഹ്വാനം ചെയ്തതും വംശീയ വിദ്വേഷം പ്രചരിപ്പിച്ചതുമായി ബന്ധപ്പെട്ട കുറ്റാരോപണങ്ങളില്‍ അടുത്ത വര്‍ഷം വിചാരണ നേരിടാനിരിക്കുകയാണ്.

2023 ഒക്ടോബര്‍ മുതല്‍ 2025 ഡിസംബര്‍ വരെ യുകെയിലെ ഡോക്ടര്‍മാരെ നിയന്ത്രിക്കുന്ന ജനറല്‍ മെഡിക്കല്‍ കൗണ്‍സിലിന് യഹൂദ വിരുദ്ധതയുമായി ബന്ധപ്പെട്ട് 779 പരാതികള്‍ ലഭിച്ചതായും, അതില്‍ 86 കേസുകള്‍ അന്വേഷിച്ചതായും റിപ്പോര്‍ട്ടുണ്ട്. ഇതില്‍ ചിലത് സോഷ്യല്‍ മീഡിയ പോസ്റ്റുകളുമായി ബന്ധപ്പെട്ടതായിരുന്നു. എന്‍എച്ച്എസ് എല്ലാവര്‍ക്കും ഒരുപോലെ സുരക്ഷിതവും രാഷ്ട്രീയ നിഷ്പക്ഷവുമായ ആരോഗ്യസേവനം നല്‍കേണ്ട സ്ഥാപനമാണെന്നും, രോഗികളോ ജീവനക്കാരോ മതപരമായ തിരിച്ചറിയല്‍ മറച്ചുവയ്‌ക്കേണ്ട സാഹചര്യം ഉണ്ടായാല്‍ അത് എന്‍എച്ച്എസിന്റെ അടിസ്ഥാന മൂല്യങ്ങള്‍ക്കേറ്റ വലിയ തിരിച്ചടിയാണെന്നും ലോര്‍ഡ് മാന്‍ റിപ്പോര്‍ട്ടില്‍ മുന്നറിയിപ്പ് നല്‍കുന്നു.