ലണ്ടന്‍: അനധികൃത കുടിയേറ്റം തടയുന്നതിനായി പുതിയ ഡിജിറ്റല്‍ ഐഡി പദ്ധതി അവതരിപ്പിച്ച് യുകെ സര്‍ക്കാര്‍. ബ്രിട്ടീഷ് പൗരന്മാരുടെയും തൊഴിലാളികളുടെയും തിരിച്ചറിയല്‍ വിവരങ്ങള്‍ ഇനി മൊബൈല്‍ ഫോണിലൂടെയും ഡിജിറ്റല്‍ രൂപത്തിലുമാകും ലഭ്യമാകുക. കയ്യില്‍ തിരിച്ചറിയല്‍ കാര്‍ഡ് കരുതേണ്ട ആവശ്യമില്ലെന്ന് അധികൃതര്‍ അറിയിച്ചു.
തൊഴിലാളികള്‍ക്ക് ഡിജിറ്റല്‍ ഐഡി നിര്‍ബന്ധമാക്കുമെന്ന് സര്‍ക്കാര്‍ വ്യക്തമാക്കിയിട്ടുണ്ട്. സൗജന്യമായി ലഭ്യമാകുന്ന ഐഡിയില്‍ പേര്, ജനനത്തീയതി, ഫോട്ടോ, ദേശീയത, വിലാസം തുടങ്ങിയ വിവരങ്ങള്‍ ഉള്‍പ്പെടും. ഡ്രൈവിംഗ് ലൈസന്‍സ്, ശിശു സംരക്ഷണം, നികുതി രേഖകള്‍ തുടങ്ങിയ സേവനങ്ങള്‍ക്കായി ഡിജിറ്റല്‍ ഐഡി ഉപയോഗം സുഗമമാക്കുമെന്നും സര്‍ക്കാര്‍ പ്രസ്താവനയില്‍ പറയുന്നു.
രണ്ടാം ലോകമഹായുദ്ധത്തിനുശേഷം തിരിച്ചറിയല്‍ കാര്‍ഡുകള്‍ യുകെയില്‍ നിര്‍ത്തലാക്കിയിരുന്നു. ഈ ആശയത്തെ യുകെ സര്‍ക്കാരുകള്‍ ഏറെക്കാലമായി എതിര്‍ത്തുവന്നിരുന്നു. എന്നാല്‍ അനധികൃത കുടിയേറ്റം തടയുന്നതില്‍ പ്രധാനമന്ത്രി കെയര്‍ സ്റ്റാര്‍മറിന്റെ നേതൃത്വത്തിലുള്ള ലേബര്‍ പാര്‍ട്ടിയുടെ നിലപാട് പരിഗണിച്ചാണ് പുതിയ പദ്ധതി നടപ്പാക്കുന്നത്.
ഡിജിറ്റല്‍ ഐഡി വഴി കുടിയേറ്റ നിയമലംഘനങ്ങള്‍ കണ്ടെത്താനും തടയാനും കഴിയുമെന്ന് സര്‍ക്കാര്‍ പ്രതീക്ഷിക്കുന്നു. സുരക്ഷയും സേവനപ്രവാഹവും മെച്ചപ്പെടുത്താന്‍ ഈ പദ്ധതി സഹായകരമാകുമെന്നാണ് വിലയിരുത്തല്‍.
