ലണ്ടന്/കേംബ്രിജ്: ''യുകെയിലും നെല്ല് വിളയും'' എന്ന ആശയം യാഥാര്ത്ഥ്യമാകുന്നു. കേംബ്രിജ്ഷെയറിന് സമീപമുള്ള ഈലി ഗ്രാമത്തിലാണ് പരിസ്ഥിതി ശാസ്ത്രജ്ഞയായ നദീന് മിറ്റ്ഷുനാസിന്റെ നേതൃത്വത്തില് യുകെയിലെ ആദ്യത്തെ നെല്കൃഷി പരീക്ഷണം വിജയകരമായി നടക്കുന്നത്.
റെക്കോര്ഡ് ചൂടുള്ള വേനലിനുശേഷം കൊളംബിയ, ജപ്പാന്, ഇറ്റലി തുടങ്ങിയ രാജ്യങ്ങളില് നിന്നുള്ള ഒന്പത് നെല്ലിനങ്ങളാണ് വെള്ളം കയറിയ നെല്പ്പാടങ്ങളില് തഴച്ച് വളരുന്നത്. പരീക്ഷണമായി തുടങ്ങിയ കൃഷി ഇപ്പോള് വിളവെടുപ്പിന് തയ്യാറാകുന്ന ഘട്ടത്തിലാണ്.
കാലാവസ്ഥാ വ്യതിയാനവും കൃഷിയുടെ സാധ്യതയും
യുകെയിലെ കാലാവസ്ഥാ വ്യതിയാനത്തെ അനുസരിച്ച് പുതിയ വിളകള് പരീക്ഷിക്കുന്നതിന്റെ ഭാഗമായാണ് ഈ സംരംഭം. സര്ക്കാര് പിന്തുണയോടെ നടക്കുന്ന ഈ പദ്ധതി വിജയിച്ചാല്, ഭാവിയില് നെല്ല് യുകെയിലെ പ്രധാന കൃഷിയായി മാറാന് സാധ്യതയുണ്ടെന്ന് നദീന് മിറ്റ്ഷുനാസി പറയുന്നു. കാലാവസ്ഥാ വ്യതിയാനത്തെ ചെറുക്കാനും ഭക്ഷ്യ സുരക്ഷ ഉറപ്പാക്കാനും നെല്കൃഷി സഹായിക്കുമെന്ന് അവര് കൂട്ടിച്ചേര്ത്തു.
നാടിന്റെ കൗതുകവും കരുതലും
മാധ്യമങ്ങള് വാര്ത്തയാക്കിയതോടെ നിരവധി ആളുകള് നെല്പ്പാടം കാണാന് എത്തുന്നുണ്ടെങ്കിലും അതിനുള്ള പ്രോത്സാഹനം നദീനും കൃഷിഭൂമിയുടെ ഉടമസ്ഥരും നല്കുന്നില്ല. ''ഞങ്ങള് പോലും പാടത്തേക്ക് കാലെടുത്തു വയ്ക്കുന്നത് ഏറെ സൂക്ഷ്മതയോടെയാണ്,'' എന്നത് നെല്ചെടികളോടുള്ള കരുതലിന്റെ തെളിവാണ്.
'തമാശ' എന്ന വിലയിരുത്തലില് നിന്ന് 'അദ്ഭുതം' വരെ
''നെല് കൃഷി ചെയ്യാന് പോകുന്നു'' എന്ന് പറഞ്ഞപ്പോള് പലരും തമാശയാക്കി. എന്നാല് ഇപ്പോള് നാല് പ്ലോട്ടുകളില് അഴകോടെയും ആരോഗ്യത്തോടെയും വളര്ന്ന നെല്ചെടികള് നാട്ടുകാരെ അദ്ഭുതപ്പെടുത്തുകയാണ്. ''ഇങ്ങനെയൊരു സ്ഥലത്ത് നെല് വളരും എന്ന് സ്വപ്നത്തില് പോലും കരുതിയില്ല,'' എന്നത് കൃഷിഭൂമിയുടെ ഉടമസ്ഥയായ സാറ ടെയ്ലറും ഭര്ത്താവ് ക്രെയ്ഗും പങ്കുവെച്ച അനുഭവമാണ്.
വിളവെടുപ്പിന് ഒരുങ്ങുന്നു
അടുത്ത മാസം വിളവെടുപ്പ് നടക്കാനാണ് ഒരുക്കം. കൊളംബിയയില് നിന്നുള്ള 'സ്ട്രെല്ല' എന്ന ഇനം നെല്വിത്തുകളാണ് മികച്ച രീതിയില് വളരുന്നത്. യുകെ സെന്റര് ഫോര് എക്കോളജി ആന്ഡ് ഹൈഡ്രോളജിയുമായുള്ള കരാറിലാണ് ഈലി ഗ്രാമത്തിലെ നെല്കൃഷി സംരംഭം നടക്കുന്നത്.
യുകെയിലെ ആദ്യ നെല്കര്ഷക ബഹുമതിക്ക് ഒരുങ്ങി
''യുകെയിലെ ആദ്യ നെല്കര്ഷക'' എന്ന ബഹുമതി സ്വന്തമാക്കാന് നദീന് മിറ്റ്ഷുനാസി തയ്യാറെടുക്കുകയാണ്. ''എല്ലാത്തിനും നന്ദി പറയേണ്ടത് യുകെയിലെ ഇപ്പോഴത്തെ മികച്ച കാലാവസ്ഥയോടാണ്,'' എന്നത് അവരുടെ ആത്മാര്ത്ഥ പ്രതികരണമാണ്.
