ലണ്ടന്‍: റോഡ് സുരക്ഷ ഉറപ്പാക്കുന്നതിനായി ബ്രിട്ടന്‍ സര്‍ക്കാര്‍ പുതിയ കര്‍ശന നിയമങ്ങള്‍ നടപ്പിലാക്കാന്‍ ഒരുങ്ങുന്നു. പുതിയ നിയമപ്രകാരം നിശ്ചിത വേഗപരിധിയെക്കാള്‍ 1 മൈല്‍ മാത്രം അധികമായി വാഹനമോടിച്ചാലും പിഴ ചുമത്താനാകും. ചെറിയ നിയമലംഘനങ്ങള്‍ക്കുപോലും കനത്ത പിഴ ഈടാക്കാനാണ് നീക്കം.
സ്പീഡ് ക്യാമറ നിരീക്ഷണത്തില്‍ വിട്ടുവീഴ്ച ഉണ്ടാകില്ലെന്നും, സീറോ ടോളറന്‍സ് നയമാണ് ഇനി പ്രാബല്യത്തില്‍ വരുന്നതെന്നും റിപ്പോര്‍ട്ടുകള്‍ വ്യക്തമാക്കുന്നു. നിലവില്‍ ചില പോലീസ് വിഭാഗങ്ങള്‍ 10% വരെ 'ലീ വേ' അനുവദിച്ചിരുന്നെങ്കിലും, ഇത് പൂര്‍ണമായും ഒഴിവാക്കാനാണ് തീരുമാനം. ഉദാഹരണമായി, 30 മൈല്‍ പരിധിയുള്ള പ്രദേശങ്ങളില്‍ 31 മൈല്‍ വേഗത്തില്‍ ഓടിച്ചാലും ഇനി പിഴ ചുമത്തും.
സ്‌കോട്ട്ലന്‍ഡ്, വെയില്‍സ് എന്നിവിടങ്ങളിലെ ചില മേഖലകളില്‍ ഈ നിയമം പരീക്ഷണാടിസ്ഥാനത്തില്‍ ഇതിനകം നടപ്പിലാക്കിയിട്ടുണ്ട്. എന്നാല്‍ ഡ്രൈവര്‍ അനുകൂല സംഘടനകള്‍ പുതിയ നിയമത്തിനെതിരെ രൂക്ഷമായി പ്രതികരിച്ചിരിക്കുകയാണ്.
മറ്റു രാജ്യങ്ങളുമായി താരതമ്യം ചെയ്യുമ്പോള്‍ യുകെയുടെ ഈ സമീപനം ഏറ്റവും കര്‍ശനമായതിലൊന്നാണ്. ജര്‍മനിയിലെ ചില ഭാഗങ്ങളില്‍ വേഗപരിധി തന്നെ ഇല്ല, ഫ്രാന്‍സിലും ഇറ്റലിയിലും 5 കിലോമീറ്റര്‍ വരെ ഇളവുണ്ട്. അമേരിക്കയിലെ മിക്ക സംസ്ഥാനങ്ങളില്‍ 3-5 മൈല്‍ വരെ ഇളവാണ് സാധാരണ. വേഗതയില്‍ 'അല്‍പം മാത്രം' എന്നത് പോലും അപകടസാധ്യത വര്‍ധിപ്പിക്കുന്നുവെന്നതാണ് ബ്രിട്ടീഷ് ട്രാഫിക് അതോറിറ്റികളുടെ നിലപാട്. ''വേഗം കുറയ്ക്കുക, ജീവിതം രക്ഷിക്കുക'' എന്ന സന്ദേശം തന്നെയാണ് പുതിയ നിയമത്തിന്റെ ലക്ഷ്യമെന്നും അധികൃതര്‍ വ്യക്തമാക്കി.
