പീറ്റര്‍ബറോ/അങ്കമാലി: മകനെയും കുടുംബത്തെയും സന്ദര്‍ശിക്കാന്‍ യുകെയിലെത്തിയ അങ്കമാലി സ്വദേശിനി കുഴഞ്ഞുവീണ് മരിച്ചു. എറണാകുളം അങ്കമാലി മഞ്ഞപ്ര തിരുതനത്തില്‍ വീട്ടില്‍ മേരി പൗലോസ് (75) ആണ് മരിച്ചത്. പരേതനായ പൗലോസിന്റെ ഭാര്യയാണ്.
പീറ്റര്‍ബറോയിലെ സ്പാള്‍ഡിങ്ങില്‍ കുടുംബമായി താമസിക്കുന്ന മകന്‍ ജിതിന്‍ പോളിനെ സന്ദര്‍ശിക്കാനാണ് മേരി സെപ്റ്റംബറില്‍ യുകെയിലെത്തിയത്. മകന്റെ ഗൃഹപ്രവേശന ചടങ്ങിലും പങ്കെടുത്തിരുന്നു.
കഴിഞ്ഞ ദിവസം വൈകിട്ട് നാലരയോടെയാണ് വീടിനുള്ളില്‍ മരിച്ച നിലയില്‍ കണ്ടെത്തിയത്. സ്‌കൂള്‍ കഴിഞ്ഞെത്തിയ കൊച്ചുമക്കള്‍ മേരിയെ നിലത്ത് വീണ നിലയില്‍ കണ്ടതിനെ തുടര്‍ന്ന് സമീപത്തുള്ള ബന്ധുക്കളും എത്തിയെങ്കിലും മരണം സ്ഥിരീകരിക്കുകയായിരുന്നു. ഹൃദയാഘാതമാണ് മരണകാരണമെന്നാണ് പ്രാഥമിക നിഗമനം.
ഫെബ്രുവരി 5ന് നാട്ടിലേക്ക് തിരികെ പോകാനിരിക്കെയാണ് അപ്രതീക്ഷിതമായ മരണം സംഭവിച്ചത്. മൃതദേഹം മോര്‍ച്ചറിയില്‍ സൂക്ഷിച്ചിരിക്കുകയാണ്. സംസ്‌കാര വിവരങ്ങള്‍ പിന്നീട് അറിയിക്കുമെന്ന് കുടുംബാംഗങ്ങള്‍ അറിയിച്ചു.
മക്കള്‍: ജിതിന്‍ പോള്‍ (പീറ്റര്‍ബറോ), ജിസ്മി (ചെമ്പന്നൂര്‍).
മരുമക്കള്‍: ലിന്‍സി (പീറ്റര്‍ബറോ), മാര്‍ട്ടിന്‍ (ചെമ്പന്നൂര്‍).
