തിരുവനന്തപുരം: യുകെയില്‍ ജോലി വാഗ്ദാനം ചെയ്ത് രണ്ട് മലയാളികളില്‍ നിന്ന് മൊത്തം 20 ലക്ഷം രൂപ തട്ടിയെടുത്ത കേസില്‍ മൂന്ന് പേരെതിരെ വട്ടപ്പാറയും മ്യൂസിയവും പൊലീസ് സ്റ്റേഷനുകളില്‍ കേസുകള്‍ രജിസ്റ്റര്‍ ചെയ്തു. പേയാട് സ്വദേശിനിയില്‍ നിന്ന് 16 ലക്ഷം രൂപയും വട്ടിയൂര്‍ക്കാവ് സ്വദേശിനിയില്‍ നിന്ന് 4 ലക്ഷം രൂപയുമാണ് പ്രതികള്‍ തട്ടിയെടുത്തത്.
വിദേശത്ത് ജോലി ചെയ്യുന്ന ശരത് രഘു, ബിനോയ് പോള്‍, ബിനോയ് പോളിന്റെ ഭാര്യ ടീന എന്നിവരാണ് കേസിലെ പ്രതികള്‍. ഫോണ്‍ വഴി ബന്ധപ്പെടുകയും ഗൂഗിള്‍ മീറ്റ് വഴി സംസാരിച്ച് വിശ്വാസം നേടിയ ശേഷമാണ് പണം കൈപ്പറ്റിയത്. തുക കൈമാറിയാല്‍ മാസങ്ങള്‍ക്കകം വിസ ലഭിക്കുമെന്നായിരുന്നു വാഗ്ദാനം.
എന്നാല്‍ പറഞ്ഞ സമയത്തിനുള്ളില്‍ ജോലി ലഭിക്കാതായതോടെ ഇരുവരും പണം തിരികെ ആവശ്യപ്പെട്ടു. ഇതോടെ പ്രതികള്‍ ഫോണ്‍ എടുക്കാതായതായും ബന്ധപ്പെടാനാകാതെ പോയതായും പൊലീസ് വ്യക്തമാക്കി.
