ലണ്ടന്‍: യുകെയിലെ ബിസിനസ് രംഗത്തെ മികച്ച സംഭാവനകള്‍ക്ക് മലയാളി യുവ വ്യവസായി ടിജോ ജോസഫ് ബ്രിട്ടീഷ് പാര്‍ലമെന്റില്‍ ആദരിക്കപ്പെട്ടു. ചരിത്രപ്രസിദ്ധമായ വെസ്റ്റ്മിനിസ്റ്റര്‍ ഹാളില്‍ നടന്ന ചടങ്ങില്‍ മുന്‍ യുകെ ബിസിനസ് മന്ത്രിയും നിലവിലെ Minister of State for Police and Crimes ആയ സാറാ ജോണ്‍സ് പുരസ്‌കാരം സമ്മാനിച്ചു.

- കഴിഞ്ഞ ഒരു പതിറ്റാണ്ടായി യുകെയിലെ ബിസിനസ് രംഗത്ത് സജീവമായ ടിജോയ്ക്ക് Outstanding Achiever in Multiple Industries Award ലഭിച്ചു.

- ഫിനാന്‍സ്, മോര്‍ഗേജ്, ഹെല്‍ത്ത് കെയര്‍, ടെക്‌നോളജി, പ്രോപ്പര്‍ട്ടി ഡെവലപ്മെന്റ്, ബ്യൂട്ടി & വെല്‍നസ് തുടങ്ങിയ മേഖലകളില്‍ അദ്ദേഹം വിജയകരമായ സംരംഭങ്ങള്‍ നടത്തുന്നു.

- ടിജോയുടെ നേതൃത്വത്തിലുള്ള ബഹുമുഖ ബിസിനസ് ശൃംഖല രാജ്യത്തുടനീളം തൊഴിലവസരങ്ങളും സാമൂഹിക സ്വാധീനവും സൃഷ്ടിച്ചിട്ടുണ്ടെന്ന് മഞ്ജു ഷാഹുല്‍ ഹമീദ് മെന്റല്‍ ഹെല്‍ത്ത് ഫൗണ്ടേഷന്‍ അഭിപ്രായപ്പെട്ടു.

ചടങ്ങില്‍ ബ്രിട്ടീഷ് എംപിമാരായ ബറോണെസ് മന്‍സില ഉദ്ദിന്‍, നടാഷാ അയേണ്‍സ്, ക്രോയ്ഡന്‍ മേയര്‍ റിച്ചാര്‍ഡ് ചാറ്റര്‍ജി, കൗണ്‍സിലര്‍ ഡോ. മഞ്ജു ഷാഹുല്‍ ഹമീദ്, ഇന്ത്യന്‍ ഹൈ കമ്മീഷന്‍ ഉദ്യോഗസ്ഥന്‍ ഷാഹിദ് ആലം, ബിബിസി വെല്‍ബീയിങ് മാനേജര്‍ മാര്‍വിന്‍ ഫ്രാന്‍സിസ് എന്നിവര്‍ പങ്കെടുത്തു.

വെയില്‍സിലെ ന്യൂപോര്‍ട്ടില്‍ കേന്ദ്രമായി പ്രവര്‍ത്തിക്കുന്ന ടിജോയ്ക്ക് യുകെയിലുടനീളം സ്ഥാപനങ്ങളുണ്ട്. കോട്ടയം അയര്‍ക്കുന്നം സ്വദേശിയായ അദ്ദേഹം ബിസിനസ്, നേതൃപാടവം, സാമൂഹിക പ്രതിബദ്ധത എന്നീ മേഖലകളില്‍ ദേശീയ-അന്തര്‍ദേശീയ പുരസ്‌കാരങ്ങള്‍ നേടിയിട്ടുണ്ട്.

ഈ വര്‍ഷം ആഗോളതലത്തില്‍ മികച്ച നേട്ടങ്ങള്‍ കൈവരിച്ച വ്യവസായികള്‍ക്ക് നല്‍കുന്ന Global Indian Business Forum Excellence in Multi-Industry Awardയും ടിജോയ്ക്ക് ലഭിച്ചു.