ബര്‍മിംഗ്ഹാമിലെ ക്വിന്റണില്‍ നിന്നുള്ള ഡോ. നാഥനിയല്‍ സ്‌പെന്‍സര്‍ (38) രോഗികളെ ലൈംഗികമായി പീഡിപ്പിച്ചെന്ന കേസില്‍ കുറ്റം ചുമത്തി . 2017 മുതല്‍ 2021 വരെ സ്റ്റോക്ക്-ഓണ്‍-ട്രെന്റിലും ഡഡ്ലിയിലും ചികിത്സയില്‍ ഉണ്ടായിരുന്ന 38 പേരെ ഇയാള്‍ പീഡിപ്പിച്ചെന്നാണ് സ്റ്റാഫോര്‍ഡ്ഷയര്‍ പൊലീസ് കണ്ടെത്തിയത് . ഇതില്‍ 13 വയസിന് താഴെയുള്ള കുട്ടികളോട് നടന്ന ഒമ്പത് അതിക്രമങ്ങളും ഉള്‍പ്പെടുന്നുണ്ട് .

റോയല്‍ സ്റ്റോക്ക് യൂണിവേഴ്‌സിറ്റി ആശുപത്രിയിലും ഡഡ്ലിയുടെ റസല്‍സ് ഹാള്‍ ആശുപത്രിയിലുമാണ് ഇത്തരം സംഭവങ്ങള്‍ നടന്നതെന്നാണ് പുറത്തുവരുന്ന വിവരങ്ങള്‍ സൂചിപ്പിക്കുന്നത് . മൂന്ന് കുട്ടികള്‍ക്കെതിരായ ശാരീരിക അതിക്രമവും ഇയാള്‍ക്കെതിരെ ചുമത്തിയിട്ടുണ്ട്. പ്രതി 2026 ജനുവരി 20-ന് നോര്‍ത്ത് സ്റ്റാഫോര്‍ഡ്ഷയര്‍ ജസ്റ്റിസ് സെന്ററില്‍ ഹാജരാകണം. അന്വേഷണം തുടരുന്നതിനാല്‍ സ്‌പെന്‍സറെ മെഡിക്കല്‍ സേവനത്തില്‍ നിന്ന് സസ്പെന്‍ഡ് ചെയ്തിട്ടുണ്ട്.

അതിക്രമത്തിനിരയായ റസല്‍സ് ഹാള്‍ ആശുപത്രിയിലെ രോഗികള്‍ക്കായി പ്രത്യേക ഹെല്‍പ്ലൈന്‍ തയ്യാറാക്കിയതായി ഡഡ്ലി ഗ്രൂപ്പ് എന്‍എച്ച്എസ് ഫൗണ്ടേഷന്‍ ട്രസ്റ്റ് അറിയിച്ചു. ഈ സംഭവം രോഗികള്‍ക്കും ജീവനക്കാര്‍ക്കും സമൂഹത്തിനും ആശങ്കയുണ്ടാക്കുന്നതാണെന്ന് മെഡിക്കല്‍ ഡയറക്ടര്‍ ഡോ. പോള്‍ ഹഡ്സണ്‍ പറഞ്ഞു. അന്വേഷണത്തില്‍ ട്രസ്റ്റ് പൊലീസുമായി സഹകരിച്ചു വരുന്നതായും അദ്ദേഹം അറിയിച്ചു.