കാര്ഡിഫ്: വിദേശത്ത് നിന്ന് എത്തിയ കെയര് തൊഴിലാളികളെ ചൂഷണത്തില് നിന്ന് സംരക്ഷിക്കുന്നതിനായി വെയില്സില് ആദ്യമായി കാര്ഡിഫ് സിറ്റി കൗണ്സില് 'മൈഗ്രന്റ് കെയര് വര്ക്കേഴ്സ് ചാര്ട്ടര്' ഔദ്യോഗികമായി അംഗീകരിച്ചു. യുണിസണുമായി സഹകരിച്ച് രൂപപ്പെടുത്തിയ ഈ ചാര്ട്ടര്, കെയര് മേഖലയില് നിലനില്ക്കുന്ന അനീതികള് അവസാനിപ്പിക്കുകയും തൊഴില് നിലവാരം ഉയര്ത്തുകയും ചെയ്യുന്നതാണ് ലക്ഷ്യം.
- ഹോം നേഴ്സിങ്ങിലും റെസിഡന്ഷ്യല് കെയറിലും ജീവനക്കാരുടെ കുറവ് പരിഹരിക്കാന് കൗണ്സില് നൂറുകണക്കിന് വിദേശ തൊഴിലാളികളെ ആശ്രയിക്കുന്നു.
- വിസാ സ്പോണ്സര്ഷിപ്പുമായി ബന്ധപ്പെട്ട ചൂഷണം, ഭീഷണി, അന്യായ തൊഴില് നിബന്ധനകള് എന്നിവയ്ക്കെതിരെ ശക്തമായ നടപടിയായാണ് ചാര്ട്ടറിനെ കൗണ്സില് കാണുന്നത്.
- കരാര് നല്കുന്ന കെയര് സ്ഥാപനങ്ങള് സുതാര്യവും നൈതികവുമായ നിയമന നടപടികള് പാലിക്കണം.
- കുറഞ്ഞത് റിയല് ലിവിംഗ് വേജ് ശമ്പളം നല്കണം.
- യാത്രാസമയം, കാത്തിരിപ്പ് സമയം, നിര്ബന്ധ പരിശീലനം എന്നിവയ്ക്കും ശമ്പളം ഉറപ്പാക്കണം.
- അനധികൃത റിക്രൂട്ട്മെന്റ് ഫീസ് പോലുള്ള ചൂഷണങ്ങള് കര്ശനമായി നിരോധിച്ചിട്ടുണ്ട്.
ചാര്ട്ടര് പാലിക്കപ്പെടുന്നുണ്ടോയെന്ന് കൗണ്സില് നിരീക്ഷിക്കും. വിസ റദ്ദാക്കല് ഭീഷണിയിലൂടെയോ നാടുകടത്തല് ഭീഷണിയിലൂടെയോ തൊഴിലാളികളെ പീഡിപ്പിക്കുന്ന സംഭവങ്ങളില് കര്ശന നടപടി സ്വീകരിക്കുമെന്നും അറിയിച്ചു.
സ്ഥിരതയുള്ള ജോലി സമയം, സുരക്ഷിത തൊഴില് അന്തരീക്ഷം, പരാതികള് രഹസ്യമായി അറിയിക്കാനുള്ള സംവിധാനം, ട്രേഡ് യൂണിയനുകളുമായി സഹകരണം എന്നിവയും ചാര്ട്ടറിന്റെ ഭാഗമാണ്. ഇത് വെയില്സിലെ കെയര് മേഖലയ്ക്ക് പുതിയ മാനദണ്ഡമാകുമെന്ന് കാര്ഡിഫ് കൗണ്സില് നേതൃത്വം വ്യക്തമാക്കി.
യുകെയിലെ കെയര് മേഖലയിലെ ജോലി ചെയ്യുന്ന മലയാളികള്ക്ക് ഈ തീരുമാനം പ്രത്യേക പ്രാധാന്യമുള്ളതാണ്. മറ്റിടങ്ങളിലും ഇത് നടപ്പായാല് വിദേശ കെയര് തൊഴിലാളികള്ക്ക്, പ്രത്യേകിച്ച് മലയാളികള്ക്ക്, കൂടുതല് സുരക്ഷയും മാന്യതയും ഉറപ്പാക്കാനാകും
