അശ്ലീല ഉള്ളടക്കം സംപ്രേഷണം ചെയ്യുന്ന അഞ്ച് ഒടിടി പ്ലാറ്റ്ഫോമുകള്‍ കേന്ദ്ര വാര്‍ത്താവിതരണ മന്ത്രാലയം നിരോധിച്ചു. ഫെബ്രുവരി 24-നാണ് മന്ത്രാലയം ഇത് സംബന്ധിച്ച ഉത്തരവിറക്കിയത്. മൂഡ്എക്‌സ് വിഐപി, കോയല്‍ പ്ലേപ്രോ, ഡിജിമൂവി പ്ലക്‌സ്, ഫീല്‍, ജുഗ്നു എന്നീ പ്ലാറ്റ്ഫോമുകളെയാണ് സര്‍ക്കാര്‍ ബ്ലോക്ക് ചെയ്തത്.
നിശ്ചിത നടപടിക്രമങ്ങള്‍ പാലിച്ചാണ് ഈ പ്ലാറ്റ്ഫോമുകള്‍ക്കെതിരെ നടപടി സ്വീകരിച്ചതെന്ന് മന്ത്രാലയം അറിയിച്ചു. 2021-ലെ ഇന്‍ഫര്‍മേഷന്‍ ടെക്‌നോളജി നിയമങ്ങള്‍ക്കും അശ്ലീലതയ്ക്കെതിരായ നിയമങ്ങള്‍ക്കും വിധേയമായി ഈ പ്ലാറ്റ്ഫോമുകളിലേക്കുള്ള ആക്‌സസ് തടയാന്‍ ഇന്റര്‍നെറ്റ് സേവന ദാതാക്കള്‍ക്ക് സര്‍ക്കാര്‍ നിര്‍ദ്ദേശം നല്‍കി. പൊതു മര്യാദ നിലനിര്‍ത്തുന്നതിനും ഡിജിറ്റല്‍ പ്ലാറ്റ്ഫോമുകളില്‍ ധാര്‍മ്മികമായ രീതികള്‍ ഉറപ്പാക്കുന്നതിനുമാണ് ഈ നടപടി.
2000-ലെ ഇന്‍ഫര്‍മേഷന്‍ ടെക്‌നോളജി ആക്ടിലെ സെക്ഷന്‍ 69A പ്രകാരം സര്‍ക്കാരിന് ലഭിച്ചിട്ടുള്ള പ്രത്യേക അധികാരം ഉപയോഗിച്ചാണ് ഈ പ്ലാറ്റ്ഫോമുകള്‍ ബ്ലോക്ക് ചെയ്തത്. രാജ്യതാല്‍പ്പര്യത്തിനും സാമൂഹികമായ അന്തസ്സിനും വിരുദ്ധമായി പ്രവര്‍ത്തിക്കുന്ന ഓണ്‍ലൈന്‍ ഉള്ളടക്കങ്ങള്‍ തടയാന്‍ ഈ നിയമം സര്‍ക്കാരിനെ അനുവദിക്കുന്നു.