ലണ്ടന്‍: മൂന്ന് വര്‍ഷത്തിനിടെ ആദ്യമായി പലിശനിരക്ക് ഉയര്‍ത്തി ബാങ്ക് ഓഫ് ഇംഗ്ലണ്ട്. അടിസ്ഥാന പലിശനിരക്ക് 3.75 ശതമാനത്തില്‍നിന്ന് നാല് ശതമാനമായാണ് വര്‍ധിപ്പിച്ചത്. ഇറാന്‍ യുദ്ധത്തെത്തുടര്‍ന്നുള്ള പണപ്പെരുപ്പ സമ്മര്‍ദം തുടരുകയാണെങ്കില്‍ വീണ്ടും നിരക്ക് ഉയര്‍ത്തേണ്ടിവരുമെന്ന് ബാങ്ക് ഗവര്‍ണര്‍ ആന്‍ഡ്രൂ ബെയ്ലി മുന്നറിയിപ്പ് നല്‍കി. മോണിറ്ററി പോളിസി കമ്മിറ്റിയിലെ എട്ട് അംഗങ്ങള്‍ നിരക്ക് വര്‍ധനയെ പിന്തുണച്ചു. മധ്യപൂര്‍വദേശത്തെ സംഘര്‍ഷവും ഹോര്‍മുസ് കടലിടുക്ക് തുറക്കുന്നതില്‍ ധാരണയിലെത്താത്തതും എണ്ണവില ബാരലിന് 100 ഡോളറിനു മുകളിലേക്ക് ഉയരാന്‍ കാരണമായി. ഊര്‍ജവിലയിലെ വര്‍ധന ബ്രിട്ടനിലെ പണപ്പെരുപ്പ സമ്മര്‍ദവും ശക്തമാക്കുകയാണ്.

അടുത്ത വര്‍ഷം മധ്യത്തോടെ രാജ്യത്തെ പണപ്പെരുപ്പം 4.9 ശതമാനത്തിലെത്തുമെന്നാണ് ബാങ്കിന്റെ വിലയിരുത്തല്‍. സെപ്റ്റംബറില്‍ ഇത് 3.5 ശതമാനമായിരുന്നു. ബജറ്റ് അവതരിപ്പിച്ച് ഒരാഴ്ച പിന്നിടുമ്പോഴുള്ള പലിശവര്‍ധന മോര്‍ട്ട്ഗേജ് വായ്പയെടുത്ത കുടുംബങ്ങളുടെ തിരിച്ചടവുചെലവ് സംബന്ധിച്ച ആശങ്ക വര്‍ധിപ്പിക്കുന്നു. ഇറാന്‍ സംഘര്‍ഷത്തിന്റെ തുടര്‍ഗതിയും പണപ്പെരുപ്പ സമ്മര്‍ദത്തിലെ മാറ്റങ്ങളും അടുത്ത തീരുമാനത്തില്‍ നിര്‍ണായകമാകുമെന്ന് ബെയ്ലി വ്യക്തമാക്കി. വിലക്കയറ്റത്തിന് കാരണമാകുന്ന ഘടകങ്ങളില്‍ അയവുണ്ടായില്ലെങ്കില്‍ കൂടുതല്‍ പലിശവര്‍ധന ആവശ്യമായി വരുമെന്നും അദ്ദേഹം സൂചിപ്പിച്ചു. ഡിസംബര്‍ 17നാണ് ബാങ്കിന്റെ അടുത്ത പലിശനിരക്ക് തീരുമാനം. ക്രിസ്മസിന് മുമ്പ് മറ്റൊരു വര്‍ധനയ്ക്കുള്ള സാധ്യതയാണ് ഇതോടെ ഉയരുന്നത്.