ലണ്ടന്‍/ദുബായ്: പശ്ചിമേഷ്യയില്‍ സംഘര്‍ഷം രൂക്ഷമായ സാഹചര്യത്തില്‍ ഗള്‍ഫ് മേഖലയില്‍ കുടുങ്ങിക്കിടക്കുന്ന പൗരന്മാരെ സുരക്ഷിതമായി നാട്ടിലെത്തിക്കാനുള്ള ദൗത്യവുമായി ബ്രിട്ടന്‍ രംഗത്തിറങ്ങി. രണ്ടാം ലോകമഹായുദ്ധത്തിനു ശേഷം ബ്രിട്ടന്‍ നടത്തുന്ന ഏറ്റവും വലിയ രക്ഷാദൗത്യമായിരിക്കും ഇതെന്ന് നയതന്ത്ര വിദഗ്ധര്‍ വിലയിരുത്തുന്നു.

യുഎഇ ഉള്‍പ്പെടെയുള്ള ഗള്‍ഫ് രാജ്യങ്ങളില്‍ നിന്നുള്ള 94,000-ലധികം ബ്രിട്ടിഷ് പൗരന്മാരാണ് നാട്ടിലേക്ക് മടങ്ങാന്‍ വിദേശകാര്യ മന്ത്രാലയത്തില്‍ രജിസ്റ്റര്‍ ചെയ്തിരിക്കുന്നത്. സംഘര്‍ഷത്തെ തുടര്‍ന്ന് വ്യോമപാതകള്‍ തുറക്കാന്‍ വൈകുകയാണെങ്കില്‍, കുടുങ്ങിക്കിടക്കുന്നവരെ ബസ്സുകളില്‍ സൗദി അറേബ്യയില്‍ എത്തിച്ച് അവിടെ നിന്ന് പ്രത്യേക വിമാനങ്ങളില്‍ യുകെയിലേക്ക് കൊണ്ടുപോകാനാണ് സര്‍ക്കാര്‍ ശ്രമം. ഇതിനിടെ ലണ്ടന്‍ ഹീത്രോയില്‍ നിന്ന് പശ്ചിമേഷ്യയിലേക്കുള്ള പകുതിയോളം വിമാനങ്ങള്‍ റദ്ദാക്കിയിട്ടുണ്ട്. ഗാറ്റ്വിക്, മാഞ്ചസ്റ്റര്‍ വിമാനത്താവളങ്ങളെയും ഇത് ബാധിച്ചു.

യാത്രാ നിര്‍ദ്ദേശങ്ങള്‍

ബ്രിട്ടന്‍ ഭരണകൂടം പൗരന്മാര്‍ക്കായി കര്‍ശനമായ യാത്രാ നിര്‍ദ്ദേശങ്ങള്‍ പുറപ്പെടുവിച്ചിട്ടുണ്ട്:

- ഇറാന്‍, ഇസ്രയേല്‍, പലസ്തീന്‍ എന്നിവിടങ്ങളിലേക്ക് പൂര്‍ണമായും യാത്ര ഒഴിവാക്കുക.

- യുഎഇ, ഖത്തര്‍, കുവൈത്ത്, ബഹ്റൈന്‍ രാജ്യങ്ങളിലേക്ക് അത്യാവശ്യമല്ലാത്ത യാത്രകള്‍ ഒഴിവാക്കുക.

- സൗദി അറേബ്യയില്‍ ഉള്ളവര്‍ വീടുകള്‍ക്കുള്ളില്‍ തന്നെ തുടരുക.

- ജോര്‍ദാന്‍, ഒമാന്‍, ലബനന്‍, ഇറാഖ് എന്നിവിടങ്ങളില്‍ ഉള്ളവര്‍ ജാഗ്രത പാലിക്കുകയും ഔദ്യോഗിക വിവരങ്ങള്‍ ശ്രദ്ധിക്കുകയും ചെയ്യുക.

മുന്‍കാല രക്ഷാദൗത്യങ്ങള്‍

2021-ല്‍ താലിബാന്‍ അഫ്ഗാനിസ്ഥാന്‍ പിടിച്ചടക്കിയപ്പോള്‍ നടത്തിയ ഓപ്പറേഷന്‍ പിറ്റിങ്ങി വഴി 15,000 പേരെ ബ്രിട്ടന്‍ ഒഴിപ്പിച്ചിരുന്നു. കഴിഞ്ഞ വര്‍ഷം ഇസ്രയേലും ഇറാനും തമ്മിലുണ്ടായ മിസൈല്‍ ആക്രമണങ്ങളില്‍ 5,000-ഓളം പേരെ ഒഴിപ്പിച്ചിരുന്നെങ്കിലും, ഇപ്പോഴത്തെ പശ്ചിമേഷ്യന്‍ സംഘര്‍ഷം ഉടന്‍ അവസാനിക്കാനിടയില്ലാത്തതിനാല്‍ രക്ഷാദൗത്യം കൂടുതല്‍ സങ്കീര്‍ണ്ണമാകുമെന്നാണ് വിലയിരുത്തല്‍.

സര്‍ക്കാര്‍ നടപടികള്‍

വിദേശകാര്യ സെക്രട്ടറി വൈവെറ്റ് കൂപ്പര്‍ മേഖലയിലെ എല്ലാ അംബാസഡര്‍മാരുമായും ചര്‍ച്ചകള്‍ നടത്തി വരികയാണ്. സൗദി അറേബ്യ വഴി പൗരന്മാരെ ഒഴിപ്പിക്കുന്നതിനുള്ള സാങ്കേതിക അനുമതികള്‍ക്കായി ചര്‍ച്ചകള്‍ പുരോഗമിക്കുന്നു. നിലവില്‍ പശ്ചിമേഷ്യന്‍ രാജ്യങ്ങളില്‍ കുടുങ്ങിക്കിടക്കുന്ന ബ്രിട്ടിഷ് പൗരന്മാര്‍ ഫോറിന്‍ ഓഫിസിന്റെ ഓണ്‍ലൈന്‍ പോര്‍ട്ടലില്‍ സ്ഥലവും ബന്ധപ്പെടാനുള്ള വിവരങ്ങളും അടിയന്തരമായി അപ്ഡേറ്റ് ചെയ്യണമെന്ന് ഓഫിസ് അറിയിച്ചു