മുംബൈ: ഇന്ത്യയോടുള്ള തന്റെ അഗാധമായ സ്നേഹം തുറന്നുപറഞ്ഞ് വികാരാധീനനായി പ്രമുഖ യുകെ ട്രാവല് വ്ലോഗര് ഡേവ് ഫ്ലൂ. ഓരോ തവണയും ഇന്ത്യ സന്ദര്ശിച്ച് മടങ്ങുമ്പോള് ഇവിടെ ലഭിച്ച സുഹൃത്തുക്കളോടും അനുഭവങ്ങളോടും വിട പറയുന്നത് തനിക്ക് അതീവ വേദനാജനകമാണെന്ന് അദ്ദേഹം പറഞ്ഞു. മുംബൈയില് നിന്ന് യാത്ര തിരിക്കുന്നതിന് തൊട്ടുമുമ്പ് റെക്കോര്ഡ് ചെയ്ത വീഡിയോയിലാണ് ഡേവ് തന്റെ വികാരങ്ങള് പങ്കുവെച്ചത്. മുംബൈയിലെ സാക്കി നാക്കയിലെ തെരുവുകളിലൂടെ നടക്കുന്നതിനിടെയാണ് ഡേവ് ക്യാമറയ്ക്ക് മുന്നില് വികാരാധീനനായത്. വര്ഷങ്ങളായി തന്റെ ഹൃദയത്തോട് ചേര്ത്തുവെച്ച രാജ്യമാണ് ഇന്ത്യയെന്നും, ലോകത്തിലെ മറ്റൊരു രാജ്യത്തോടും തനിക്ക് ഇത്രയും ആഴത്തിലുള്ള സ്നേഹം തോന്നിയിട്ടില്ലെന്നും അദ്ദേഹം പറഞ്ഞു.
''ഓരോ തവണയും എന്റെ നെഞ്ച് തകരുന്നു. ജീവിതം അതിന്റെ വഴിക്ക് മുന്നോട്ട് പോകേണ്ടതുണ്ടെന്ന് എനിക്കറിയാം. എങ്കിലും ഇവിടെ നിന്ന് മടങ്ങിപ്പോകുന്നത് ഓരോ തവണയും എന്റെ ഹൃദയം തകര്ക്കുന്ന കാര്യമാണ്,'' ഡേവ് ഫ്ലൂ വീഡിയോയില് പറഞ്ഞു. ഇന്ത്യയില് നിന്നുള്ള യാത്ര താല്ക്കാലികമാണെന്നും താന് വീണ്ടും മടങ്ങിവരുമെന്നും ഉറപ്പുനല്കിയ അദ്ദേഹം ''ജയ് ഹിന്ദ്'' എന്ന് വിളിച്ചുകൊണ്ടാണ് വീഡിയോ അവസാനിപ്പിച്ചത്. യാത്ര പറഞ്ഞു മടങ്ങുകയാണെങ്കിലും തന്റെ ഇന്ത്യയാത്രാ വീഡിയോകള് തുടര്ന്നും പ്രേക്ഷകരിലേക്ക് എത്തിക്കുമെന്നും അദ്ദേഹം ഫോളോവേഴ്സിനെ അറിയിച്ചു. ഡേവ് ഫ്ലൂവിന്റെ വീഡിയോ സോഷ്യല് മീഡിയയില് ഇതിനകം ശ്രദ്ധ നേടിയിട്ടുണ്ട്. അദ്ദേഹത്തിന്റെ വികാരങ്ങളെ പൂര്ണ്ണമായി ഉള്ക്കൊണ്ട് നിരവധി ഇന്ത്യന് ആരാധകരാണ് സ്നേഹപൂര്വ്വമായ കമന്റുകളുമായി എത്തിയത്. ''നിങ്ങള് മടങ്ങിവരുമ്പോള് ഇരുകൈയും നീട്ടി സ്വീകരിക്കാന് ഞങ്ങള് ഇവിടെത്തന്നെയുണ്ടാകും,'' എന്ന് ഒരു ഇന്സ്റ്റഗ്രാം ഉപയോക്താവ് കുറിച്ചു. ഇത് ഒരു ശാശ്വതമായ വിടപറച്ചിലല്ലെന്നും താല്ക്കാലികമായൊരു യാത്രയയപ്പ് മാത്രമാണെന്നും, ഡേവ് ഉടന് തന്നെ ഇന്ത്യയിലേക്ക് മടങ്ങിവരുമെന്നും നിരവധി പേര് പ്രത്യാശ പ്രകടിപ്പിച്ചു. ഇന്ത്യയോടുള്ള ഒരു വിദേശിയുടെ ആത്മാര്ത്ഥമായ സ്നേഹപ്രകടനം എന്ന നിലയിലാണ് ഈ വീഡിയോ സമൂഹമാധ്യമങ്ങളില് വ്യാപകമായി ചര്ച്ചയാകുന്നത്.
