|
അഭിഷേക് നാമ തന്റെ വരാനിരിക്കുന്ന സംവിധാന സംരംഭമായ 'നാഗബന്ധം - ദി സീക്രട്ട് ട്രഷര്‍' എന്ന ചിത്രത്തിലൂടെ ഒരു ദൃശ്യവിസ്മയം പ്രേക്ഷകര്‍ക്കായി അണിയിച്ചൊരുക്കുകയാണ്. ഈ പാന്‍-ഇന്ത്യന്‍ ചിത്രം ജൂലൈ 3-ന് ലോകമെമ്പാടും വലിയ രീതിയില്‍ റിലീസ് ചെയ്യാന്‍ ഔദ്യോഗികമായി ഒരുങ്ങുകയാണ്. ഇന്ത്യന്‍ സിനിമയ്ക്ക് തന്നെ സവിശേഷമായ ഒരു കഥാപശ്ചാത്തലവും, ഉയര്‍ന്ന ദൃശ്യഭംഗിയും സമ്മാനിച്ച ചിത്രത്തിലെ ടീസറും പാട്ടുകളും ഇതിനകം തരംഗം സൃഷ്ടിച്ചുകഴിഞ്ഞു.
സോഷ്യല്‍ മീഡിയയില്‍ വന്‍ ശ്രദ്ധ നേടിയ ചിത്രത്തിന്റെ പുതിയ പോസ്റ്റര്‍, ഭാവനയും യാഥാര്‍ത്ഥ്യവും ഒത്തുചേരുന്ന ഒരു ബ്രഹ്‌മാണ്ഡ സോഷ്യോ-ഫാന്റസി അഡ്വഞ്ചര്‍ ചിത്രമായിരിക്കും ഇതെന്ന് ഉറപ്പുനല്‍കുന്നു. ഈ ഇതിഹാസ ചിത്രം തിയേറ്ററുകളില്‍ കാണാന്‍ പ്രേക്ഷകര്‍ക്ക് ഇനി അധികകാലം കാത്തിരിക്കേണ്ടി വരില്ല.
നായകന്റെ തീക്ഷ്ണമായ നോട്ടം പകര്‍ത്തിയിരിക്കുന്ന പോസ്റ്ററില്‍ പുരാതന കാലത്തെ സന്ന്യാസിമാര്‍, ക്രോധാവിഷ്ടനായ ഒരു സര്‍പ്പം, ആഞ്ഞടിക്കുന്ന കടല്‍ത്തീരങ്ങള്‍ തുടങ്ങിയ കൗതുകമുണര്‍ത്തുന്നതും ആകാംക്ഷ നിറയ്ക്കുന്നതുമായ നിരവധി ഘടകങ്ങള്‍ ഉള്‍ക്കൊള്ളിച്ചിരിക്കുന്നു. ഈ ആകര്‍ഷകമായ പോസ്റ്റര്‍ നിലവില്‍ ആന്ധ്രാപ്രദേശിലെയും തെലങ്കാനയിലെയും എല്ലാ തിയേറ്ററുകളിലും വലിയ സ്റ്റാന്‍ഡികളായി സ്ഥാപിച്ചുകഴിഞ്ഞു.
വിരാട് കര്‍ണ്ണ നായകനാകുന്ന ചിത്രത്തില്‍ നഭ നടേഷ്, ഐശ്വര്യ മേനോന്‍ എന്നിവരാണ് നായികമാരായി എത്തുന്നത്. ജഗപതി ബാബു, മഹേഷ് മഞ്ജരേക്കര്‍, മുരളി ശര്‍മ്മ, ജയപ്രകാശ്, അനസൂയ ഭരദ്വാജ്, ശരണ്യ പൊന്‍വണ്ണന്‍, രാമചന്ദ്ര രാജു, ഋഷഭ് സാഹ്നി തുടങ്ങിയ ശക്തരായ അഭിനേതാക്കളുടെ ഒരു വലിയ നിര തന്നെ ചിത്രത്തിലുണ്ട്.
അഭിഷേക് നാമ ചിത്രത്തിനായി ഒരു ഇതിഹാസ ദൃശ്യപ്രപഞ്ചം തന്നെ സൃഷ്ടിച്ചിരിക്കുകയാണ്. നിര്‍മ്മാതാക്കളായ കിഷോര്‍ അന്നപൂറെഡ്ഡിയും നിഷിത നാഗി റെഡ്ഡിയും അദ്ദേഹത്തിന് പിന്തുണ നല്‍കിയിട്ടുണ്ട്. അഭിഷേക് പിക്‌ചേഴ്‌സുമായി സഹകരിച്ച് നിക് സ്റ്റുഡിയോസിന്റെ ബാനറില്‍ കിഷോര്‍ അന്നപുറെഡ്ഡിയും നിഷിത നാഗി റെഡ്ഡിയും ചേര്‍ന്ന് നിര്‍മ്മിക്കുന്ന ഈ ചിത്രം, വമ്പിച്ച നിര്‍മ്മാണച്ചെലവിലും ലോകോത്തര സാങ്കേതിക നിലവാരത്തിലും ഒരു യഥാര്‍ത്ഥ പാന്‍-ഇന്ത്യന്‍ ദൃശ്യവിസ്മയമായാണ് ഒരുങ്ങുന്നത്. പുരാണ പശ്ചാത്തലമുള്ള ഈ ചിത്രം തിയേറ്ററുകളില്‍ ഒരു ഉഗ്രന്‍ ദൃശ്യാനുഭവം സമ്മാനിക്കും എന്ന കാര്യത്തില്‍ സംശയമില്ല. |
