ആലപ്പുഴ: പുറക്കാട് പഞ്ചായത്തിലെ മണക്കല്‍ പാടശേഖരത്തില്‍ എയിംസ് സ്ഥാപിക്കണമെന്ന നിര്‍ദേശവുമായി അമ്പലപ്പുഴ എംഎല്‍എ ജി. സുധാകരന്‍. ഒക്ടോബര്‍ 29ന് നിയമസഭയില്‍ ഉന്നയിച്ച നിര്‍ദേശം ഗൗരവമായി പരിഗണിക്കാമെന്ന് ആരോഗ്യമന്ത്രി കെ. മുരളീധരന്‍ മറുപടി നല്‍കി. സ്ഥലത്തിന്റെ സാധ്യതകള്‍ പരിശോധിച്ച് റിപ്പോര്‍ട്ട് സമര്‍പ്പിക്കാന്‍ ജില്ലാ കളക്ടറോട് ആവശ്യപ്പെടാമെന്നും മന്ത്രി അറിയിച്ചു. പദ്ധതിക്ക് അന്തിമ തീരുമാനമായിട്ടില്ല.

പുറക്കാട് പഞ്ചായത്തിലെ മൂന്ന് വാര്‍ഡുകളിലായി വ്യാപിച്ചുകിടക്കുന്ന പ്രദേശത്ത് 660.9 ഏക്കര്‍ ഭൂമിയുണ്ടെന്നാണ് നിയമസഭയില്‍ അവതരിപ്പിച്ച കണക്ക്. ഇതില്‍ 500 ഏക്കറിലധികം സര്‍ക്കാര്‍ ഏറ്റെടുത്തിട്ടുള്ളതാണ്. ദേശീയപാത 66ല്‍നിന്ന് ഏകദേശം ഒന്നര കിലോമീറ്റര്‍ മാത്രം അകലെയാണെന്നതും ജനവാസം താരതമ്യേന കുറവാണെന്നതും നിര്‍ദേശത്തിന് അനുകൂല ഘടകങ്ങളായി ചൂണ്ടിക്കാട്ടുന്നു.

1991ല്‍ വനവല്‍ക്കരണത്തിനായാണ് നെല്‍കൃഷിയുണ്ടായിരുന്ന ഭൂമി സര്‍ക്കാര്‍ ഏറ്റെടുത്തത്. പദ്ധതി പ്രതീക്ഷിച്ച രീതിയില്‍ മുന്നോട്ടുപോയില്ല. പിന്നീട് വി.എസ്. അച്യുതാനന്ദന്‍ സര്‍ക്കാരിന്റെ കാലത്ത് ഐടി പാര്‍ക്കിനായി നാലരക്കോടി രൂപ ചെലവഴിച്ച് നൂറേക്കറോളം ഭൂമി മണ്ണിട്ട് ഉയര്‍ത്തിയെങ്കിലും കേന്ദ്ര പരിസ്ഥിതി അനുമതി ലഭിക്കാത്തത് തടസ്സമായി. കാര്‍ഷിക ഗവേഷണ കേന്ദ്രം, ഇക്കോ ടൂറിസം തുടങ്ങിയ നിര്‍ദേശങ്ങളും യാഥാര്‍ഥ്യമായില്ല. നവംബര്‍ മൂന്നിന് ചേര്‍ന്ന ജില്ലാ വികസന സമിതി യോഗത്തിലും എയിംസ് നിര്‍ദേശം ചര്‍ച്ചയായി. സംസ്ഥാനത്തെ മറ്റ് സ്ഥലങ്ങള്‍ക്കൊപ്പം മണക്കല്‍ പാടശേഖരത്തിന്റെ സാധ്യതയും പരിശോധിക്കണമെന്നാണ് ആവശ്യം. മൂന്നര പതിറ്റാണ്ടായി വിവിധ പദ്ധതികള്‍ക്കായി കാത്തിരിക്കുന്ന പ്രദേശത്തിന് പുതിയ നിര്‍ദേശം പ്രതീക്ഷ നല്‍കുകയാണ്.