|
സംസ്ഥാനത്ത് പുതുക്കിയ മദ്യ നയത്തിന് മന്ത്രിസഭ അംഗീകാരം നല്കി. പുതിയ നയം പ്രാബല്യത്തില് വരുന്നതോടെ സംസ്ഥാനത്തെ ഐ ടി പാര്ക്കുകളില് ബാര് റസ്റ്റോറന്റുകള് തുറക്കാം. ഇതിനുള്ള ഐ ടി സെക്രട്ടറിയുടെ റിപ്പോര്ട്ടാണ് സര്ക്കാര് അം?ഗീകരിച്ചത്. പഴ വര്ഗങ്ങളില് നിന്ന് വീര്യം കുറഞ്ഞ മദ്യം ഉത്പാദിപ്പിക്കാന് കര്ഷകര്ക്ക് അനുമതി നല്കും. ഡ്രൈ ഡേ ഒഴിവാക്കിയിട്ടില്ല.
സംസ്ഥാനത്ത് മദ്യശാലകളിലെ നീണ്ട ക്യൂ ഒഴിവാക്കും. എല്ലായിടത്തും പ്രീമിയം കൗണ്ടറുകള് തുടങ്ങും. ഉപഭോക്താക്കള്ക്കെത്തി ആവശ്യമായ മദ്യം തെരഞ്ഞെടുക്കാന് സംവിധാനം ഒരുക്കും. വാക്ക് ഇന് സംവിധാനത്തിന് പ്രാധാന്യം നല്കും.
സംസ്ഥാനത്തെ ഐ ടി പാര്ലറുകളില് വൈന് പാര്ലറുകള് തുടങ്ങുമെന്ന് മുഖ്യമന്ത്രി പിണറായി വിജയന് നിയമസഭയില് പ്രഖ്യാപിച്ചിരുന്നു. ഐ ടി പാര്ക്കുകളില് പ്രവര്ത്തിക്കുന്ന വിവിധ കമ്പനി പ്രതിനിധികള് തയാറാക്കുന്ന റിപ്പോര്ട്ടില് പബ്ബ് പോലുള്ള സൗകര്യങ്ങളില്ലാത്തത് പ്രധാന പോരായ്മയായി ചൂണ്ടിക്കാട്ടുന്നുണ്ട്. ഇതിന്റെ അടിസ്ഥാനത്തിലാണ് വൈന് പാര്ലറുകള് തുടങ്ങാന് തീരുമാനിച്ചതെന്നും മുഖ്യമന്ത്രി അന്ന് വ്യക്തമാക്കിയിരുന്നു.
''യുവതയാണല്ലോ വിവിധ ഐടി പാര്ക്കുകളില് പ്രധാനമായും ജോലി ചെയ്യുന്നത്. അവര് മറ്റ് സംസ്ഥാനങ്ങളിലെ ഐ ടി പാര്ക്കുകളില് ലഭ്യമായ സൗകര്യങ്ങള് ഇവിടെയും കിട്ടണമെന്ന് ആഗ്രഹിക്കും. മറ്റ് ഐ ടി കേന്ദ്രങ്ങളിലെ സൗകര്യങ്ങളില്ല ഇവിടെ എന്നത് പോരായ്മയാണ്. കമ്പനികള് സ്വന്തമായി ഇത്തരം കേന്ദ്രങ്ങളിലേക്ക് ജോലി ചെയ്യുന്നവര്ക്ക് പോകാന് സൗകര്യം ചെയ്ത് കൊടുക്കുന്നത് മാത്രമേയുള്ളൂ.'' ഐ ടി പാര്ക്കുകളില് പ്രവര്ത്തിക്കുന്ന വിവിധ കമ്പനി പ്രതിനിധികള് തയ്യാറാക്കുന്ന റിപ്പോര്ട്ടില് പബ്ബ് പോലുള്ള സൗകര്യങ്ങളില്ല എന്നാണ് അന്ന് മുഖ്യമന്ത്രി നിയമസഭയില് പറഞ്ഞത്
സംസ്ഥാനത്താകെ ഒന്നര ലക്ഷം ഐ ടി ജീവനക്കാരാണുള്ളത്. തിരുവനന്തപുരം ടെക്നോപാര്ക്കില് മാത്രം ജോലി ചെയ്യുന്നത് 60,000 പേരാണ്. ടെക്നോ പാര്ക്ക്, ഇന്ഫോ പാര്ക്ക്, സൈബര് പാര്ക്ക് എന്നിവിടങ്ങളിലായി ഇത്രയധികം പേര് ജോലി ചെയ്യുന്നുണ്ടെന്നിരിക്കേ, ഇവര്ക്ക് വിശ്രമ സമയങ്ങളും ഇടവേളകളും ചെലവഴിക്കാന് ഇത്തരം കേന്ദ്രങ്ങള് തുറക്കുന്നത് കൂടുതല് ടെക്കികളെ കേരളത്തിലെ ഐ ടി പാര്ക്കുകളിലേക്ക് ആകര്ഷിക്കുമെന്നാണ് കണക്ക് കൂട്ടല്. |
