ലണ്ടന്: അമേരിക്കന് പ്രസിഡന്റ് ഡോണള്ഡ് ട്രംപിന്റെ പ്രസംഗങ്ങള് തെറ്റായി എഡിറ്റ് ചെയ്ത് സംപ്രേക്ഷണം ചെയ്തതിനെ തുടര്ന്ന് ബിബിസി ചരിത്രത്തിലെ ഏറ്റവും വലിയ പ്രതിസന്ധിയിലേക്ക്. വിവാദം പനോരമ ഡോക്യുമെന്ററിയെ ചുറ്റിപ്പറ്റിയാണ്. ജനുവരി 6-ന് ട്രംപ് നടത്തിയ പ്രസംഗം വ്യത്യസ്ത ദൃശ്യങ്ങളായി എഡിറ്റ് ചെയ്ത് സംപ്രേക്ഷണം ചെയ്തതിലൂടെ പ്രേക്ഷകരെ തെറ്റിദ്ധരിപ്പിച്ചുവെന്ന് ആരോപണം ഉയര്ന്നതോടെയാണ് വിവാദം പൊട്ടിപ്പുറപ്പെട്ടത്.
ബിബിസി ചെയര്പേഴ്സണ് സമീര് ഷാ പാര്ലമെന്ററി ഉപസമിതിക്കു മുന്നില് എല്ലാ കുറ്റങ്ങളും ഏറ്റുപറഞ്ഞ് മാപ്പ് പറഞ്ഞെങ്കിലും, പ്രശ്നം അതിനാല് അവസാനിച്ചില്ല. ഡോക്യുമെന്ററി നവംബര് 14-നകം പിന്വലിക്കണമെന്നും ശരിയായ പതിപ്പ് സംപ്രേക്ഷണം ചെയ്യണമെന്നും, തെറ്റിനായി മാപ്പ് പറയണമെന്നും, ഒരു ബില്യണ് ഡോളര് (ഏകദേശം ?8,300 കോടി) നഷ്ടപരിഹാരമായി നല്കണമെന്നും ട്രംപ് ആവശ്യപ്പെട്ടു. നിയമനടപടികളിലേക്ക് കടക്കുമെന്ന് ട്രംപ് മുന്നറിയിപ്പ് നല്കിയതോടെയാണ് പ്രശ്നം കൂടുതല് ഗൗരവത്തിലായത്.
ഉയര്ന്ന തലത്തില് രാജികള്
ഒരാഴ്ചയായി നീളുന്ന വിവാദങ്ങള്ക്കൊടുവില് ബിബിസി ഡയറക്ടര് ജനറല് ടിം ഡേവിയും ന്യൂസ് ചീഫ് എക്സിക്യൂട്ടീവ് ഡെബോറ ടേര്ണസും രാജിവെച്ചു. പക്ഷപാതം, സെന്സര്ഷിപ്, വ്യാജ വീഡിയോ എന്നീ ആരോപണങ്ങളാണ് രാജിയിലേക്ക് കാരണമായത്. പ്രേക്ഷകരെ തെറ്റിദ്ധരിപ്പിച്ചതിന്റെ പൂര്ണ ഉത്തരവാദിത്വം തങ്ങള്ക്കാണെന്ന് ഇരുവരും സമ്മതിച്ചു.
രാഷ്ട്രീയ പിന്തുണയും നയതന്ത്ര പ്രതിസന്ധിയും
വൈറ്റ്ഹൗസ് പ്രസ് സെക്രട്ടറി കാരോലിന് ലീവിറ്റ് കഴിഞ്ഞയാഴ്ച പ്രസ്താവനയില് ട്രംപിന്റെ ആരോപണം ആവര്ത്തിച്ചു. പ്രതിപക്ഷ നേതാവ് കെമി ബെയ്ഡ്നോക്ക്, മുന് പ്രധാനമന്ത്രി ബോറിസ് ജോണ്സണ്, റിഫോം യുകെ നേതാവ് നൈജല് ഫെറാജ് എന്നിവരും ബിബിസി നേതൃത്വത്തിനെതിരെ രംഗത്തെത്തി. ട്രംപിന്റെ നഷ്ടപരിഹാര ആവശ്യം ശക്തമായി പിന്തുണച്ച് നൈജല് ഫെറാജ് രംഗത്തെത്തിയതോടെ പ്രശ്നം ബ്രിട്ടന്-അമേരിക്ക നയതന്ത്ര ബന്ധത്തെയും ബ്രിട്ടിഷ് രാഷ്ട്രീയത്തെയും ബാധിക്കാവുന്ന നിലയിലേക്ക് എത്തുകയാണ്.
പാര്ലമെന്ററി വിശദീകരണവും തുടര്ന്നുള്ള നീക്കങ്ങളും
ബിബിസി ചെയര്പേഴ്സണ് സമീര് ഷാ പാര്ലമെന്ററി കമ്മിറ്റിക്ക് വിശദീകരണം നല്കേണ്ടിവന്നതോടെ വിഷയത്തിന്റെ ഗൗരവം കൂടുതല് വ്യക്തമായി. വിശദീകരണത്തിന് പിന്നാലെയാണ് ട്രംപ് നഷ്ടപരിഹാര ആവശ്യം ഔദ്യോഗികമായി മുന്നോട്ടുവച്ചത്. ബിബിസി ആസ്ഥാനത്ത് ഞായറാഴ്ച ട്രംപിന്റെ കത്ത് ലഭിച്ചതായി സ്ഥിരീകരിച്ചിട്ടുണ്ട്.
സാരമായ പ്രതിഫലനങ്ങള്
ബിബിസിയുടെ വിശ്വാസ്യതയ്ക്ക് വലിയ തിരിച്ചടിയാകുകയും ബ്രിട്ടന്-അമേരിക്ക ബന്ധത്തില് ചലനം സൃഷ്ടിക്കുകയും ചെയ്യുന്ന ഈ വിവാദം, മാധ്യമ സ്വാതന്ത്ര്യത്തിന്റെയും എഡിറ്റോറിയല് ഉത്തരവാദിത്വത്തിന്റെയും അതിരുകള്ക്കുള്ള ചോദ്യങ്ങള് ഉയര്ത്തുകയാണ്. സംഭവവികാസങ്ങള് അടുത്ത ദിവസങ്ങളില് കൂടുതല് രാഷ്ട്രീയ-നയതന്ത്ര പ്രതിഫലനങ്ങള് ഉണ്ടാക്കുമെന്നത് ഉറപ്പാണ്.
