ലണ്ടന്‍: യുകെയിലെ എസെക്‌സ് കൗണ്ടിയിലെ ചെല്‍സ്‌ഫോര്‍ഡ് സെന്‍ട്രല്‍ പാര്‍ക്കില്‍ 21 വയസ്സുകാരന്‍ കുത്തേറ്റ് മരിച്ച സംഭവത്തില്‍ 14 വയസ്സുകാരന്‍ ഉള്‍പ്പെടെ മൂന്ന് കൗമാരക്കാരെ പൊലീസ് കൊലപാതക സംശയത്തില്‍ അറസ്റ്റ് ചെയ്തു. വെള്ളിയാഴ്ച, ജൂണ്‍ 12-ന് വൈകിട്ട് ഏകദേശം 7 മണിയോടെയാണ് പാര്‍ക്കില്‍ ആക്രമണം നടന്നതായി ആംബുലന്‍സ് സര്‍വീസില്‍ നിന്ന് എസെക്‌സ് പൊലീസിന് വിവരം ലഭിച്ചത്. മിനിറ്റുകള്‍ക്കകം സ്ഥലത്തെത്തിയ പൊലീസ് ഗുരുതരമായി പരിക്കേറ്റ നിലയില്‍ 21 കാരനെ കണ്ടെത്തി. അടിയന്തര ശുശ്രൂഷ നല്‍കിയെങ്കിലും സംഭവസ്ഥലത്ത് തന്നെ മരണം സ്ഥിരീകരിക്കുകയായിരുന്നു.

സംഭവത്തിന് പിന്നാലെ അന്വേഷണം ആരംഭിച്ച പൊലീസ്, ചെല്‍സ്‌ഫോര്‍ഡിലെ ഓക്ലാന്‍ഡ് ക്ലോസിലെ വിലാസത്തിലേക്ക് എത്തിയതോടെയാണ് അറസ്റ്റുകള്‍ നടന്നത്. ചെല്‍സ്‌ഫോര്‍ഡ് സ്വദേശികളായ 14, 17, 18 വയസ്സുള്ള മൂന്ന് പേരാണ് കൊലപാതക സംശയത്തില്‍ അറസ്റ്റിലായത്. ഇവര്‍ ഇപ്പോഴും പൊലീസ് കസ്റ്റഡിയില്‍ ചോദ്യം ചെയ്യലിനായി തുടരുകയാണെന്ന് അധികൃതര്‍ അറിയിച്ചു. മരിച്ച യുവാവിന്റെ കുടുംബത്തെ വിവരം അറിയിച്ചതായും, പ്രത്യേക പരിശീലനം ലഭിച്ച ഉദ്യോഗസ്ഥര്‍ കുടുംബത്തിന് പിന്തുണ നല്‍കുന്നുണ്ടെന്നും പൊലീസ് വ്യക്തമാക്കി. സംഭവത്തെ തുടര്‍ന്ന് പ്രദേശത്ത് പൊലീസ് സാന്നിധ്യം ശക്തമാക്കിയിട്ടുണ്ട്.

''ഇത് അത്യന്തം വേദനാജനകമായ സംഭവമാണ്. ഒരു കുടുംബം ദുഃഖത്തിലാഴ്ന്നിരിക്കുകയാണ്. ഈ ദുഷ്‌കരമായ സമയത്ത് ഞങ്ങളുടെ ചിന്തകള്‍ അവരോടൊപ്പമാണ്. സംഭവത്തിന്റെ യഥാര്‍ഥ സാഹചര്യം വ്യക്തമായി മനസ്സിലാക്കി കുടുംബത്തിന് ഉത്തരം നല്‍കുകയാണ് ഞങ്ങളുടെ ലക്ഷ്യം,'' അന്വേഷണത്തിന് നേതൃത്വം നല്‍കുന്ന ഡിറ്റക്റ്റീവ് ഇന്‍സ്‌പെക്ടര്‍ ലിഡിയ ജോര്‍ജ് പറഞ്ഞു. സംഭവവുമായി ബന്ധപ്പെട്ട് ഇപ്പോള്‍ മറ്റാരെയും പൊലീസ് അന്വേഷിക്കുന്നില്ലെന്നും പൊതുജനങ്ങള്‍ക്ക് നിലവില്‍ തുടര്‍ഭീഷണി ഇല്ലെന്നും പൊലീസ് വ്യക്തമാക്കി. എന്നിരുന്നാലും, തിരക്കേറിയ പൊതുസ്ഥലത്താണ് സംഭവം നടന്നതെന്നതിനാല്‍ ദൃക്‌സാക്ഷികളോ വിവരമുള്ളവരോ മുന്നോട്ട് വരണമെന്ന് പൊലീസ് അഭ്യര്‍ത്ഥിച്ചു. അതേസമയം, പൊലീസ് നിര്‍ദേശത്തെ തുടര്‍ന്ന് ചെല്‍സ്‌ഫോര്‍ഡ് സെന്‍ട്രല്‍ പാര്‍ക്കില്‍ ഇന്ന് നടത്താനിരുന്ന പൊതുപരിപാടികള്‍ റദ്ദാക്കി. വെള്ളിയാഴ്ച രാത്രി എസെക്‌സ് ആന്‍ഡ് ഹെര്‍ട്‌സ് എയര്‍ ആംബുലന്‍സും സംഭവസ്ഥലത്തെത്തിയിരുന്നു.