ഇംഗ്ലണ്ടിലും വെയില്സിലും ബാല ലൈംഗിക പീഡനത്തിനിരയായവര്ക്ക് അവരുടെ ദുരനുഭവങ്ങളുടെ ചിത്രങ്ങള് ഓണ്ലൈനില് നിന്ന് കണ്ടെത്തി നീക്കം ചെയ്യാന് സഹായിക്കുന്ന 'എക്കോ' പദ്ധതി ആരംഭിച്ചു. പൊലീസ് അന്വേഷണം അവസാനിച്ചതിന് ശേഷം മതിയായ പിന്തുണ ലഭിക്കാതെ ജീവിതം മുന്നോട്ട് കൊണ്ടുപോകേണ്ടിവരുന്ന ഇരകള്ക്ക് ആശ്വാസമാകുകയാണ് ഈ പദ്ധതി. ഓണ്ലൈനില് പ്രചരിക്കുന്ന പീഡന ചിത്രങ്ങള് കണ്ടെത്തി നീക്കം ചെയ്യുന്നതിനൊപ്പം, ഇരകള്ക്ക് മാനസികാരോഗ്യം വീണ്ടെടുക്കുന്നതിനുള്ള പിന്തുണയും നഷ്ടപരിഹാരം ലഭ്യമാക്കാനുള്ള സഹായവും പദ്ധതിയുടെ ഭാഗമായി നല്കും.
യുകെയിലെ ബാല പീഡന ഇമേജ് ഡാറ്റാബേസിന്റെ സഹായത്തോടെ ഇത്തരം ചിത്രങ്ങള് കണ്ടെത്തി നീക്കം ചെയ്യാനുള്ള നടപടികളാണ് സ്വീകരിക്കുക. വിവിധ പൊലീസ് സേനകളും ഇന്റര്നെറ്റ് വാച്ച് ഫൗണ്ടേഷനും പദ്ധതിക്ക് പിന്തുണ നല്കുന്നുണ്ട്. എന്നാല്, ചിത്രങ്ങള് കണ്ടെത്തുന്നതിനായി കൃത്രിമ ബുദ്ധി ഉപയോഗിക്കുന്നില്ലെന്ന് അധികൃതര് വ്യക്തമാക്കി. പീഡന ചിത്രങ്ങള് വീണ്ടും ഓണ്ലൈനില് പ്രത്യക്ഷപ്പെടുമോ എന്ന ഭയം വര്ഷങ്ങളായി ഇരകളെ വേട്ടയാടുന്നുണ്ടെന്ന് 13-ാം വയസ്സില് പീഡനത്തിനിരയായ റിയാനണ് ഫേ പറഞ്ഞു. എക്കോ പദ്ധതി ഇരകള്ക്ക് കൂടുതല് ആത്മവിശ്വാസത്തോടെ ജീവിതത്തിലേക്ക് മടങ്ങിവരാന് സഹായിക്കുമെന്ന് അവര് പ്രത്യാശ പ്രകടിപ്പിച്ചു. അതേസമയം, കുട്ടികളുടെ മൊബൈല് ഫോണുകളില് അശ്ലീല ചിത്രങ്ങള് എത്തുന്നത് തടയാന് ആവശ്യമായ സംവിധാനങ്ങള് നടപ്പാക്കണമെന്ന് ബ്രിട്ടീഷ് സര്ക്കാര് ടെക് കമ്പനികള്ക്ക് നിര്ദ്ദേശം നല്കിയിട്ടുണ്ട്.
