ലണ്ടന്‍: ബ്രിട്ടീഷ് രാജാവ് ചാള്‍സ് മൂന്നാമന്റെ ഔദ്യോഗിക ജന്മദിനാഘോഷത്തിന്റെ ഭാഗമായി നടക്കുന്ന പാരമ്പര്യ സൈനിക പരേഡായ ട്രൂപ്പിങ് ദ കളര്‍ ശനിയാഴ്ച ലണ്ടനില്‍ വര്‍ണാഭമായി ആരംഭിച്ചു. ബക്കിങ്ഹാം കൊട്ടാരത്തില്‍ നിന്ന് ദ മാള്‍ റോഡിലൂടെ രാജാവ് ചാള്‍സും രാജ്ഞി കമിലയും ആസ്‌കോട്ട് ലാന്‍ഡൗ കുതിരവണ്ടിയില്‍ യാത്രതിരിച്ചു. വെല്‍സ് രാജകുമാരി കാതറിന്‍, മക്കളായ പ്രിന്‍സ് ജോര്‍ജ്, പ്രിന്‍സസ് ഷാര്‍ലറ്റ്, പ്രിന്‍സ് ലൂയിസ് എന്നിവര്‍ക്കൊപ്പം മറ്റൊരു കുതിരവണ്ടിയിലാണ് പരേഡില്‍ പങ്കെടുത്തത്. വെല്‍സ് രാജകുമാരന്‍ വില്യം കുതിരപ്പുറത്ത് രാജകീയ സൈനിക വിഭാഗത്തോടൊപ്പം പരേഡില്‍ പങ്കെടുത്തു. അദ്ദേഹത്തോടൊപ്പം പ്രിന്‍സസ് ആനും ഡ്യൂക്ക് ഓഫ് എഡിന്‍ബറോയും കുതിരസവാരിയില്‍ ഉണ്ടായിരുന്നു.
ദ മാള്‍ റോഡിന്റെ ഇരുവശങ്ങളിലും രാവിലെ മുതല്‍ ആയിരക്കണക്കിന് ആളുകളാണ് തടിച്ചുകൂടിയത്. യൂണിയന്‍ ജാക്ക് പതാകകളും മൊബൈല്‍ ഫോണുകളും ഉയര്‍ത്തി രാജകുടുംബത്തെ ജനങ്ങള്‍ ആവേശത്തോടെ വരവേറ്റു. തെളിഞ്ഞ ആകാശവും അനുകൂല കാലാവസ്ഥയും ചടങ്ങിന് കൂടുതല്‍ ഭംഗി പകര്‍ന്നു. പരേഡിന് ശേഷം ബക്കിങ്ഹാം കൊട്ടാരത്തിന്റെ ബാല്‍ക്കണിയില്‍ രാജകുടുംബാംഗങ്ങള്‍ ഒരുമിച്ച് പ്രത്യക്ഷപ്പെട്ടു. തുടര്‍ന്ന് റോയല്‍ എയര്‍ ഫോഴ്സിന്റെ വ്യോമപ്രകടനവും നടന്നു. ഈ വര്‍ഷത്തെ ചടങ്ങില്‍ സീനിയര്‍ വര്‍ക്കിങ് റോയല്‍ അംഗങ്ങളുടെയും അടുത്ത കുടുംബാംഗങ്ങളുടെയും സാന്നിധ്യമാണ് പ്രധാനമായി ശ്രദ്ധിക്കപ്പെട്ടത്. കാന്‍സര്‍ ചികിത്സയ്ക്ക് ശേഷം രാജാവ് ചാള്‍സും വെല്‍സ് രാജകുമാരി കാതറിനും പൊതുപരിപാടികളില്‍ കൂടുതല്‍ സജീവമാകുന്നത് രാജകുടുംബ ആരാധകരുടെ പ്രത്യേക ശ്രദ്ധ പിടിച്ചുപറ്റി. രാജാവിന്റെ ഔദ്യോഗിക ജന്മദിനാഘോഷത്തിന്റെ പ്രധാന ആകര്‍ഷണമായ ട്രൂപ്പിങ് ദ കളര്‍, ബ്രിട്ടീഷ് രാജവാഴ്ചയുടെ പാരമ്പര്യവും സൈനിക ചിട്ടയും ഒരുമിച്ച് പ്രകടിപ്പിക്കുന്ന ചടങ്ങെന്ന നിലയില്‍ ലോകശ്രദ്ധ നേടി.
