ലണ്ടന്‍: ബ്രിട്ടനില്‍ അതിവേഗം വളര്‍ച്ച കൈവരിച്ച റിഫോം യുകെ പാര്‍ട്ടിയുടെ ജനപിന്തുണ അധികകാലം ഇതേ വേഗത്തില്‍ ഉയരാന്‍ സാധ്യതയില്ലെന്ന് പുതിയ സര്‍വേ റിപ്പോര്‍ട്ട്. പാര്‍ട്ടിയുടെ പിന്തുണ ഏകദേശം 30 ശതമാനത്തിനടുത്ത് നിശ്ചലമാകാനിടയുണ്ടെന്നാണ് പഠനത്തിലെ വിലയിരുത്തല്‍. തദ്ദേശ തെരഞ്ഞെടുപ്പുകളില്‍ ഉള്‍പ്പെടെ പ്രധാന പാര്‍ട്ടികളെ സമ്മര്‍ദ്ദത്തിലാക്കി റിഫോം യുകെ വലിയ മുന്നേറ്റം നടത്തിയിരുന്നു. എന്നാല്‍ പാര്‍ട്ടി പിന്തുടരുന്ന യാഥാസ്ഥിതിക സാമൂഹിക നിലപാടുകള്‍ കൂടുതല്‍ വ്യാപകമായ ജനപിന്തുണ നേടുന്നതിന് തടസ്സമാകാമെന്നാണ് പഠനം ചൂണ്ടിക്കാട്ടുന്നത്. ബ്രിട്ടീഷ് സോഷ്യല്‍ ആറ്റിറ്റിയൂഡ്‌സ് റിപ്പോര്‍ട്ടിന്റെ ഭാഗമായി പ്രമുഖ തിരഞ്ഞെടുപ്പ് വിശകലന വിദഗ്ധന്‍ ജോണ്‍ കര്‍ടിസ് നേതൃത്വം നല്‍കിയ പഠനത്തിലാണ് ഈ കണ്ടെത്തല്‍. കുടിയേറ്റം, ക്ഷേമപദ്ധതികള്‍ തുടങ്ങിയ വിഷയങ്ങളില്‍ കടുത്ത നിലപാടുകള്‍ സ്വീകരിക്കുന്നവരാണ് റിഫോം യുകെയുടെ പ്രധാന പിന്തുണക്കാര്‍ എന്നാണ് റിപ്പോര്‍ട്ടില്‍ പറയുന്നത്.

നിലവിലെ രാഷ്ട്രീയ തന്ത്രം തുടര്‍ന്നാല്‍ പാര്‍ട്ടിയുടെ പിന്തുണ പരമാവധി 30 ശതമാനത്തിനടുത്ത് എത്താന്‍ സാധ്യതയുണ്ടെന്ന് ജോണ്‍ കര്‍ടിസ് വിലയിരുത്തി. അതേസമയം, ബ്രിട്ടന്റെ തെരഞ്ഞെടുപ്പ് സംവിധാനത്തില്‍ ഇത് ഒരു പൊതുതെരഞ്ഞെടുപ്പ് വിജയത്തിന് മതിയായേക്കാമെന്നും അദ്ദേഹം അഭിപ്രായപ്പെട്ടു. പഠനത്തില്‍ പങ്കെടുത്ത 4,600-ലധികം ആളുകളുടെ മറുപടികള്‍ പ്രകാരം റിഫോം യുകെ അനുയായികള്‍ക്ക് രാഷ്ട്രീയക്കാരോടും ഭരണകൂടത്തോടും കൂടുതല്‍ അവിശ്വാസമുണ്ട്. എന്‍എച്ച്എസ് ഉള്‍പ്പെടെയുള്ള പൊതുസേവനങ്ങളോടുള്ള അതൃപ്തിയും ഇവരില്‍ കൂടുതലാണെന്ന് റിപ്പോര്‍ട്ട് പറയുന്നു. റിഫോം യുകെയെ പിന്തുണയ്ക്കുന്നവരില്‍ ബ്രെക്‌സിറ്റിനെ അനുകൂലിച്ചവര്‍, പ്രായം കൂടിയവര്‍, പുരുഷന്മാര്‍, കുറഞ്ഞ വിദ്യാഭ്യാസ യോഗ്യതയുള്ളവര്‍ എന്നിവരാണ് കൂടുതല്‍. ബിരുദധാരികളില്‍ വെറും 9 ശതമാനം പേര്‍ മാത്രമാണ് പാര്‍ട്ടിയെ പിന്തുണയ്ക്കുന്നത്. അതേസമയം എ-ലെവലിനും താഴെയുള്ള വിദ്യാഭ്യാസ യോഗ്യതയുള്ളവരില്‍ 40 ശതമാനം പേര്‍ റിഫോം യുകെയെ അനുകൂലിക്കുന്നതായി റിപ്പോര്‍ട്ട് വ്യക്തമാക്കുന്നു. സ്വന്തം സാമ്പത്തിക സ്ഥിതിയെക്കുറിച്ചും ജീവിതച്ചെലവിനെക്കുറിച്ചും കൂടുതല്‍ ആശങ്കപ്പെടുന്നവരാണ് റിഫോം യുകെയുടെ പിന്തുണക്കാര്‍ എന്നും പഠനം കണ്ടെത്തി.