ലണ്ടന്‍: ബ്രിട്ടനില്‍ യുവജന തൊഴിലില്ലായ്മ വര്‍ധിക്കുന്നതിനിടെ, 18 മുതല്‍ 20 വയസ്സ് വരെയുള്ള തൊഴിലാളികള്‍ക്കും മുതിര്‍ന്ന തൊഴിലാളികള്‍ക്ക് ലഭിക്കുന്നതുപോലെ പൂര്‍ണ മിനിമം വേതനം നല്‍കുമെന്ന ലേബര്‍ പാര്‍ട്ടിയുടെ തിരഞ്ഞെടുപ്പ് വാഗ്ദാനം നടപ്പാക്കുന്നതിനെച്ചൊല്ലി സര്‍ക്കാരിനുള്ളില്‍ ഭിന്നത രൂക്ഷമാകുന്നു. 18-20 പ്രായക്കാര്‍ക്ക് നിലവില്‍ തന്നെ പൂര്‍ണ മിനിമം വേതനം നല്‍കുന്നത് തൊഴില്‍ വിപണിയില്‍ കൂടുതല്‍ സമ്മര്‍ദ്ദം സൃഷ്ടിക്കുമെന്നാണ് ബിസിനസ് സെക്രട്ടറി പീറ്റര്‍ കെയ്ലിന്റെ നിലപാട്. പ്രത്യേകിച്ച് ഹോസ്പിറ്റാലിറ്റി, റീട്ടെയില്‍ തുടങ്ങിയ മേഖലകളില്‍ യുവാക്കളെ നിയമിക്കുന്നതില്‍ തൊഴിലുടമകള്‍ പിന്നോട്ടുപോകാന്‍ സാധ്യതയുണ്ടെന്നാണ് ആശങ്ക. എന്നാല്‍ ട്രഷറി മന്ത്രി ടോര്‍സ്റ്റണ്‍ ബെല്‍ ഉള്‍പ്പെടെയുള്ളവര്‍ ഈ വാദത്തോട് യോജിക്കുന്നില്ല. മുന്‍കാല മിനിമം വേതന വര്‍ധനകള്‍ യുവജന തൊഴിലവസരങ്ങളെ പ്രതികൂലമായി ബാധിച്ചതായി ഉറച്ച തെളിവില്ലെന്നാണ് അവരുടെ നിലപാട്.

മുന്‍ ലേബര്‍ മന്ത്രി അലന്‍ മില്‍ബേണ്‍ തയ്യാറാക്കിയ യുവജന തൊഴില്‍ റിപ്പോര്‍ട്ടാണ് സര്‍ക്കാരിനെ കൂടുതല്‍ പ്രതിരോധത്തിലാക്കിയത്. യുകെയില്‍ ജോലി ചെയ്യാതെയും പഠിക്കാതെയും പരിശീലനത്തിലുമല്ലാതെയും കഴിയുന്ന 16-24 വയസ്സുകാരുടെ എണ്ണം ഒരു മില്യണ്‍ കടന്നതായി റിപ്പോര്‍ട്ട് ചൂണ്ടിക്കാട്ടുന്നു. ഇത് 12 വര്‍ഷത്തിനിടയിലെ ഏറ്റവും ഉയര്‍ന്ന നിലയാണെന്നും, യുവജന തൊഴിലില്ലായ്മ രാജ്യത്തിന് പ്രതിവര്‍ഷം ഏകദേശം 125 ബില്യണ്‍ പൗണ്ടിന്റെ സാമ്പത്തിക നഷ്ടമുണ്ടാക്കുന്നതായും റിപ്പോര്‍ട്ടില്‍ പറയുന്നു.

യുവാക്കളെ തൊഴില്‍ വിപണിയിലേക്ക് തിരിച്ചെത്തിക്കാന്‍ തൊഴിലുടമകള്‍ക്ക് പ്രോത്സാഹനം നല്‍കേണ്ടതുണ്ടെന്നും, അതിനാല്‍ വേതനവര്‍ധനയുടെ വേഗത സൂക്ഷ്മമായി പരിഗണിക്കണമെന്നും മില്‍ബേണ്‍ അഭിപ്രായപ്പെട്ടു. എന്നാല്‍ വേതനം കുറച്ച് നിലനിര്‍ത്തുന്നത് പ്രശ്‌നത്തിന് പരിഹാരമല്ലെന്നും, കുറഞ്ഞ വേതനം യുവാക്കളെ തൊഴില്‍ മേഖലയില്‍ നിന്ന് കൂടുതല്‍ അകറ്റാനിടയാക്കുമെന്നും സര്‍ക്കാര്‍ വൃത്തങ്ങളിലെ മറ്റൊരു വിഭാഗം ചൂണ്ടിക്കാട്ടുന്നു.

ലേബര്‍ പാര്‍ട്ടിയുടെ തിരഞ്ഞെടുപ്പ് പ്രകടനപത്രികയില്‍ 18-20 പ്രായക്കാര്‍ക്കും 21 വയസ്സിന് മുകളിലുള്ളവര്‍ക്കും ഒരേ മിനിമം വേതന നിരക്ക് ഉറപ്പാക്കുമെന്ന് വാഗ്ദാനം ചെയ്തിരുന്നു. എന്നാല്‍ ഈ വാഗ്ദാനം എപ്പോള്‍ നടപ്പാക്കുമെന്ന് വ്യക്തമായ സമയപരിധി നല്‍കിയിരുന്നില്ല. നിലവില്‍ 21 വയസ്സിന് മുകളിലുള്ളവര്‍ക്ക് ദേശീയ ലിവിങ് വേതനം മണിക്കൂറിന് £12.71 ആണ്. 18-20 വയസ്സുകാര്‍ക്ക് ലഭിക്കുന്ന നിരക്ക് £10.85 മാത്രമാണ്. ഇപ്പോള്‍ കുറഞ്ഞ പ്രായക്കാര്‍ക്കുള്ള വേതന നിരക്ക് മുതിര്‍ന്നവരുടേതുമായി ഏകീകരിക്കുന്നതിനുള്ള തീരുമാനം ലോ പേ കമ്മീഷന്റെ ശുപാര്‍ശകളെയും ആശ്രയിച്ചിരിക്കുന്നു. കമ്മീഷന്‍ 2027-ലെ നിരക്കുകള്‍ക്കായുള്ള ശുപാര്‍ശകള്‍ ഒക്ടോബറില്‍ സമര്‍പ്പിക്കുമെന്നാണ് പ്രതീക്ഷ. അതുവരെ ജനപ്രിയ തിരഞ്ഞെടുപ്പ് വാഗ്ദാനവും യുവജന തൊഴിലില്ലായ്മയെന്ന യാഥാര്‍ത്ഥ്യവും തമ്മില്‍ തുലനം കണ്ടെത്താനുള്ള ശ്രമത്തിലാണ് സര്‍ക്കാര്‍.