ലണ്ടന്‍: ഇറാസ്മസ് പ്ലസ് പദ്ധതിയുടെ ഭാഗമായി ബ്രിട്ടനിലെത്തുന്നവര്‍ക്ക് നിശ്ചിത വ്യവസ്ഥകളോടെ സ്റ്റാന്‍ഡേര്‍ഡ് വിസിറ്റര്‍ വിസയില്‍ ഹ്രസ്വകാല പഠനവും പരിശീലനവും നടത്താം. ആറുമാസം വരെയുള്ള അംഗീകൃത പഠനപരിപാടികള്‍ക്കാണ് ഈ സൗകര്യം. പങ്കെടുക്കുന്ന പരിപാടി, താമസകാലാവധി, പ്രായം എന്നിവയെ ആശ്രയിച്ചാണ് ആവശ്യമായ വിസ നിശ്ചയിക്കേണ്ടതെന്ന് ഹോം ഓഫീസ് മാര്‍ഗനിര്‍ദേശം വ്യക്തമാക്കുന്നു.
അംഗീകൃത സ്ഥാപനങ്ങളിലെ പഠനം, വിദ്യാഭ്യാസ വിനിമയ പരിപാടികള്‍, ശില്‍പശാലകള്‍, സെമിനാറുകള്‍, സമ്മേളനങ്ങള്‍ എന്നിവയില്‍ സന്ദര്‍ശക വിസയില്‍ പങ്കെടുക്കാം. ജോലിസ്ഥലത്തെ പ്രവര്‍ത്തനങ്ങള്‍ നിരീക്ഷിച്ചുപഠിക്കുന്ന 'ജോബ് ഷാഡോയിങ്', ചില കായിക പരിശീലന പരിപാടികള്‍ എന്നിവയ്ക്കും അനുമതിയുണ്ട്. പരിശീലനം നല്‍കാനോ സ്വീകരിക്കാനോ എത്തുന്നവര്‍ക്ക് പരിപാടിയുമായുള്ള ബന്ധം ഉള്‍പ്പെടെ അധിക യോഗ്യതകള്‍ ബാധകമാണ്.
ട്രെയിനിഷിപ്പിനായി സന്ദര്‍ശക വിസ ഉപയോഗിക്കുന്നവര്‍ പരിശീലനം ആരംഭിക്കുമ്പോള്‍ 18 വയസ്സില്‍ താഴെയുള്ളവരായിരിക്കണം. പരിശീലനകാലം പരമാവധി 30 ദിവസമാണ്. ഇറാസ്മസ് പ്ലസ് പദ്ധതിയില്‍ പങ്കെടുക്കുന്ന സ്ഥാപനത്തിലായിരിക്കണം പരിശീലനം. പരിപാടിയുടെ സ്വഭാവം, സ്ഥലം, ആരംഭ-അവസാന തീയതികള്‍ എന്നിവ വ്യക്തമാക്കുന്ന രേഖകളും ഹാജരാക്കണം.
ആറുമാസത്തിലധികമുള്ള പഠനത്തിനോ സന്ദര്‍ശക വിസയില്‍ അനുവദിക്കാത്ത തൊഴില്‍പരിശീലനത്തിനോ അനുയോജ്യമായ മറ്റൊരു വിസ ആവശ്യമായി വരും. പരിപാടിക്കനുസരിച്ച് സ്റ്റുഡന്റ്, ചൈല്‍ഡ് സ്റ്റുഡന്റ്, ഗവണ്‍മെന്റ് ഓതറൈസ്ഡ് എക്‌സ്‌ചേഞ്ച് വിസകള്‍ പരിഗണിക്കാം. ആറുമാസത്തിലധികവും 11 മാസത്തില്‍ കവിയാത്തതുമായ ഇംഗ്ലീഷ് ഭാഷാ കോഴ്സുകള്‍ക്ക് ഷോര്‍ട്ട് ടേം സ്റ്റഡി വിസയും ലഭ്യമാണ്.
