ലണ്ടന്: ബ്രിട്ടനില് ബിസിനസ് നടത്തുന്നതിനുള്ള സമീപനത്തില് വലിയ മാറ്റം അനിവാര്യമാണെന്നും പുതിയ ആശയങ്ങളുമായി റിസ്ക് ഏറ്റെടുത്ത് മുന്നോട്ടുവരുന്ന സംരംഭകര്ക്ക് സര്ക്കാരിന്റെയും പ്രാദേശിക ഭരണകൂടങ്ങളുടെയും കൂടുതല് പിന്തുണ ഉറപ്പാക്കണമെന്നും പ്രധാനമന്ത്രി ആന്ഡി ബേണെം. രാജ്യത്തിന്റെ സാമ്പത്തിക സാധ്യതകള് പൂര്ണമായി പ്രയോജനപ്പെടുത്താന് സര്ക്കാര്-സ്വകാര്യ മേഖല സഹകരണം ശക്തിപ്പെടുത്തേണ്ടതുണ്ടെന്നും അദ്ദേഹം വ്യക്തമാക്കി. മികച്ച ആശയങ്ങളുള്ളവര്ക്ക് അവ യാഥാര്ഥ്യമാക്കുന്നതിനുള്ള പിന്തുണ രാജ്യത്ത് ലഭിക്കുമെന്ന ആത്മവിശ്വാസം സൃഷ്ടിക്കുകയാണ് സര്ക്കാരിന്റെ ലക്ഷ്യം. ബിസിനസ് മേഖലയുമായി സര്ക്കാര് പങ്കാളിത്തത്തോടെ പ്രവര്ത്തിക്കുകയും പ്രാദേശിക നേതാക്കള്ക്ക് കൂടുതല് അധികാരം നല്കുകയും ചെയ്താല് നിക്ഷേപം ആകര്ഷിക്കാനും പുതിയ തൊഴിലവസരങ്ങള് സൃഷ്ടിക്കാനും പ്രാദേശിക സമ്പദ്വ്യവസ്ഥകളില് വലിയ മാറ്റമുണ്ടാക്കാനും കഴിയുമെന്ന് ബേണെം പറഞ്ഞു.
രാജ്യത്തെ സാമ്പത്തിക വളര്ച്ച ശക്തിപ്പെടുത്തുന്നതിനുള്ള നടപടികളുടെ ഭാഗമായി പ്രമുഖ വ്യവസായ സ്ഥാപനങ്ങളുടെ മേധാവികളുമായി ഡൗണിങ് സ്ട്രീറ്റില് പ്രധാനമന്ത്രി കൂടിക്കാഴ്ച നടത്തും. ബിപി, ഷെല്, എച്ച്എസ്ബിസി, മോറിസണ്സ്, സെയിന്സ്ബറീസ്, ബിടി, വോഡഫോണ്, റോള്സ് റോയ്സ് തുടങ്ങിയ പ്രമുഖ കമ്പനികളുടെ പ്രതിനിധികള് യോഗത്തില് പങ്കെടുക്കും. ബിസിനസ് മേഖലയിലെ പ്രതിനിധികള്ക്കായി പ്രത്യേക സ്വീകരണവും സംഘടിപ്പിക്കുന്നുണ്ട്. അതേസമയം, സര്ക്കാരിന്റെ സാമ്പത്തിക നയങ്ങള് ബിസിനസുകളുടെ പ്രവര്ത്തനച്ചെലവ് വര്ധിപ്പിച്ചെന്ന വിമര്ശനവും ശക്തമാണ്. തൊഴിലുടമകളുടെ നാഷനല് ഇന്ഷുറന്സ് നിരക്കിലെയും കുറഞ്ഞ വേതനത്തിലെയും മാറ്റങ്ങള് കമ്പനികള്ക്ക് അധിക സാമ്പത്തിക ബാധ്യത സൃഷ്ടിച്ചതായാണ് വിമര്ശകരുടെ വാദം.
ജൂലൈയില് ബ്രിട്ടിഷ് സമ്പദ്വ്യവസ്ഥ പ്രതീക്ഷിച്ചതിനേക്കാള് മികച്ച പ്രകടനം കാഴ്ചവച്ചത് സര്ക്കാരിന് ആശ്വാസമായിട്ടുണ്ട്. ആര്ട്ടിഫിഷ്യല് ഇന്റലിജന്സ് ഉള്പ്പെടെയുള്ള സാങ്കേതിക മേഖലകളിലെ നിക്ഷേപം സാമ്പത്തിക വളര്ച്ചയ്ക്ക് പിന്തുണ നല്കിയെന്നാണ് വിലയിരുത്തല്. എന്നാല് ഉയര്ന്ന ഊര്ജവിലകള് വരും മാസങ്ങളില് വളര്ച്ചയ്ക്ക് തിരിച്ചടിയായേക്കുമെന്ന ആശങ്കയും നിലനില്ക്കുന്നു. ഇറാനുമായുള്ള യുദ്ധത്തെ തുടര്ന്ന് അന്താരാഷ്ട്ര വിപണിയില് എണ്ണവില ഉയര്ന്നതോടെ ഇന്ധന-ഊര്ജ ചെലവുകളും വര്ധിച്ചു. ഇത് പണപ്പെരുപ്പം ഉയര്ന്ന നിലയില് തുടരുന്നതിനും പലിശനിരക്കുമായി ബന്ധപ്പെട്ട ആശങ്കകള് ശക്തമാകുന്നതിനും കാരണമാകുമെന്നാണ് സാമ്പത്തിക വിദഗ്ധരുടെ വിലയിരുത്തല്.
ബ്രിട്ടന്റെ ഉയര്ന്ന സര്ക്കാര് കടബാധ്യതയും കടമെടുക്കുന്നതിനുള്ള ചെലവിലെ വര്ധനയും നിക്ഷേപകരുടെ ആത്മവിശ്വാസത്തെ ബാധിക്കുന്ന പ്രധാന ഘടകങ്ങളാണ്. രാജ്യത്തിന്റെ സമ്പദ്വ്യവസ്ഥയിലുള്ള ആത്മവിശ്വാസം പുനഃസ്ഥാപിക്കേണ്ടത് അനിവാര്യമാണെന്ന് ചാന്സലര് ജോണ് ഹീലിയും നേരത്തെ വ്യക്തമാക്കിയിരുന്നു. അതേസമയം, ബിസിനസ് മേഖലയിലെ ചെലവ് വര്ധിക്കാന് കാരണം സര്ക്കാരിന്റെ നയങ്ങളാണെന്ന് പ്രതിപക്ഷം ആരോപിച്ചു. നികുതിഭാരം കുറച്ചാല് മാത്രമേ കമ്പനികള്ക്ക് കൂടുതല് നിക്ഷേപം നടത്താനും വളരാനും പുതിയ തൊഴിലവസരങ്ങള് സൃഷ്ടിക്കാനും കഴിയൂവെന്ന് കണ്സര്വേറ്റീവ് ഷാഡോ ബിസിനസ് സെക്രട്ടറി ജൂലിയ ലോപ്പസ് പറഞ്ഞു. രാജ്യത്ത് സംരംഭകത്വം പ്രോത്സാഹിപ്പിക്കുകയും നിക്ഷേപത്തിന് അനുകൂലമായ സാഹചര്യം സൃഷ്ടിക്കുകയും ചെയ്യുന്നതിലൂടെ സാമ്പത്തിക വളര്ച്ചയ്ക്ക് പുതിയ വേഗം നല്കാനാണ് സര്ക്കാര് ശ്രമിക്കുന്നത്. കേന്ദ്ര സര്ക്കാരിനൊപ്പം പ്രാദേശിക ഭരണകൂടങ്ങള്ക്കും ബിസിനസ് മേഖലയ്ക്കും കൂടുതല് പങ്കാളിത്തം നല്കുന്ന സമീപനമാണ് ആന്ഡി ബേണെം മുന്നോട്ടുവയ്ക്കുന്നത്.
