പ്രധാനമന്ത്രി നരേന്ദ്ര മോദിയുടെ ഭരണജീവിതത്തിലെ 25 വര്‍ഷങ്ങള്‍ ആഘോഷിക്കുന്നതിനായി ബിജെപിയുടെ പശ്ചിമ ബംഗാള്‍ ഘടകം ഒരു മാസം നീണ്ടുനില്‍ക്കുന്ന പ്രചാരണ പരിപാടികള്‍ പ്രഖ്യാപിച്ചു. സയന്‍സ് മീറ്റുകളും കേന്ദ്ര ക്ഷേമ പദ്ധതികളുടെ ആനുകൂല്യം ലഭിച്ച 25 ലക്ഷം കുടുംബങ്ങളുടെ കഥകള്‍ സോഷ്യല്‍ മീഡിയയിലൂടെ പ്രചരിപ്പിക്കുന്നതും ഈ പരിപാടികളില്‍ ഉള്‍പ്പെടുന്നു.
'ഒക്ടോബര്‍ 7-ന് പ്രധാനമന്ത്രി മോദി ഭരണരംഗത്ത് 25 വര്‍ഷം പൂര്‍ത്തിയാക്കും. ഇതാണ് മോദി സൃഷ്ടിച്ച ചരിത്രം. പലരും പ്രധാനമന്ത്രിയും മുഖ്യമന്ത്രിയുമായിട്ടുണ്ടെങ്കിലും മോദിയല്ലാതെ മറ്റാരും 25 വര്‍ഷം തുടര്‍ച്ചയായി ഭരണ നേതൃത്വത്തില്‍ ഉണ്ടായിട്ടില്ല,' തിങ്കളാഴ്ച കൊല്‍ക്കത്തയില്‍ നടന്ന വാര്‍ത്താസമ്മേളനത്തില്‍ സംസ്ഥാന ബിജെപി പ്രസിഡന്റ് ഷമിക് ഭട്ടാചാര്യ പറഞ്ഞു.
'സെപ്റ്റംബര്‍ 17-ന് അദ്ദേഹത്തിന്റെ ദീര്‍ഘായുസ്സിനും ആരോഗ്യത്തിനുമായി രാജ്യത്തുടനീളം 'ആശീര്‍വാദ് പ്രദീപ്' ദീപങ്ങള്‍ തെളിയിക്കും. ബംഗാളിലെ ജനങ്ങളും പ്രധാനമന്ത്രിയെ അനുഗ്രഹിക്കും. പ്രധാനമന്ത്രിയുടെ മുഖം മുന്‍നിര്‍ത്തിയാണ് ഞങ്ങള്‍ തിരഞ്ഞെടുപ്പുകളെ നേരിട്ടത്. തിരഞ്ഞെടുപ്പില്‍ ഞങ്ങള്‍ക്ക് ഒരു മുഖമില്ലെന്ന് ആളുകള്‍ പറഞ്ഞു, എന്നാല്‍ ഞങ്ങള്‍ക്ക് വ്യാജമായ ഒരു മുഖംമൂടി ഇല്ലെന്നാണ് ഞങ്ങള്‍ മറുപടി നല്‍കിയത്.'- ഭട്ടാചാര്യ പറഞ്ഞു.