|
ലോക്ഡൗണ് ഇളവുകളുടെ ഭാ?ഗമായി മദ്യശാലകള് തുറക്കുകയും ആരാധനാലയങ്ങള് അടച്ചിടുകയും ചെയ്യുന്നതിന്റെ യുക്തിയെന്തെന്ന് സര്ക്കാര് വിശദീകരിക്കണമെന്ന് കെപിസിസി പ്രസിഡന്റ് കെ സുധാകരന്.
ആരാധനാലയങ്ങളും ലൈബ്രറികളും സിനിമ തിയേറ്ററുകളും അടക്കമുള്ള പൊതുസംവിധാനങ്ങള് ടിപിആറിന്റെ അടിസ്ഥാനത്തില് കോവിഡ് പ്രോട്ടോക്കോള് പാലിച്ചു കൊണ്ട് തുറന്നു പ്രവര്ത്തിക്കാനുള്ള അനുമതി സര്ക്കാര് ഉടന് നല്കണം.
ജനങ്ങള് സാമ്പത്തികമായും മാനസികമായും വലിയ പ്രതിസന്ധിയിലൂടെ കടന്നുപോകുന്ന ഈ സമയത്ത് മദ്യശാലകള് മാത്രം തുറന്ന് കൊടുത്തത് അശാസ്ത്രീയമാണെന്ന് അദ്ദേഹം കൂട്ടിചേര്ത്തു.
പൊതുഇടങ്ങള് തുറക്കാനുള്ള സര്ക്കാരിന്റെ മാനദണ്ഡം എന്താണെന്ന് വ്യക്തമാക്കണമെന്നും വാരാന്ത്യ ലോക്ഡൗണ് അപ്രായോഗികമാണെന്നും കെ. സുധാകരന് പറഞ്ഞു.
വാരാന്ത്യ ലോക്ഡൗണ് പോലെയുള്ള സാമാന്യ ബോദ്ധ്യത്തിന് നിരക്കാത്ത മാര്ഗങ്ങള് സര്ക്കാര് പുനഃപരിശോധിക്കണം. വെള്ളിയാഴ്ചകളില് കനത്ത തിക്കുംതിരക്കും സൃഷ്ടിച്ച് സൂപ്പര് സ്പ്രെഡിന് വഴിയൊരുക്കുകയാണ് സര്ക്കാര് ചെയ്യുന്നത്.
ടിപിആര് കൂടുന്നതിനനുസരിച്ച് ലോക്ഡൗണ് പ്രഖ്യാപിക്കുകയും നീട്ടുകയും ചെയ്യുക എന്നതിലുപരിയായി ഒരു ദീര്ഘവീക്ഷണവും സര്ക്കാരിനില്ല. മൂന്നാം തരംഗത്തെ നേരിടാനുള്ള മുന്നൊരുക്കങ്ങള് പ്രഖ്യാപനങ്ങളില് മാത്രമേയുള്ളു.
കേരളത്തിനേക്കാള് ടിപിആറും കോവിഡ് കേസുകളും ഉണ്ടായിരുന്ന സംസ്ഥാനങ്ങള് സാധാരണ ജനജീവിതത്തിലേക്ക് മടങ്ങി. എന്നാല് കേരളം ഇപ്പോഴും കനത്ത കോവിഡ് ഭീതിയിലാണെന്നും കെ. സുധാകരന് കുറ്റപ്പെടുത്തി. |
