|
കേരളത്തില് യുഡിഎഫ് തുടര്ച്ചയായി പ്രതിപക്ഷമാകാനുള്ള കാരണങ്ങളിലൊന്ന് കള്ള പ്രചാരണങ്ങളാണെന്ന് മന്ത്രി പി എ മുഹമ്മദ് റിയാസ്. ഭാര്യ വീണ വിജയനെതിരായ മാത്യു കുഴല്നാടന് എംഎല്എയുടെ ആരോപണത്തിന് മറുപടിയുമായാണ് മുഹമ്മദ് റിയാസ് രംഗത്തെത്തിയത്. 'ഓള്ഡ് വീഞ്ഞ് ഇന് ന്യൂ കുപ്പി'- അത്രയേ എനിക്ക് പറയാനുള്ളൂ എന്നും അദ്ദേഹം മാധ്യമപ്രവര്ത്തകരോട് പറഞ്ഞു.
ആരോപണം ഉന്നയിച്ച മാത്യു കുഴല്നാടനെതിരേ നിയമനടപടികള് സ്വീകരിക്കുമോ എന്ന മാധ്യമപ്രവര്ത്തകരുടെ ചോദ്യത്തിന് മറുപടിയായി കഴിഞ്ഞ തിരഞ്ഞെടുപ്പില് ജനങ്ങള് കൃത്യമായ നിലപാട് സ്വീകരച്ചതാണെന്ന് മന്ത്രി റിയാസ് പറഞ്ഞു. 'അദ്ദേഹത്തിന് ഇനിയും ഇനിയും പറയാനുള്ള അവകാശമുണ്ട്. ജനാധിപത്യത്തില് ഒരാള്ക്ക് പറഞ്ഞകാര്യം തന്നെ പറയാനുള്ള അവകാശമില്ലെന്ന് പറയാന് പറ്റുമോ? മമ്മൂട്ടിയുടെ മകനാണ് ദുല്ഖര് എന്ന് ഒരിക്കല് പറയാം. അടുത്ത പ്രാവശ്യം പറയാം ദുല്ഖറിന്റെ വാപ്പയാണ് മമ്മൂട്ടിയെന്ന്' റിയാസ് പരിഹാസരൂപേണ പറഞ്ഞു.
അതേസമയം മുഖ്യമന്ത്രിയുടെ മകള് വീണാ വിജയനെതിരെയുള്ള ആരോപണത്തിലുറച്ച് മാത്യു കുഴല്നാടന് എംഎല്എ ഇന്നും രംഗത്തെത്തി. വീണാ വിജയന്റെ കമ്പനിയുടെ മെന്റര് ആണ് പ്രൈസ് വാട്ടര്ഹൗസ് കൂപ്പേഴ്സ് ഡയറക്ടര് ജെയ്ക് ബാലകുമാര് എന്നത് വെബ്സൈറ്റില്നിന്ന് നീക്കം ചെയ്തെന്ന് അദ്ദേഹം വാര്ത്താസമ്മേളനത്തില് ആരോപിച്ചു. വെബ്സൈറ്റിലെ ഇത് വ്യക്തമാക്കുന്ന ഭാഗം അദ്ദേഹം വാര്ത്താസമ്മേളനത്തില് പ്രദര്ശിപ്പിച്ചു. സ്വര്ണക്കടത്ത് കേസ് ആരോപണങ്ങള് ഉയര്ന്നതിന് പിന്നാലെ എക്സാലോജിക് എന്ന കമ്പനിയുടെ വെബ്സൈറ്റ് ലഭ്യമല്ലാതായെന്നും പിന്നീട് മാറ്റങ്ങള് വരുത്തിയതിന് ശേഷമാണ് ഇത് വീണ്ടും ലഭ്യമായിത്തുടങ്ങിയതെന്നും മാത്യു കുഴല് നാടന് ആരോപിച്ചു. |
