|
കേന്ദ്ര സര്ക്കാര് തീരുമാനം അംഗീകരിക്കുന്നെന്ന് പോപ്പുലര് ഫ്രണ്ട്. സംഘടന പിരിച്ചു വിട്ടതായി അംഗങ്ങള്ക്ക് സംസ്ഥാന ജനറല് സെക്രട്ടറി എ അബ്ദുല് സത്താറിന്റെ പേരില് പുറത്തിറക്കിയ പ്രസ്താവനയില് അറിയിപ്പ് നല്കി. പ്രവര്ത്തനം നിര്ത്താന് അംഗങ്ങള്ക്ക് നിര്ദ്ദേശവും നല്കി.
കഴിഞ്ഞ മൂന്ന് പതിറ്റാണ്ടുകളായി സമൂഹത്തിലെ നിരാലംബരും അധഃസ്ഥിതരും പാര്ശ്വവല്ക്കരിക്കപ്പെട്ടവരുമായ വിഭാഗങ്ങളുടെ സാമൂഹിക-സാമ്പത്തിക-സാംസ്കാരിക ശാക്തീകരണത്തിനായി വ്യക്തമായ കാഴ്ചപ്പാടോടെ പരിശ്രമിക്കുന്ന സംഘടനയാണ് പോപ്പുലര് ഫ്രണ്ടെന്നും എല്ലാ ഇന്ത്യന് പൗരന്മാരും തുല്യ സ്വാതന്ത്ര്യവും നീതിയും സുരക്ഷിതത്വവും ആസ്വദിക്കുന്ന സമത്വ സമൂഹത്തിന് വേണ്ടിയാണിതെന്നും പ്രസ്തവാനയില് പറയുന്നു.
എന്നാല് ഇന്ത്യയിലെ നിയമം അനുസരിക്കുന്ന പൗരന്മാര് എന്ന നിലയില് മന്ത്രാലയത്തിന്റെ തീരുമാനം അംഗീകരിക്കുന്നു. പോപുലര് ഫ്രണ്ട് ഓഫ് ഇന്ത്യ പിരിച്ചുവിട്ടതായി അതിന്റെ എല്ലാ മുന് അംഗങ്ങളെയും പൊതുജനങ്ങളെയും അറിയിക്കുകയും ചെയ്യുന്നു.
നിയമവിരുദ്ധമെന്ന വിജ്ഞാപനം പ്രസിദ്ധീകരിച്ചതു മുതല് പോപുലര് ഫ്രണ്ട് ഓഫ് ഇന്ത്യയുടെ പ്രവര്ത്തനങ്ങള് നിര്ത്താന് എല്ലാ മുന് അംഗങ്ങളോടും അഭ്യര്ത്ഥിക്കുന്നുവെന്നും പ്രസ്താവനയില് പറയുന്നു. |
