|
മുതിര്ന്ന സിപിഎം നേതാവും സിഐടിയു സംസ്ഥാന പ്രസിഡന്റുമായ ആനത്തലവട്ടം ആനന്ദന് (86)അന്തരിച്ചു. തിരുവനന്തപുരം മെഡിക്കല് കോളജില് വ്യാഴാഴ്ച വൈകിട്ടായിരുന്നു അന്ത്യം. അര്ബുദബാധിതനായി കഴിഞ്ഞ നാല് മാസമായി ചികിത്സയിലായിരുന്നു. വെള്ളിയാഴ്ച 11 മണി മുതല് എകെജി സെന്ററില് പൊതുദര്ശനത്തിനു വെക്കും. ഉച്ചയ്ക്ക് 2 മണിമുതല് സിഐടിയു ഓഫിസിലും പൊതു ദര്ശനം നടക്കും. സംസ്കാരം വൈകിട്ട് അഞ്ച് മണിക്ക് ശാന്തികവാടത്തില് നടക്കും.
1956 ലാണ് കമ്യൂണിസ്റ്റ് പാര്ട്ടിയില് അംഗമാകുന്നത്. 1964 ല് പാര്ട്ടി പിളര്ന്നപ്പോള് സിപിഎമ്മിനൊപ്പം നിന്നു. 1985 ല് സിപിഎം സംസ്ഥാന കമ്മിറ്റിയംഗമായി.
തൊഴിലാളിവര്ഗ്ഗ പ്രസ്ഥാനത്തിനുവേണ്ടി സ്വന്തം ജീവിതം തന്നെ സമര്പ്പിച്ച ത്യാഗധനനായ നേതാവായിരുന്നു സഖാവ് ആനത്തലവട്ടം ആനന്ദനെന്ന് മുഖ്യമന്ത്രി പിണറായി വിജയന്. കമ്മ്യൂണിസ്റ്റ് പ്രസ്ഥാനത്തിന്റെ കരുത്തുറ്റ സംഘടനും ട്രേഡ് യൂണിയന് നേതാവുമായിരുന്നു സഖാവ്.
തൊഴിലാളികളുടെ പൊതുവിലും, കയര് തൊഴിലാളികളുടെ പ്രത്യേകിച്ചും അവകാശ പോരാട്ടങ്ങള്ക്ക് നേതൃത്വം നല്കിയ സഖാവ്, കമ്മ്യൂണിസ്റ്റ് പ്രസ്ഥാനം ശക്തിപ്പെടുക്കുന്നതിലും അതിന് വിപുലമായ ജനസ്വീകാര്യത ഉണ്ടാക്കുന്നതിലും വഹിച്ച പങ്ക് ചരിത്രപരമായ പ്രാധാന്യം ഉള്ളതാണ്. സി ഐ ടി യുവിന്റെ അഖിലേന്ത്യാ വൈസ് പ്രസിഡന്റ്, സംസ്ഥാന പ്രസിഡന്റ് എന്നീ നിലകളില് നടത്തിയ പ്രവര്ത്തനങ്ങള് അവിസ്മരണീയമാണ്. |
