ലണ്ടന്‍: യുകെയിലേക്കുള്ള കുടിയേറ്റം കുറയ്ക്കുന്നതിനുള്ള പുതിയ നടപടികള്‍ പ്രഖ്യാപിച്ചു. യുകെ ഹോം ഓഫീസ് പുറത്തിറക്കിയ പുതിയ വാര്‍ത്താക്കുറിപ്പ് അനുസരിച്ച്, താഴെ പറയുന്ന മാറ്റങ്ങള്‍ ഉടന്‍ നടപ്പിലാക്കും



സ്‌കില്‍ഡ് വര്‍ക്കര്‍ വിസയുടെ ശമ്പള പരിധി വര്‍ദ്ധിപ്പിക്കല്‍: നിലവില്‍ 25,600 പൗണ്ട് ആയ സ്‌കില്‍ഡ് വര്‍ക്കര്‍ വിസയ്ക്ക് അര്‍ഹത നേടാനുള്ള കുറഞ്ഞ വാര്‍ഷിക ശമ്പളം 48 ശതമാനം വര്‍ദ്ധിപ്പിച്ച് 38,000 പൗണ്ടാക്കും.



ക്ഷാമ തൊഴില്‍ ലിസ്റ്റ് നിര്‍ത്തലാക്കല്‍: നിലവില്‍ യുകെയില്‍ ക്ഷാമം നേരിടുന്ന തൊഴിലുകളുടെ ഒരു ലിസ്റ്റ് നിലവിലുണ്ട്, ഈ ലിസ്റ്റില്‍ ഉള്‍പ്പെടുന്ന തൊഴിലുകള്‍ക്ക് അപേക്ഷിക്കുന്ന വിദേശ തൊഴിലാളികള്‍ക്ക് കുറഞ്ഞ ശമ്പള പരിധി (20,480 പൗണ്ട്) ലഭ്യമാണ്. ഈ ലിസ്റ്റ് പൂര്‍ണ്ണമായും നിര്‍ത്തലാക്കും.



20 ശതമാനം ശമ്പള കിഴിവ് നിര്‍ത്തലാക്കല്‍: നിലവില്‍ യുകെയില്‍ ഒരു യൂണിവേഴ്‌സിറ്റിയില്‍ നിന്ന് ബിരുദം നേടിയ വിദേശ വിദ്യാര്‍ത്ഥികള്‍ക്ക് സ്‌കില്‍ഡ് വര്‍ക്കര്‍ വിസയ്ക്ക് അപേക്ഷിക്കാന്‍ 20 ശതമാനം ശമ്പള കിഴിവ് ലഭ്യമാണ്. ഈ കിഴിവും നിര്‍ത്തലാക്കും. ബ്രിട്ടീഷ് തൊഴിലാളികളുടെ തൊഴില്‍ നഷ്ടം തടയുക എന്നതാണ് ഈ നടപടികളുടെ ലക്ഷ്യമെന്ന് യുകെ ആഭ്യന്തര ഓഫീസ് വ്യക്തമാക്കി. ക്ഷാമം നേരിടുന്ന തൊഴിലുകള്‍ക്ക് വാഗ്ദാനം ചെയ്തിരുന്ന 20 ശതമാനം ശമ്പള കിഴിവ് നിര്‍ത്തലാക്കാനും വിദഗ്ധ തൊഴിലാളികളുടെ കുറഞ്ഞ ശമ്പള പരിധി ക്ഷ38,700 ആയി ഉയര്‍ത്താനും സര്‍ക്കാര്‍ പാര്‍ലമെന്റില്‍ ഉത്തരവിട്ടു.



അടുത്തിടെ, വിദേശ ഹെല്‍ത്ത് കെയര്‍ തൊഴിലാളികള്‍, പ്രത്യേകിച്ച് ഇന്ത്യക്കാര്‍, കുടുംബാംഗങ്ങളെ യുകെയിലേക്ക് കൂട്ടിക്കൊണ്ടുവരുന്നതിന് നിയന്ത്രണങ്ങള്‍ ഏര്‍പ്പെടുത്തിയിരുന്നു. കഴിഞ്ഞ വര്‍ഷം യുകെയിലേക്കുള്ള കുടിയേറ്റം റെക്കോര്‍ഡ് നിലവാരത്തിലെത്തിയിരുന്നു. ഈ വര്‍ഷം അവസാനം നടക്കാനിരിക്കുന്ന തിരഞ്ഞെടുപ്പിന് മുന്നോടിയായി, കുടിയേറ്റം കുറയ്ക്കണമെന്ന പാര്‍ട്ടിയിലെ വലതുപക്ഷ വിഭാഗത്തിന്റെ സമ്മര്‍ദ്ദം പ്രധാനമന്ത്രി ഋഷി സുനകിന് നേരിടേണ്ടി വന്നിട്ടുണ്ട്. 2036 ഓടെ യുകെയിലെ ജനസംഖ്യ 7.37 കോടിയായി ഉയരുമെന്ന് പ്രതീക്ഷിക്കുന്നു. ഇതില്‍ ഏതാണ്ട് 61 ലക്ഷം പേര്‍ കുടിയേറ്റം വഴിയാണ് എത്തുന്നത്.